ГлавнаяРазноеРасул Гьямзатовдин – 95 йис

Расул Гьямзатовдин – 95 йис

1 1 1 1 1 1 1 1 1 1

95Сентябрин 8-пи йигъан кIулди вари Дагъустандиъ вари дюн’яйиз машгьур шаир ва прозайин эсерар дикIру Расул Гьямзатовдин гьюрмат уьбхбан йигъ къайд гъапIну. Думу йигъан шаирин накьвдихъна агъзрариинди республикайин агьалйир уч гъахьну. Дурарин арайиъ Дагъустандин Главайин вахтназ вуди вазифйир тамам апIурайи Владимир Васильевра айи.

Расул Гьямзатов халкьдин шаирси, Дагъустандин диндинна медениятдин уьмриъ асас роль уйнамиш апIурайи вакиларикан сар вуди гъахьну. Гьаддиз гьарсар дагъустанлуйи дугъан гьюрмат марцци кIваан уьбхюра.

«Гьяйифки, гьамусяаьт гьамушвахьна уч духьнайи хайлин ватандашаризси, узуз гьаму машгьур, зигьимлу, фикирлу касдин багахь яшамиш хьуз ва дугъахъди сюгьбатар гъахуз мумкинвал гъабхьундарзуз. Амма дугъан яратмишари варидаризси узузра аьхю тясир гъапIну. Асас вуди гъи, узу Дагъустандиъ лихурайиган, Расул Гьямзатовдин гафнан кьувватлувалин, дугъан заанвалин гъавриъ гъахьунза.

Дугъу гьеле учв сагъди амиди, аьяндар философдизси ухь’ин улуркьру дюшюшар, гележегдиъ шлу гьядисйир улихь ккимиди рякъюри, инсанар фу чара дапIнура думу дарваларихьан уьрхру рякъяр агури гъахьну. Шаири чан гьарсаб яратмиш апIбаъ, вари ихь халкьарихьна илтIикIури, девлетарихъ ва заан гъуллугъарихъ хъергну, варитIан багьалуб – ухьу фу бадали яшамиш шулаш, кIваълан гьархну ккундар кIури, дих апIура. Дугъу гьаммишан дагъустандин халкьарин бахтлу гележегдикан, ислягьваликан, мублагъ артмиш’валикан фикрар апIури гъахьнийи. Дугъан «Кьарнийири» сар касра вижнасузди гъитрадар. Гьадму чан бицIи багъри ЦIада гъулкан мяъли апIурайи шаир гъи вари дюн’яйиз машгьур гъахьну. «Лизи кьарнийир» акцияра, шаирин хлинццарси вари дюн’я вуйибси гьатIабццури, магьа хайлин йисар ву», – гъапну Владимир Васильевди.

Чан улхуб давам апIури, республикайин Главайи Расул Гьямзатовдин багахьлуйириз, майил-мадатдиз машгьур шаирин ирс, гьюрмат уьбхювализ чухсагъул мялум гъапIну: «Расул Гьямзатовдиз, дугъаз кюмек апIури гъахьидариз, варидариз чухсагъул. Ичв зегьметнан кюмекниинди гъи гьарсар касдихьан, кIван гьиссар гъагъи духьнайи вахтна, вая уьмрин гъагъи дакьикьйириъ, шаирин эсерарин китаб хилиз гъадабгъну, гьадушваъ вари суалариз жавабар агуз шулу. Расул Гьямзатовди, Дагъустандин миди вуйи машгьур жиларси ва дишагьлийирси, учв вари дюн’яйиъ машгьур апIру, гьюрмат уьбхру, уьлкейи дамагъ апIру яратмишар арайиз гъахну. Гъи ухьу ихь Гьямзатовдин машгьур агъалар, дугъан фагьумлу гафар, гьиссар, фикрар, кьастар ихь веледарилан тина фици тарагъуруш ва уьрхюруш, фикир дапIну ккунду. Му суал гьял апIру рякъяр агурхьа», – къайд гъапIну республикайин кIулиъ айири.

Расул Гьямзатовдин накьвдихъна дуфнайи хяларин арайиъ РФ-йин ФС-йин Федерацияйин Советдин Председателин заместитель Ильяс Умаханов, РД-йин Халкьдин Собраниейин Председатель Хизри Шихсяидов, РД-йин Правительствойин Председатель Артем Здунов, РД-йин Главайин ва Правительствойин администрацияйин кIулиъ айи Владимир Иванов, республикайин парламентдин депутатар, министрар ва хайлин жара касар айи.

Уч духьнайидарин арайиан гьюрматлу хялар улхбан кьяляхъ, Расул Гьямзатовдин риш Салигьят Гьямзатовайи адашдихьна гьюрмат уьбхбаз варидариз чпин хизандин терефнаан чухсагъул мялум гъапIну.

«Адаш ихь арайиан душну магьа 15 йис ву. Амма гьар йисан гьаму йигъан думу кIваин апIури, гизаф дагъустанлуйир ва хялар уч шула. Дугъан накьвдихъна гизаф дугъан дустар ва думу ккуни инсанар зияратдизси гъюри шулу. Варидариз чухсагъул. Ич адашди чалантина гьамциб машгьурвал гъибт-биин дамагълу вуча», – гъапну Салигьят Гьямзатовайи.

Думу йигъан Расул Гьямзатовдин бабкан духьну 95-йис хьпаз бахш вуди Мягьячгъала шагьриъ Лениндин комсомолин ччвурнахъ хъайи паркдиъ шадлугънан митинг гъубхну, Мягьячгъала шагьриъ Расул Гьямзатовдин хулаъ хялар кьабул гъапIну, РД-йин писателарин Союздиъ, Поэзияйин театриъ Р.Гьямзатовдин уьмриз ва яратмишариз бахш дапIнайи мажлисар гъахьну, Урус театриъ Дагъустандин артистари концертдин программа улупну.

Мягьячгъалайиъ, Дербентдиъ, Гуниб ва Хунзах гъулариъ кIули гъуху асас серенжемарилан гъайри, кIулди республикайин вари шагьрариъ ва районариъ шаирин юбилейихъди аьлакьалу вуди гергми столарихъ вуйи гюрюшар, гьаму темайиз тялукь выставкйир, концертар ва жара серенжемар гъурхнийи. Дагъустандин халкьдин машгьур шаирин юбилей жара регионариъра ва харижи уьлкйириъра къайд апIуз планламиш дапIна.

Комментарии:

f1 in1 ok1 t1 v1 y1

Top