ГлавнаяСельское хозяйствоМал-къарайи кьюрд ужуди адапIиди

Мал-къарайи кьюрд ужуди адапIиди

1 1 1 1 1 1 1 1 1 1 Рейтинг 5.00 (1 Голос)

IMGМагьа яваш-явашди кьюрдра улубкьура. Аьдат вуйиганси, дагълу районариъ яшамиш шулайи инсанари чпин мал-къара асас вуди дюзенариъ ерлешмиш духьнайи галариз хъауз хъюгъна. Хулан гьяйванатар галариз хъаъбан асас себеб – дагълу гъулариъ айи касарихьан чпин мал-къара кьюрд ккудубкIайизкьан лазим вуйи кьадар алафдихъди тямин апIуз даршулайивал ву. Фицики дюзенариъ айи йишвариъси дарди, дагълу гъулариъ мал-къара октябрин аьхирариан саки мартдин аьхиризкьан чпин аьхъариъ апIну гъитра. Гьаддиз алафарра гьуркIрадар. 

Ццийин йисан мал-къара галариз хъапIувалин натижйирин гьякьнаан улихьнаси Кочубейдиъ республикайин галариз ва сивариз хъаъру малдарвалин гьяйванатарин месэл-йириз лигру управлениейиъ гъабхьи совещаниейиъра гъапнийи.

Совещаниейиъ къайд гъапIганси, цци хьадукран вазари галариан сивариз 1 миллионна 230 агъзур марччарна цIигьар хъаъну. Мидланра гъайри, саб кьадар чарвйир гъунши регионарин мулкарин галариъра гъитну. Гьамусяаьт республикайин мулкариин али галариз 1 миллионна 220 агъзур кIул чарвйир хъаъна, гьадрарикан 430 агъзур чарвйир машинариъди духнайидар ву.
Мидланра гъайри, серенжемдиъ цци галариз марччар хаърайи йишвариъ алафарихъди вуйи тяминваликан мялуматар тувуб РД-йин гъулан мяишатдин ва ипIру-убхъру сурсатарин Министерствойин малдарвалин управлениейин начальникдин заместитель Юсуф Юсуфовдихьан ккун гъапIнийча.
Дугъан гафариинди, вари зонйирин алафдихъди вуйи тяминвал сабишв’инди гьисаб гъапIиш, 2012 агъзур тонна, вая 47% ву. Хъа жа-жаради гьарсаб зонайикан улхуруш, гьамусяаьт алафарихъди варитIан ужуди тямин дапIнайи зона Бабаюртдинуб ву.
«Къайд дапIну ккундуки, Бабаюртдин зонайин галариъ алафарихъди вуйи тяминвал 80% ву. Думу зонайин галариз кьюрдун вазари республика-йин 20 райондиан мал-къара хъапIра. Яна, пуз шулуки, душваъ алафар гьуркIидар кIури, гучI’вал адар. Имбуну зонйирин гьякьнаан улхуруш, Къизилюртдин зонайин галарин алафарихъди вуйи тяминвал – 40%, Кочубей зонайин – 36%, Къизляр зонайин – 35% ва Бакрессдин зонайин – 29% ву. Хъа варитIан цIибди алафар уч дапIнайи галар Уланхолин зонайин (14%) ва Дербентдин зонайиндар (11%) ву.
Му зонйирикан улхури, пуз ккундузузки, мисалназ, Дербентдин зонайин галариз Кьибла Дагъустандин 5 райондин мал-къара хъапIра.
Эгер алафарихъди цIибди тяминвал ади вая алафар гьудруркIри гъахьиш, алафар саб зонайиан тмуну зонайиз гъахбан йикьрарра дапIна. Ихь республика кьибла республика вуйивализ дилигну, ухьухь кьюрдра думукьан аьхъюб вуди шулдар. Гьаддиз галар айи гьарсаб зонайиъ алафарихъди аьлакьалу читинвалар хьибдар кIури, умуд кивраза», – къайд гъапIнийи Юсуф Юсуфовди.
Мидланра гъайри, Юсуф Айдакьадиевичди мялум гъапIганси, кIули гъубху совещаниейин натижйириинди пуз шулуки, гъийин йигъаз мал-къара кьюрдун вахтназ кьабул апIурайи галарин гьял гьелелиг писди дар. Фицики, чатIариъ чрушин ими. Багарихьди аьхълушнарра хьидар кIури, умуд кивра.

Комментарии:

f1 in1 ok1 t1 v1 y1

Top