ГлавнаяСпортСабпи натижйир ужудар ву

Сабпи натижйир ужудар ву

1 1 1 1 1 1 1 1 1 1 Рейтинг 5.00 (1 Голос)

4 8yМурад Нурудинович Аьзизов (шиклиъ) Табасаран райондин 4-пи нумрайин ДЮСШ-йиъ спортдин юкьяр дисбан жюрейиан тренерди лихура. Му гъуллугъназ думу ццийин март вазли гъафну. Дупну ккундуки, цIийи тренери учв сифте йигъарилан мина чан ляхнихъ юкIв хъайи, халис пишекарси улупну. Дици вуйивал ляхнин натижйирира тасдикь апIура. Ццийин йисан, месела, дугъахьна тренировкйириз гъюрайи спортсменар шубуб ражари райондиъ сабпи йишв бадали вуйи талитариъ иштирак гъахьну ва командайин сабпи йишвар гъадагъну. Хъа июндин вазли дугъан тербиячйири РД-йин Кьибла зонайиъ сабпи йишв бадали вуйи талитариъ чпин гъагъишнан категорйириъ сабпи ва кьюбпи йишвар гъидисну. 

Гьелбетда, баяр-шубариз ужудар аьгъювалар тувбан бадали, сифте чаз мялимдиз ужудар аьгъювалар ва тажруба ади ккунду. Йиз фикриан, Мурад Аьзизовдиз тялукь аьгъювалар ва тажруба а. Дугъан гъийин йигъаз вуйи уьмурра спортдихъди аьлакьалу ву.
Мурад Аьзизов 1983-пи йисан Табасаран райондин Гурихъ гъулаъ мялимдин хизандиъ бабкан гъахьну. Дугъан адаш Нурудин Аьзизовра гизаф йисари гъулан мектебдиъ физкультурайин мялимди, ДЮСШ-йиъ тренерди гъилихну. Думу РД-йин лайикьлу тренер вуйи, дугъан тербиячйирин арайиъ РД-йин ва РФ-йин чемпионар, халкьарин арайиъ вуйи талитарин чемпионар айи. Мурадра, адашдин регьберваликкди, гьеле мектебдиъ урхури имиди спортдиин машгъул гъахьну ва райондиъ урхурайидарин арайиъ сабпи йишв бадали вуйи талитариъ чан гъагъишнан категорияйиъ юкьяр дисбаан хьуб ражари сабпи йишвар гъадагъуру. Хъа 2002-пи йисан Кьалухъ Мирзайин ядигариз бахш вуди халкьарин арайиъ кIули гъуху талитариъ дугъу чан гъагъишнан категорияйиъ спортсменарин арайиъ кьюбпи йишв гъазанмиш гъапIнийи. ДумутIанра савайи, Мурад Аьзизов РД-йин Кьибла зонайиъ ва РД-йиъ сабпи йишв бадали вуйи талитариъ иштирак гъахьнийи ва сабпи, кьюбпи йишвариз лайикь гъахьнийи.
Мектеб ккудубкIбан кьяляхъ, сад йислан, Мурад Аьзизов Мягьячгъалайиз гъушнийи. 2002-2004-пи йисари думу ЦОП-диъ (олимпиадйириз гьязур апIбан Центриъ) спортдиин машгъул шулу. 2002-пи йисан республикайиъ сабпи йишв бадали вуйи талитариъ дугъу 75 кг гъагъишин айи спортсменарин арайиъ сабпи йишв гъадабгъуру. Гьелбетда, думу жюрбежюр вахтари жара талитариъра иштирак шули гъахьну ва заан хъуркьувалар гъазанмиш гъапIну.
2006-пи йисан Мурад Аьзизов Мягьячгъалайиъ Дагъустандин гьюкуматдин пединститутдин спортдинна педагогвалин факультетдик заочно вуди урхуз кучIвнийи, ва 2012-пи йисан думу ккудубкIнийи. 2007-2008-пи йисари дугъу Урусатдин Ярхла Ригъ гьудубчIвру терефнаъ гьюлерин флотдиъ гъуллугъ апIури гъахьну. Армияйиан демобилизация апIбан кьяляхъ, Мурад Аьзизов Владивосток шагьриъ яшамиш шули гъузнийи. Думу хъана спортдиз гъафнийи. Ва, чаз айи медалари шагьидвал апIурайиганси, Мурад Владивосток шагьриъ, Ярхла Ригъ гьудубчIвру терефнан федералин округдиъ сабпи йишв бадали вуйи талитариъ швнуб-сабан хъуркьувалиинди иштирак гъахьну. 2012-пи йисан думу багъри гъулаз кьяляхъ хъадакну гъюру. Ляхниз гъафиган, Мурад Аьзизовдиз душваъ айи шартIар асла кьабул гъахьундайи. Мектебдин хуларикк ккайи зал ва душваъ айи авадлугъар вари йирсидар вуйи. Залин пол дутIнайи. Хъа дурар рас апIуз, цIийи авадлугъар масу гъадагъуз дугъаз пулин дакьатар тувру йишвра адайи. Хъа Гурихъ ва багахь гъулариан гизаф баяр-шубариз Мурад Аьзизовдихьна тренировкйириз гъюз ккундийи. Спортзал рас апIуз дугъаз гъуландари кюмек апIуру. Гъулан поселениейин депутат Мягьямед Ханмягьямедовдин жягьтлувалиинди гъуландари спортзал рас апIбаз лазим вуйи материал ва душваъ дивру авадлугъар масу гъадагъну гъахнийи. Зал 8х5 метр уьлчмейин ву. Улихьна йигъари душваъ пол дигиш гъапIну, цалар катIну ва ширар гъивну, цIийи матйир ккирчну.

8yГьамусяаьт Мурад Аьзизовди баяр-шубарин кьюб дестейихъди ляхин апIура: саб дестейихъди лисундин вахт хьайиз, тмуну дестейихъди лисхъан. Дугъахьна Гурихъ ва Жулжагъ гъуларин поселенйириан 50-рихьна бицIир гъюра.
Гьелбетда, спортдиин машгъул хьуз ккунди айидарин кьадар бицIиб дар. Баяр-шубар чпин тренерихьна дарсариз аьхю аьшкьниинди гъюри шулу, хайлиндар – швнуб-саб километр рякъ ккадапIну. Хъа 5х8 метр уьлчмейин зал бицIиб ву. Гьаддиз ич гюрюшдиъ Мурад Аьзизовди чпин мектебдихъ аьхю уьлчмейин спортзал чарсуз дубхьну ккуниваликан гъапнийи.
– Узуз, узухьна тренировкйириз гъюрайи баяр-шубари спортдин маканариъ заан йишвар гъадагъруси, дурарикан ужудар инсанарра духьну ккундузуз, – къайд гъапIнийи Мурад Аьзизовди.
Жигьил тренер Аьзиз Мурадовдиз чан ляхниъ заан хъуркьувалар ккун апIурхьа!

Комментарии:

f1 in1 ok1 t1 v1 y1

Top