ГлавнаяЮбилеиМашгьур аьлим Бейдуллагь Ханмягьямедовдин гьюрматназ

Машгьур аьлим Бейдуллагь Ханмягьямедовдин гьюрматназ

1 1 1 1 1 1 1 1 1 1 Рейтинг 5.00 (2 Голосов)

77Ноябрин 7-пи йигъан Хив райондин ЦБС-диъ табасаран миллетдин машгьур аьлим, чIаларин илмарин доктор Бейдуллагь Ханмягьямедовдин гьюрмат уьбхбаз бахш дапIнайи серенжем кIули гъубшну.

Му серенжемдиъ чIалнан илмарин доктор, РАН-дин Дагъустандин илимдин Центрин, чIалнанна литературайин, искусствойин Институтдин доцент Сабрина Шихялиева, шаир Гюлбика Уьмарова, Хив РОО-йин вакилар, мектебариъ табасаран чIалар киврайи саб жерге мялимар, библиотекйирин гъуллугъчйир иштирак гъахьну.
Серенжем ачмиш апIури, ЦБС-дин директор Зумрият Сялигьовайи гъабхурайи йигъинжагъдин бабан чIалар, милли меденият уьрхбан ва артмиш апIбан метлеблуваликан гъапну.
Гьюрматлу Бейдуллагь Гьяжигъурбановичдин уьмрин ва илимдин рякъкан улхури, думу аьлимдин дурумлу рякъ гъийин девриъ давам апIурайи жигьил аьлим Сабрина Шихялиевайи къайд гъапIну:
«Бейдуллагь Ханмягьямедовдин ччвур таниш дару кас табасаран халкьдин вакиларин арайиъ, йиз фикриан, адаршул. Думу бажаранлу аьлим Хив райондин Гъвандикк гъулаъ бабкан гъахьну. Гъи, аьлимдин 90 йис тамам шулайиган, ухьу Бейдуллагь Ханмягьямедовдин багъри ругариин дугъан гьюрмат уьбхюз уч духьнахьа.
Дугъриданра, Бейдуллагь Ханмягьямедовди табасаран чIал ахтармиш, артмиш апIбак, думу уьбхбак лайикьлу пай кивну. Саб жерге жавабдар гъуллугъариъ дилихну, дугъу наслариз багьалу ирс гъибтну. Хъа РАН-дин ДНЦ-йин Гьямзат ЦIадасайин ччвурнахъ хъайи чIалнанна литературайин, искусствойин Институтдиъ кIулин гъуллугъчиди лихурайи йисари дугъу чан вари кьувватар табасаран чIал артмиш апIбаз сарф гъапIну.
Бейдуллагь Ханмягьямедовдин саки 50-тIан артухъ илимдин чап апIбар а. Дугъу саб жерге табасаран чIалнан китабар, аьлава пособйир, табасаран чIалнан жюрбежюр словарар яратмиш дапIна. Думу таржумачира ву.
Бейдуллагь Гьяжигъурбановичди табасаран чIал бадали гъибту ирснакан аьхир адрубкьан улхуз шулу. Хъа ухьу, гъийин наслари, халкьдиз му багьалу ирс, халкьдин рюгь аьсрариз даимлугъ апIурайи бабан чIал артмиш гъапIу вакилар саб вахтнара кIваълан гьархну ккундар. Фицики тарих хътру гележег айиб дар».
Бейдуллагь Ханмягьямедовди чIал уьбхбан метлеб ади лайикьлу зегьмет гъизигуваликан, бабан чIалар уьрхбан бадали лазим вуйи серенжемарикан, гъийин гьякьикьатдикан аьлимдин гьюрматназ тешкил дапIнайи серенжемдин хайлин иштиракчйири гъапнийи.
Хиварин «Ромашка» бицIидарин бахчайин баяр-шубари бабан чIалнан багьалуваликан шиърарра гъурхну.
Серенжемдин аьхириъ шаир Гюлбика Уьмаровайи му йигъан чан эм вуйи Бейдуллагь Ханмягьямедовдин гьюрмат уьбхбаз уч гъахьи гьарсар касдиз чухсагъул мялум гъапIнийи.

Комментарии:

f1 in1 ok1 t1 v1 y1

Top