ГлавнаяЮбилеиБаркаллу зегьметнан вакил

Баркаллу зегьметнан вакил

1 1 1 1 1 1 1 1 1 1 Рейтинг 5.00 (1 Голос)

1.2Гьаму йигъари Дагъустандин илмарин центрин Гьямзат ЦIадасайин ччвурнахъ хъайи чIалнан, литературайин ва искусствйирин институдиъ табасаран халкьдин машгьур вакил, РД-йин илмарин лайикьлу деятель, филологияйин илмарин доктор, аьлим, профессор Бейдуллагь Ханмягьямедовдин 90 йис хьпаз бахш дапIнайи серенжем кIули гъубшну. 

Серенжем ачмиш апIури, РАН-дин ДНЦ-йин ИЯЛИ-йин директор Мягьямед Мягьямедовди Бейдуллагь Ханмягьямедовдин уьмрикан, институтдиъ лихурайи йисари дугъу тартиб гъапIу ва чапдиан адагъу хайлин учебникарикан, пособйирикан, дугъан илмиз лигбан маракьарикан ва машгьур аьлимди литературайиъ, чIалнан артмиш’валин цирклиъ гъибту баркаллу шилнакан ктибтну. «Гьяйифки, жюрбежюр себебариан аьлимдихьан чаз айи вари аьгъюваларин кьувват ишлетмиш апIуз гъабхьундар.  Дугъу хайлин жигьил аьлимариз, чIалнан ишчйириз кюмек гъапIну. Ляхнин юлдшари дугъкан вуйи марцци хиялар гьаммишан кIваъ уьрхюра», – къайд гъапIнийи Мягьямед Мягьямедовди. 

Бейдуллагь Ханмягьямедовдин уьмрикан, яратмиш апIбан рякъкан, аьлимвалин ва мялимвалин йисарикан ДГПУ-йин профессор Загьир Загьировди доклад гъурхнийи. Дугъу мялум гъапIганси, Бейдуллагь Ханмягьямедов 1927-пи йисан Хив райондин Гъвандикк гъулаъ варитIан девлетлу, Кьибла Дагъустандиъ машгьур мулкидар Гьяжи-Кьуттайин хизандиъ бабкан гъахьну.
«Узу 9 йисан Москвайиъ яшамиш гъахьунза, кьюб ражари юкьу-кьуб вазли Ленинграддиъ аьгъюваларин пишекарвалин дережа за апIбан курсариъ гъахьунза, Африкайиъ, Турцияйиъ лихуб кьисмат гъабхьунзуз, амма саб йишваъра Бейдуллагь Гьяжикъурбановичси марцци кIваан чIал ккуни, гьадмукьан аьяндар, аькьюллу аьрифдар аьлим алахъундарзуз. Думу фунуб терефнаанра артмиш хьуз гьевеслур вуйи», – къайд гъапIну Загьир Загьировди.
Машгьур аьлимдикан удучIвну гъулхдарин арайиъ аьлимар Мажид Халилов, Иса Аьбдуллаев, Мягьямед Мягьямедов, Саимат Юзбегова, Сабрина Шихялиева, шаир Гюлбика Уьмарова, Расул Гьямзатовдин фонднан вице-президент Гьябибат Аьзизова айи. Мидланра гъайри, РД-йин Халкьдин Собраниейин депутат Нариман Асваровди, машгьур писателар ва шаирар Багъир Ражабовди, Шагьвелед Шагьмардановди, Эльмира Аьшурбеговайи ва жарадари Бейдуллагь Ханмягьямедовдихъди чиб таниш гъахьивалин дакьикьйирикан, дугъу чпин уьмриъ уйнамиш гъапIу роликан, аьлимди тартиб гъапIу словарарин, мектебариз, педучилищйириз вуйи китабарин аьхю мянайикан, ихь чIал илимдин бинайиин алди артмиш, дерин ва девлетлу апIбак Бейдуллагь Гьяжикъурбановичди аьхю пай кивуваликан, чпи дугъан рюгьяриз икрам апIури яшамиш шулайиваликан ктибтнийи.
Серенжемдин аьхириъ Бейдуллагь Ханмягьямедовдин шуру Сакинат Ханмягьямедовайи му серенжем тешкил гъапIдариз, чан адаш аьхю гьюрматлувалиинди кIваъ уьрхюрайидариз, дугъан ляхнин юлдшариз чпин хизандин терефнаан чухсагъул мялум гъапIнийи.

Комментарии:

f1 in1 ok1 t1 v1 y1

Top