ГлавнаяЗдравоохранениеЖвуван сагъвалин гъайгъушнаъ

Жвуван сагъвалин гъайгъушнаъ

1 1 1 1 1 1 1 1 1 1 Рейтинг 5.00 (1 Голос)

44Гьар йисан ноябрин вазлин шубубпи хамис йигъ вари дюн’яйиъ папрус зигбаз къадагъа апIбан йигъси къайд апIури шулу. Думу йигъ къайд апIувал 1977-пи йисан Америкайин онкологияйин жямяаьтлугъ тешкилатди тяйин гъапIнийи. 

Республикайин наркологияйин диспансерин амбулаторияйинна поликлиникайин отделениейин кIулиъ айи Раисат Сагьидовайи къайд гъапIганси, папрус, тембеку зигбаз къадагъа апIру, вари халкьарин йигъ тяйин апIувал тембекуйин сурсатарихьан асиллувал зяиф хьуз гъитуз, дид’ин машгъул шулайидарин кьадар цIиб апIуз, агьалйириз дидкан айи аьхю зарарнакан ктибтуз, профилактикайин яркьу серенжемар гъахуз мумкинвал тувра.
«Урусатдиъ папрус зигбахъди аьлакьалу вуди арайиз гъафи уьзрариан гьар йисан 400 агъзурихьна агьалйир кечмиш шула. Дурарин арайиъ юкьур касдикан шубур 35-60 йистIан яш дубхьнайидар дар. Европайин уьлкйирихь тевиган, Урусатдиъ 2,5 ражари артухъди инсанар кечмиш шулайивал гьисабназ гъадабгъна», – ктибтура Раисат Сагьидовайи.
Папрус зигувалин асиллувалиъ адрахъбан бадали гьапIну ккундуш гьерхиган, наркологди жигьилари чпин гевюл, маракьар, бедендин кьувват спортдиин машгъул хьувалиина диш дапIну ккуниваликан гъапну.
Аьхиримжи вахтна жигьилари кальян зигурайивали, спайс наркотик, чIвубкьру тембеку насвай ишлетмиш апIувалиин машгъул духьнайивали дугъак лапра гъалабулугъвал кипнайи.
«Дугъриданра, гъийин йигъан Урусатдиъси Дагъустандиъра тембекуйин сурсат, кальян, жюрбежюр зигру наркотикар ишлетмиш апIувалихъди аьлакьалу гъагъи аьгьвалат арайиз дуфна. Хайлин дюшюшариъ жигьилар кечмиш шула. Мисалназ, спайс лап гъагъи ва инсандин бедендиз аьхю зарар тувру наркотик ву. Хайлиндари думу, гашишдин вая анашайин папрусихъди теври, дидкан артухъси зарар айиваликан мялумат адарди, ишлетмиш апIура. Спайс – химияйин гъагъи сурсатарикан гьясил дапIну, ухьухьна Европайиан дубхнайиб ву. Ич тажрубайиъ дидихъди аьлакьалу вуди гъахьи хайлин гъагъи дюшюшар мялум ву. Спайсдин сурсат кайи папрус анжагъ саб ражари дизигну, фагьмин ками духьну учухьна илтIикIу жигьилар а. Дурарин фикир къайдайиз гъяйиз гьацI йистIан артухъ вахт лазим ву. Психика пуч гъабхьи инсанди фициб вушра тахсиркарвал апIуб мумкин ву. 2014-пи йисан Дагъустандиъ Сулак поселокдиъ гъабхьи дюшюш саринра кIваълан дубшнадаршул. Думуган спайс ишлетмиш гъапIу жилири чан хпир йивну гъакIну, хъасин 6 ва 4 йисан яшариъ айи кьюр чан веледар гъурккну. Гьаму жюрейин дюшюшар ва наркоманари чпиин хил иливувал кми-кмиди шулу. Тембекура пучIу наркотик ву. Чан нубатнаъ дидира, инсан асиллувалихъна хури, беден айтIан мина пуч хьуз гъитру», - къайд апIура духтри.
Республикайин духтрари му месэлайиз аьхю фикир тувра, жигьилар папрус зигбан, наркотикар ишлетмиш апIбан асиллувалиан азад апIру рякъяр агура, агьалйирин арайиъ сикин дарди профилактикайин серенжемар гъахура.
Сагъ’вал, метлебсузди хъау жигьил йисарси, кьяляхъ апIуз шлуб дар. Гьележегдиъ учвуз ва ичв багахьлуйириз шадвал ва сагъ’вал ккундуш, гъи сагъу уьмур хъапIуз хъюгъяй.

Комментарии:

f1 in1 ok1 t1 v1 y1

Top