ГлавнаяЗдравоохранениеМянасуз гележег

Мянасуз гележег

1 1 1 1 1 1 1 1 1 1 Рейтинг 5.00 (1 Голос)

0011AГьамусяаьт вари дюн’яйиъ ВИЧ/СПИД-диз аькси вуди саб гьяфтайин акция гъябгъюра. Акцияйин дахилнаъди Урусатдин вари регионариъ, гьадму гьисабнаан Дагъустандиъра, хайлин серенжемар гъахура. Му къурхуллу уьзрихъди аьлакьалу вуди узуз йиз уьмриъ гъабхьи дюшюшдикан учвузра ктибтуз ккундузуз.
«Гьар йисан декабрин 1-пи йигъан вари дюн'яйиъ СПИД-дихъди аькси женг гъабхру йигъ къайд апIури шулу. Узу му уьзрихьан чпи уьрхюрайидариз, дидкан хабар адрудариз бахтаврар кIури шулза. Хъа сад-кьюд йис мидиз улихьна узура гьадму бахтаврарикан сар вуди гьисаб апIуз шуйи», – ктибтура Мягьячгъала шагьриан вуйи Марияйи.

Марияйихъди узу, республикайин СПИД-центриз аьзарлуйирикан мялуматар гъадагъуз гъушиган, таниш гъахьунза. Думу СПИД уьзур кайир ва духтрарихьна нубатнан ражари антиретровирусдин терапияйин сагъ апIбан курс гъабхуз дуфнайир вуйи. Дишагьлийин гафариинди, ВИЧ-инфекцияйиан думу хабарсузди аьзарлу гъахьну. «Узуна йиз жилири хал-хизан ккебгъну, магьа юкьубпи йис гъябгъюра. Узуз, хулан ляхнар кIули гъахури, бицIи шураз лигури, ляхниз гъягъюз мумкинвал шуладайзуз. Хъа сар жилири гъазанмиш апIурайи дакьатарихъ гьар вазлиъ учу деънайи хуларихъанра, ипIру-убхъру сурсатарихъанра, алабхьру палатдихъанра тувуз пул гьубкIудайи. Гьаддиз жилир вахт-вахтарик дустарихъди ляхин апIуз Москвайиз гъягъюз мажбур гъахьну.
Гьаци лихури дугъан сад йис гъабхьнийи. Хулаз цIийи шей’ар, электротехникара масу гъадабгънийча. Сад йигъан узу кьюрпи бицIириз гъагъдиъ айиб аьгъю гъабхьунзуз. Узура жилирра рази гъахьнийча, ич сарпи велед риш ву, хъа кьюрпир бай хьиди кIури, миж кивнийча. Гинеколог духтри узу ВИЧ-инфекцияйин аьзарлу духьнайиваликан мялум гъапIу йигъ йиз затра кIваълан дурубшур. Узу, дугъахъ хътругъри, сабансана ражари анализар тувунза. Нубатнандариъра дигиш’валар гъахьундайи. Жилир Москвайиъ ляхниъ айи. Думу гъяйиз сикинвал дибрихъри, гьар йигъан ишури, йишвну ахуз даршули йигъар адаунза. Жилир хулаз хъуркьубси, дугъаз диагноздикан гъапиза. Думу мюгьтал гъахьнийи ва, учв адруган узу жара жиларихъди гъилицну кIури, тахсрар кирчуз, учв марцц апIуз хъюгънийи.
БицIи вахтналан дугъу узкан хил алдабгъувал ккун гъапIну. ВуйиштIан, гьацI йис улихьна думу чан дуст баярихъди Мягьячгъала шагьриъ саб саунайиз гъушну. Гьадушваъ ички убхъбан кьяляхъ, дустари пучIу хасиятнан дишагьлийириз чпихьна гъюб теклиф гъапIну.
Жилир дицисдар дишагьлийирихъди аьлакьайиъ учIвуз дарди, багахь дийигъузкьан ккунир дайи, хъа ичкийи чан ляхин гъапIну.
Гьамус учу кьюридра ВИЧ-инфекцияйин аьзарлуйир вуча. Узу жилирикан нюкягь чIюбгъюб ккун гъапIундайза, фицики гъи гьамциб уьзур кайир узу шлиз лазим ву. Узуз гъабхьи фикрин аьзиятнаан вуш аьгъдарзуз, вая кIваз гъабхьи дерднаан, хъа учу ккилигурайи бицIирра бабкан хьайизра кечмиш гъахьну. Гьамусяаьт учу ич сарпи велед бадали яшамиш шулача. Веледдиз саб фу-вуш ужуб, мянфяаьтлуб, дугъаз хайирлуб гъибтуз ккундийчуз, фицики учу багахь гележегдиъ гъузидар, аьхир. Хъа гьаму уьзри фукIара улихь гъябгъюз гъитрадар (машниин хилар иливну ишура). Ич багахьлуйирра учхьан илтIикIну. Дурариз ич веледкьан рякъюз ккунди амдар. Хъа узу ва йиз риш фтин тахсиркрар ву?!»


P.S. Республикайин СПИД-дихъди аькси женг ва профилактика гъабхру центриан учуз туву мялуматариинди, анжагъ гъябгъюрайи йисан 9 вазлин арайиъ Дагъустандиъ тазади ВИЧ/СПИД уьзур кади 158 кас ашкар гъахьну. Дурарин гьисабнаъ айи 68 дишагьлийик уьзур чпин жиларикан кубчIвну. Думу дишагьлийирин аьхюнуб пай бицIир хуз гъагъдиъ а. Хъа дурарин ва гьелелиг дюн’яйиз дуфну адру бицIидарин гележег фициб шулуш, улхбакан мяна амдар.

Комментарии:

f1 in1 ok1 t1 v1 y1

Top