ГлавнаяЗдравоохранениеАгьалйирин сагъламвалин гъайгъушнаъ

Агьалйирин сагъламвалин гъайгъушнаъ

1 1 1 1 1 1 1 1 1 1 Рейтинг 5.00 (2 Голосов)

f9a4162cc1f81b9e962dff1a60f574acСагъламвал инсандиз айи аьхю девлет ву. Анжагъ кетIерццну адруган, ухьу дидин гъавриъ шуладархьа. Инсандин сагъламвалин гизаф пай хасиятнакан, дугъу хъапIрайи уьмрин къайдайикан асиллу ву, кIури шулу. Вушра, ухьу сагъламвалин гъайгъушнаъ шулушра, чвлин ва кьюрдун вахтна инфекцияйин сарикан-сарикна тарагъру уьзрари ухьу ккагъру. Гьаддиз аьхиримжи йисари, вари ихь гьюкуматдиъси, Дагъустан Республикайиъра ОРВИ-йин ва гриппдин эпидемияйихъди профилактикайин ляхин гъабхувал жанлу дапIна.

Дербент шагьриъ му гъагъи уьзрариз аькси вуди гъабхурайи ляхникан аьгъю апIувал метлеб вуди, узу ГБУ РД «Дербент ЦГБ» тешкилатдин эпидемияйин отделин заведующий Аь.Аьдиловдихъди гюрюшмиш гъахьунза.
– Аьдил Агъабалаевич, чвлинна кьюрдун вахтна шагьрин агьалйирин сагъламвал уьбхбаз фициб фикир туврачва?
– Аьхиримжи 6-7 йисандин арайиъ ОРВИ-йин ва гриппдин уьзрарихъди женг гъабхури, август, сентябрь, октябрь вазариъ агьалйириз прививкйир апIбан бадали, вакцина масу гъадабгъунча. Сентябриъ 15420 кьадарнаъди яшлу касариз вуйи вакцина, 22585 – бицIидариз вуйиб, 22085 кьадар доза 6 ваз дубхьнайи бицIидарилан 18 йис хьайизкьан яш айидариз гъадабгъунча. Прививкйир сентябрь ва октябрь вазариъ гъапIунча, гьадму гьисабнаан, гъагъдиъ айи дишагьлийириз 500 прививка. Учу 40% агьалйириз прививкйир дапIну ккунду. «Ваъ» кIурударихъди дурар гъавриъ тIаъбан серенжемар кIули гъахурача. Дурарин арайиъ дин хъапIрайи агьалйир, прививкайин натижйирихъ хъугъуз даккнидар ва чпин сагъламваликан фикир ктрудар а. Баяр-шубариз прививкйир апIуз даккни абйир-бабарихъди гьар вахтна гъаврикк ккаъру серенжемар гъахуз чалишмиш шулча.
– Сабпи нубатнаъ фуну агьалйириз прививкйир дапIну ккунду?
– Сабпи нубатнаъ привикйир вари баяр-шубариз, гъагъи иццрушин кайи агьалйириз, бицIидарин багъарин ва жара урхбан тешкилатарин тербиячйириз, гъагъдиъ айи дишагьлийириз, мялимариз, сагъламвал уьбхбан пишекрариз дапIну ккунду. Цци 620 баяр-шубариз прививкйир дапIнадар, гьаз гъапиш дурарин абйир-бабари ихтияр туврадар. Урхурайидарин абйир-бабар уч дапIну, 3 ражну гъаврикк ккаъбан сюгьбатар гъухунча, амма натижа адар.
Сагъламвалин тешкилатариз чпихьан гъюз шулдарш, учу гьарурихьна хулазра гъягъюри шулча, гьацира кетIерццну айидарихьнара. Аьхиримжи 5-6 йисандин арайиъ шагьрин агьалйирик кубчIврайиб грипп дар, гизафси ОРВИ уьзур ву. Профилактикайин ляхин гъабхури, учу «Дербентдин хабрар» газатдиз макьалйирра дикIури шулча.
– Сачдин йисахь лигну, ццийин йисандин натижйирикан фу пуз шулвухьан? Сач тарабгъу ОРВИ-йин уьзур кубчIвдар гизаф гъахьиганси гьибгъразуз. Узура кьюб ражари ктIерццнийзу.
– Дюзди гъапиш, гизаф агьалйир, йислан-йисаз гъавриъ шули, прививкйир апIуз разивал тувра. Инсанар му уьзрариан улихьна йисариси ктIерццури амдар. Вушра, сагъламвализ фикир туври ккунду. Гизафси инсанар декабрин аьхириъ, февралиъ ктIерццури шулу. Грипп уьзур кайиган, инсандин кIул яманди иццру шулу, уларра кмиди иццри хьуз хъюгъру, температура ади, инсан амансузди, дугъан хъюхъяриан рубзури шулу.
– Аьдил Агъабалаевич, ич газат урхрудариз, дурари чпин сагъламвал уьбхбан бадали, фицдар насигьятар тувуз шулвухьан?
– Саб гъапиб, эгер температура ади гъабхьиш, хулаъ гъузну ккунду, духтризра хулаз теклиф апIуб лазим ву. Духтрихьан ихтияр адарди дармнар ишлетмиш апIувал дюз дар. Гьацира гизаф шид, чай убхъуб теклиф вуйиз ву. КтIерццу бицIидарра хулаъ гъитну ккунду. Аптекйирин маскйир алахьуб лазим ву, хъа думу маска 4 сяаьтналан гьюдюхну ккунду. Аьхиримжи йисари ихь агьалйири телевизорин улихь гизаф вахт адапIура. Душваъ дурариз дармнарин рекламара рябкъюра. Бязи касар телевизориъ кIурайибдихъ хъугъра. Гьарсар инсан чаз духтри гъидикIу дармнариинди сагъ хьуз чалишмиш духьну ккунду.
– Чухсагъул Аьдил Агъабалаевич! Ихь ватанагьлийири чпин сагъламвализ фикир тувур кIури, умудлу шулхьа. Яв рягьят дару ляхниъ увузра хъуркьувалар ишривуз!

Комментарии:

f1 in1 ok1 t1 v1 y1

Top