ГлавнаяЗдравоохранениеЯв ВИЧ-статус аьгъю апIин

Яв ВИЧ-статус аьгъю апIин

1 1 1 1 1 1 1 1 1 1 Рейтинг 1.00 (1 Голос)

8889

Гьаму йигъари Мягьячгъала шагьриъ Дагъустандин гьюкуматдин технический университетдиъ (ДГТУ) Вари дюн’яйин СПИД-дихъди женг гъабхру йигъандин серенжемарин дахилнаъди ва «Аьгъяди ккунду» ччвурниккди ВИЧ-диз аькси акция кIули гъубшну. Душваъ республикайин заан урхбан идарйирин студентар иштирак гъахьнийи.

КIваин апIуз ккундучуз, 1998-пи йисхъан мина вари дюн’яйиъ декабрин 1-пи йигъ СПИД-дихъди женг гъабхру йигъси къайд апIура. Му йигъан вари дюн’яйин миллионариинди инсанар СПИД-дин эпидемия дебккбан, думу терг апIбан бадали, зигуарйи зегьметнакан, ляхнин гъизгъинваликан, арайиз дуфнайи хъуркьуваларикан улхуз уч шулу.

ДГТУ-йиъ серенжем ачмиш апIури, думу университетдиъ тербияйин ва социалин цирклариан ляхин гъабхру проректор Тамила Рягьимовайи му учIру месэла гьял апIбахьан жямяаьтлугъ гъирагъдиъ гъузну даккниваликан гъапнийи.

СПИД-диз аькси профилактикайин акцияйин лозунг «Шак’вал адарди яшамиш йихь: яв ВИЧ-статус аьгъю апIин» ччвур тувнайиб вуйи. Уч духьнайи хялари ВИЧ-инфекция тарабгъбан хатIалувалиркан ва думу уьзриз аькси профилактикайин къайдйирикан ктибтнийи.

РД-йин жигьиларин ляхнариз лигру министрин заместитель ПатIимат Уьмаровайи гъийин йигъан республикайиъ арайиз дуфнайи ВИЧ/СПИД уьзрин улупбарикан, аьзарлуйирикан, уьзур тарабгъбан рякъярикан ва уьзриан гъийихдарикан ктибтну.

«Му уьзур республикайиан терг апIбан бадали, ухьу ихь кьувватар сатIи дапIну ккунду. Гьарсар кас сифте жвувхъан хъюгъюб лазим ву. Гъи учву ичв ВИЧ-статус аьгъю апIбаъ му сабпи гам ибшри»,

- гъапну П.Уьмаровайи. Дугъан кьяляхъ удучIвну гъулху вари халкьарин «Кавказ» ассоциацияйин президент Хасайбат Валиевайи, жигьилариз СПИД-диз багахь вуйи уьзур наркоманияйин улупбар, гьисбар арайиз адагъури, республикайиъ айи аьгьвалатнакан мялуматар тувну.

Серенжемдиъ иштирак гъахьи саки вари хялар удучIвну улхбан кьяляхъ, студентариз СПИД тарабгъбакан, дидиз аькси профилактикайин серенжемар гъахбакан социалин роликар улупну.

Къайд апIуз ккундучузки, Дагъустан Республикайиъ ВИЧ уьзур кади 2947 кас ашкар гъахьну, дурарикан 906 гъийихну. ВаритIан гизаф аьзарлуйир Дербент, Дагъустандин Огни, Каспийск, Буйнагъск шагьрариъ, Дербент, Мягьярамкент, Бабаюрт, Къумтуркъала, Къизилюрт ва Къизлар районариъ гьисабназ гъадагъна. ВИЧ-инфекция кайи бабарикан гъийин йигъаз 348 бицIир гъахьну, дурарикан 24 бицIирикнара думу уьзур тарабгъну. 

Комментарии:

f1 in1 ok1 t1 v1 y1

Top