Дагъустандиъ кIамкIарин уьзур ва грипп тарагъбахъди аьлакьалу аьгьвалат гьеле гъябгъюрайи йисан апрель вазлихъанмина гъагъи дубхьнайи. Дидхъанмина прививкйир апIбан ва профилактикайин серенжемар гъахбан кюмекниинди уьзур яваш апIуз гъабхьнийи. Амма аьхиримжи вахтна респуб-ликайиъ хъана кIамкIарин уьзур ачмиш хьпан дюшюшар арайиз гъюра. Думу уьзур тарабгъувалин дюшюшар артухъ шулайивалихъди аьлакьалу вуди РД-йин Глава Сергей Меликов дагъустандин агьалйирихьнара илтIикIну.
КIамкIарин уьзриан республикайиъ арайиз дуфнайи аьгьвалатнакан вахтназ вуди Роспотребнадзорин РД-йиъ айи управлениейин кIулиъ айирин вазифйир тамам апIурайи Зелимхан Уьмариевди ктибтну.
«КIамкIар – му кьюд-шубуд йис гъидипури ачмиш шлу тарабгъру уьзур ву. Гьаддиз уьлкейин 32 региондиъ, гьадму гьисабнаан Дагъустандиъра, думу уьз-рин улихьишв бисуз кIули гъахурайи серенжемариз дилигди, думу хъанара ачмиш шула. Амма, жара регионариъси дарди, Дагъустандиъ, прививкйир апIувализ варитIан гизаф аьксивал улупурайи республика вуйивализ лигну, уьзур ачмиш хьпан учIру дюшюшар артухъ шула. Уьлкейиъ гьамусяаьт му уьзур варитIан гизаф тарабгънайи регионарин сиягьнаъ Самарский область кьюбпи йишвлан илдипунхьа. Гъи республикайиъ, кIамкIарин уьз-риан аьзарлу духьну, 234 дюшюш гьисабназ гъадагъна. Му цифра артухъ шула», – къайд гъапIну дугъу.
Зелимхан Уьмариевди мялум гъапIганси, аьзарлу духьнайидарикан шубубпи пай мектебдиз ва бицIидарин багъариз гъягъюрайи бицIидар ву. Эгер аьтрафарикан улхуруш, аьзарлу гъахьидарикан 60% дюшюшар Мягьячгъала шагьриъ гьисабназ гъадагъна. Кьюбпи йишв’ин Хасавюрт шагьур ал. Са-саб, кью-кьюб дюшюш саки 20 муниципальный образованйириъра гьисабназ гъадагъна.
Роспотребнадзорин кIулиъ айири уьзур ачмиш гъабхьи йишвариъ чарасуз вуди дурхну ккуни, тIягъюн йибкIру профилактикайин серенжемариканра гъапнийи.
«КIамкIарин уьзур ачмиш гъабхьи сабпи шубуб суткайин арайиъ аьзарлуйихъди хъади гъахьидариз варидариз прививкйир дапIну ккунду. Хъа прививка апIуз аьксивал улупурайидар, чпикантина имбударикна уьзур тарарабгъуз, ярхла апIуб лазим ву. Уьзрин асас лишнарикан саб гьадму вуки, аьзарлу гъахьи бицIирин бедендиъ думу уьзрин клинический лишнар ачмиш хьайиз, дугъу 3-4 йигъ улихьна чакантина жарадарикнара уьзур тарабгъуз гъитру. Ва ухьу бицIир аьзарлу духьнайивалин гъавриъ хьайиз, дугъу чан багарихь хьайи 10-15 бицIир аьзарлу апIуру. Гьаддиз фукьан ухди привика гъапIиш, гьадмукьан ужу ву, диди бицIирин иммунитет гужал апIуру. КIамкIар – хатIалу ва варитIан ухди сар-сарикна тарабгъру уьзур ву. Прививкайиз къадагъа мапIанай. Сагъ’валихъ хъубкьруб фукIара адар», — аьлава гъапIнийи З. Уьмариевди.
