Наргиз Гюлечова
11-пи июли Дагъустандин Глава ЕГЭ-йиан заан баллар гъадагъу республикайин выпускникарихъди «Урусат – йиз тарих» тарихнан паркдин конференцйир гъахру залиъ гюрюшмиш гъахьну. Сергей Меликов республикайин кIулиъ дийигъхъанмина, гьар йисан ЕГЭ-йиан 100 балл гъадагъу баяр-шубариз 100 агъзур манат пул тувувал аьдатнаъ абхъна. Главайихъди вуйи гъюрюшназ ЕГЭ 100 баллиз ва гьацира кьюб вая артухъ имтигьянар 95-дилан 99 баллиз туву ва жюрбежюр конкурсариъ гъалиб гъахьи 70 касдиз ва дурарин мялимариз теклиф дапIнайи.
Къайд апIуб лазим вуки, цци республикайиъ 49 касди 100 баллиз ЕГЭ тувну. Гьадрарикан 17 касди химияйиан, 16 касди урус чIалнаан, 5 касди – литературайиан, 3 касди – обществознаниейиан, кью-кьюр касди – биологияйиан, профильный математикайиан, физикайиан ва тарих предметдиан. Хъа 22 выпускникди кьюб вая артухъ предметариан вуйи имтигьнар 95-99 баллиз тувна.
Гюрюшнаъ Сергей Меликовди уч духьнайи баяр-шубар ужудар натижйир гъадагъбахъди тебрик гъапIнийи. Дагъустандин кIулиъ айири къайд гъапIганси, республикайиъ заан аьгъювалар гъадагъуз ккуни бажаранлу баяр-шубар фукьан вушра а, ва 11-пи классдизкьан урхуб давам апIурайи баяр-шубарин кьадар йислан-йисаз артухъра шула. Цци республикайиъ 3 выпускникди 2 предметдиан вуйи ЕГЭ 100 баллиз тувну. Магьа дурарин ччвурар – Эльмира Аьлибегова, Аьбдулкьадир Бягьяндов ва Арслан ТIажибов. Хъа ПатIимат Саадуевайи кIуруш, 3 предметдиан вуйи имтигьнариан сабишв’инди 295 балл гъадагъну. Сач республикайин тарихдиъ сабпи ражари вуди кьюб предметдиан 100 балл гъадабгъур Табасаран райондин ТIаттил гъулан кьялан мектеб ккудубкIу Гьаваханум Мягьямедова вуйи.
«Учу бажаранлу баяр-шубариз асас фикир тувуз учу чалишмиш шулача. Дурариз абйир-бабарин, мялимарин кюмекси, гьюкуматдин терефнаанра кюмек лазим вуйивалинра гъавриъ ача.
Мидиз улихьна йисариси дарди, цци ЕГЭ-йиан кьюб вая артухъ предметариан 95-99 баллар гъадагъу баяр шубаризра, ЕГЭ-йиан 100 балл гъадабгъдаризси, 100 агъзур манат багъиш апIура. Гьаму йисан дицдар 22 выпускник ахьуз», – гъапну Сергей Меликовди.
Серенжемдин аьхириъ Меликовди уч духьнайи баяр-шубариз ва дурар ЕГЭ-йихьна гьязур гъапIу мялимариз 100 агъзур манатдин сертификатар тувнийи ва выпускникарикан гележегдин уьмриъ заан пишекарвалин эйсйир хьуб ккун гъапIнийи.
