Гьаму йигъари Урусатдин Федерацияйин ватандашари Конституцияйиъ таърайи дигиш’валарин гьякьнаан чпин фикрар ачухъ апIура. Асас къанундиъ тIаърайи дигиш’валарикан саб – Урусатдин культурайин гизаф миллетарикан ибарат вуйи халкьдин тафавутлувал ва ирс гьюкуматдин терефнаан уьбхювал ву.

 

Гьаму маддайин гьякьнаан чан фикрар ачухъ апIувал ккун апIури, узу Дагъустан Республикайин культурайин министерствойин республикайин халкьдин яратмишарин хулан халкьдин яратмишарин отделин заведиш Минажат Мурадовайихьна илтIикIунза.

Дагъустан Республикайин культурайин цирклиъ лихури, Минажат Мурадова ихь региондиъ культурайин артмиш’валихъди аьлакьалу месэлйирин ужуди гъавриъ а. Дугъу гьамци кIура:

«Гьелбетда, узу ва культурайин цирклиъ лихурайи йиз гъарашугъари Конституцияйиъ тIаърайи му дигиш’валин тереф уьбхюрача, фицики, культурайин цирклиз гьюкуматдин терефнаан кюмек лазим ву.

Ихь республикайин культура жюрбежюруб ву. Ихь Дагъустан культурайин тарихи ирс адарди фикризкьан гъадабгъуз шулдар. Культура – му ихь кьувват, девлет, ихь сабвал ва дамагъ ву.

Аьхиримжи йисари ихь уьлкейиъ, республикайиъ «Культура» милли проект уьмриз кечирмиш апIура. Шагьрариъ ва районариъ аьдати культурайин центрар ва клубар, рягьятвал гъадабгъру ва азад вахт адапIру хулар дивна. Йиз фикриинди, Дагъустандин миллетарин культура – му Урусатдин девлетлу культурайин ирснан саб пай ву.

Ихь уьлкейин Конституцияйиъ гьаму цирклиз гьюкуматдин терефнаан кюмек тувруваликан къайд апIувал лазим ву. Культурайин артмиш’вал сар касдикан ясана региондин кIулиъ айирикан асиллу вуди ккундар. Культурайиз гьарган гьюкуматдин терефнаан кюмек лазим ву. Ихь республикайиъ кюгьне культурайин гизаф ядиграр а. Дурар даргъура, ядиграр рас дапIну ккунду. Ухьу гележегдин наслар тарихдин ва культурайин ирс адарди гъитну ккундар. Хъа гьаму ляхнариз гьюкуматдин терефнаан кюмек чарасуз лазим ву»,

– къайд гъапIну Минажат Рягьимовнайи.