Аьхиримжи вахтна Дагъустандин шагьрариъ яшамиш шулайи вари халкьарин жигьилариси, табасаран жигьиларира шиърар ва жара эсерар урус чIалниинди дикIура. Гьадрарикан сар Дербент шагьриъ яшамиш шулайи, 12-пи нумрайин мектебдин 10-пи классдиъ урхурайи Руслан Маллаевра ву. Думу, чан багъри мектебдиъси, шагьриъра гъягъру серенжемариъ жанлуди иштирак шула.
Жвуван дарсарихьна, вазифйирихьна жавабдарвалиинди янашмиш шули, му жигьили дарсарра ужудар кьиматариз урхура ва чан азад вахт давди гьадрапIуз чалишмиш шула. Аьхиримжи вахтна Дербент ва Дагъустандин Огни шагьрариъ кIули гъушу Эльмира Аьшурбеговайин шиърариз концертариъ шаири таржума гъапIу, Расул Гьямзатовдин гафариз вуйи «Кьарнийир» кIуру табасаран чIалниинди мяълиси, жюрбежюр чIалариинди мяълийир апIурайи Руслан тамашичйириз гизаф кьабул гъахьну.
Гьацира му жигьили шагьрин ДДЮТ-диъ гъягъру серенжемарра кIули гъахури шулу.
«Узу йиз сабпи шиир 14 йисаъ айиган гъибикIунза. Думу арайиз гъювалин себеб дустран вафасузвал вуйи. Шиир йиз жара дустариз улупнийза. Дурариз думу кьабул гъабхьнийи, ва гьадмуган узу шиърар дикIувал давам апIуз къарар адабгъунза. Гъийин йигъаз 100-тIан артухъ шиърар дидикIназа», – кIура йиз сюгьбатчийи.
Русландин адаш Ислам Ккуми, хъа дада Эльмира – Яргъил гъулариан ву. Русландин яратмиш апIбариз, музыкайихьна вуйи маракьлувализ гизаф фикир туврайир дугъан баб Наима ву.
«Узу поэзияйихъ, актёрвалихъ гизаф юкIв хъайир вуза. Гьар вахтна Русландин артмиш`вализ фикир туври шулза. Сягьнайиин йиз худул али вахтна узу бахтаварси гьиргърузуз», – кIура Наимайи.
Гележегдиъ программист хьуз ният дапIнайи Русландин юкIв математика, физика предметари чпихьна зигура. Шиърар дикIуз хъюгъиган, литературайизра фикир тувуз хъюгъю жигьилин шиърариз Сергей Есениндин бикIбари тясир апIурайивалин гъавриъ ахъру.
«Сергей Есениндинси, узуз Эдуард Асадовдин, Владимир Высоцкийдин яратмишар гизаф кьабулди вузуз. Узуз дурарин шиърарра кIваъланди аьгъязуз. 5-пи классдихъан мина сягьнайиин алза. Узуз музыка киври гъахьи Надежда Аьбдуллаевнайи, гьар вахтна узуз фикир туври, мяълийирихьна вуйи маракьлувал дубгуз гъитрадар», – давам апIура Русланди.
Табасаран чIалниинди мяълийир апIурашра, гьелелиг жигьилихьан чан багъри чIалниинди шиърар дикIуз шуладар. Анжагъ Русландин чIал ужуди дубгъуз ва багъри чIалниинди шиърар дикIуз кьаст а. Ичв дикъатназ жигьил шаирин Эльмира Аьшурбеговайи таржума гъапIу шиир туврача. Дупну ккундуки, Русландин шиърар урхруган, дугъу уьмрин ярхи рякъ ккадапIубси гьибгъру.
