Гьаму йигъари Табасаран райондин главайи райондин образованиейин идарйир рас апIбан ва налогар уч апIбан месэлйириз бахш дапIнайи совещание кIули гъабхну.
Совещаниейин иштиракчйири сифте улихьна ражари гъабхьи совещаниейин протоколин табшуругъар гьял гъапIну. Думуган 1-пи июлиз гъулан поселенйириз сад йисаз улупнайи налогар уч апIбан кьадарнакан 50% тамам дапIну ккуниваликан дупнайи. Думу месэла 51%-тIан гьял дапIнадайи. 2-пи кварталин натижйирииндира лап кьяляхъ гъузрайи поселенйир а. Дурар «ТIивак сельсовет», «Сиртич гъул» ва «ТIюрягъ сельсовет» поселенйир ву.
Мягьямед Къурбановди къайд гъапIганси, уч гъапIу налогарин натиж-йириинди райондин артмиш’вал тяйин апIура. Гележегдиъ транспортдин налогарилан уч гъабхьи пулихъ гъуларин рякъяр рас апIбан йикьрар гъийитIну.
Райондин гъуларин поселенйирин «Гъуларин аьтрафарин сатIиди вуйи артмиш’валин гьякьнаан» федералин программайиъ иштирак хьуз аьрз-йир кьабул апIури, райондин главайи къайд гъапIганси, асас вуди гъулариъ варитIан учIру месэлйир аьгъю дапIну ва дурар гьял апIру рякъяр дагну ккунду.
Совещаниейин иштиракчйири муниципалитетдиъ образованиейин артмиш’валин месэлйирра гьял гъапIнийи.
Табасаран райондин образованиейин управлениейин начальник Аьбдусалам Гьясановдин гафаринди, Дагъустандиъ «100 мектеб» проектдиъ иштирак’вал апIуз туву аьрзйиригъян конкурсдин шартIариинди 136 мектеб гъядягъну. Табасаран райондиан рес-публикайин проектдиъ иштирак хьуз 20-тIан артухъ мектебари документар хътаъну. Амма жюрбежюр себебариан дурарикан 18 мектебтIан гъядягъюндар. 2018-пи йисан думу проектдиъ Табасаран райондиан анжагъ 1 мектеб, гъубшу йисан – 12 мектеб иштирак гъахьну.
«Табасаран райондин лап гъагъи гьялнаъ айивалиан проектдиъ иштирак хьуз даршлу мектебар ктарди, саки вари имбу мектебарин дараматариъ расвалин ляхнар гъахура. Райондиъ 12 гъулан мектебар лап гъагъи гьялнаъ а. Дурарикан Хюрикк ва Туриф гъулариъ багахь гележегдиъ цIийи мектебар дивуз планламиш дапIна. «100 мектеб» проектдиъ иштирак хьуз ккуни мектебар райондиъ хъана гъузра. Конкурсдиъ асас фикир мектебдин расвалин ляхнарин чарасузвализ, ученикарин кьадарназ тувра. Конкурсдиъ гъалиб гъахьи мектебариз республикайин бюджетдианси, инвесторарин кюмекра лазим ву. Учу проектдин конкурсдин комиссияйи гъядягъю мектебар ерлешмиш духьнайи гъулан агьалйирихьна, улихьна йисари думу мектеб ккудубкIу выпускникарихьна илтIикIурача. Гъавриъ айи инсанари кюмекнан хил гьачIабккура. Варидариз чухсагъул пуз ккундузуз. Кьялан гьисабариинди, саб мектеб рас апIбан ляхнариз 2 миллионна гьацI – 3 миллион манат харжар удучIвуру», – гъапнийи ич сюгьбатнаъ Аьбдусалам Гьясановди.
