Дагъустандиъ «Земский духтир» ва «Земский мялим» проектар гьяракатнаъ ирчна.

 

 

Гъубшу гьяфтайиъ Дагъустандин глава Владимир Васильевди, региондин парламентдин депутатарин улихь удучIвну улхури, муниципалитетар заан пишекарвалин дережа айи кадрийирихъди тямин апIбаз диш дапIнайи проектар гьяракатнаъ ирчнайиваликан мялумат тувну.

Медицинайин гъуллугъчйир гьуркIри адрувалин месэла гьял апIбан бадали, гьяракатнаъ ипнайи «Земский духтир» проектдин артмиш’валикан улхури, Главайи къайд гъапIганси, 2017-пи йисан 275 духтир, 2018-пи йисан – 202 духтир, 2019-пи йисан – 224 духтир ляхнарихъди тямин гъапIну.

«Земский мялим» проектдикан улхуруш, думу 2019-пи йисан республикайин парламентдин иштирак’валра ади гьяракатнаъ ипуз хъюгънийи. Му проект Дагъустандин гъулариъ мялимар гьуркIри адрувалин месэла гьял апIуз диш дапIнайиб ву. Проектдин дахилнаъди 50 мялимди республикайин бюджетдиан гьарури са-саб миллион манат гъадабгъну ва гъулариъ мялимвалин ляхниин машгъул гъахьну.

«Гъубшу йисан му проектдиз республикайин бюджетдиан 50 миллион манат жара гъапIнийхьа. Гъи думу метлебариз 140 миллион манат жара апIуз мумкинвал ахьуз, фицики федералин бюджетди ихь теклифнан тереф гъюбхну ва ухьуз 80 миллион манаттIан артухъ пул жара гъапIну. Му ляхин ухьуз лап важиблу вухьуз, саспидар аьхю шагьрарин больницйириз, тмундар – медицинайин вуздин кьяляхъ багъри гъулаъ лихуз гъягъюра. Кьюбиб проектариин вуйи ляхин багахь гележегдиъра дебккидархьа», – аьлава гъапIнийи Владимир Васильевди.