Июлин вазлин 25-пи йигъан Дагъустан Республикайин Глава Владимир Васильевди, хайлин йисари намуслувалиинди зегьмет зигбаз лигну, Дагъустандин заан гъуллугъариъ айи сасдар гьякимариз республикайин дережайин гьюкуматдин заан пешкешар тувбан гьякьнаан вуйи къарарикк къул гъизигну.

РД-йин Глава Владимир Васильевди республикайин сагъламвал уьбхбан министр Жамалудин Гьяжиибрагьимов «Дагъустан Республикайин яшайишдинна экономикайин артмиш’валик баркаллу пай кивбаз лигну» медаль тувбиинди лишанлу гъапIну.

Дагъустандин юстицияйин министр Къазимягьямед Сефикъурбановдиз Дагъустан Республикайин Гьюрматнан грамота тувну.

Региондин Конституцияйин Йигъ (26-пи июль) къайд апIурайиган, коронавирусдин инфекцияйин тIягъвнин вахтна чпин сагъ’вализ айи хатIайикан фикрар дарапIди, ляхниъ тафавутлу гъахьи медицинайин гъуллугъчйиризра гьюкуматдин пешкешар тувну.

Региондин Глава Владимир Васильевдин къарариинди Табасаран райондин ЦРБ-йин реанимацияйин отделениейин заведующий Сабир Аьзизов «Дагъустан Республикайин лайикьлу духтир» кIуру ччвур тувбиинди лишанлу гъапIну.

«Табасарандин нурар» газатдин коллективди ихь милли газатдиъ гьюкуматдин пешкешариз лайикьлу гъахьи ихь ватанагьлийири гъабхурайи баркаллу ляхникан швнуб-саб ражари макьалйир чап гъапIнийи. Гъи дурар ихь халкьдин дамагъ, ихь кьувват, ихь сурат улупурайи игитар ву. Учу, гъи дурар заан ччвурар ва пешкешар тувбахъди тебрик апIури, гележегдиъра дурари хъана заан хъуркьувалар гъадагърувалик ва жвуван республика ва халкь бадали намуслу зегьмет зигувал давам апIувалик миж киврача.

«Табасарандин нурар» газатдин коллектив