Роспотребнадзорин РД-йиъ айи Управлениейи туврайи мялуматариинди, сентябрин 3-пи йигъан гвачIниндиз вуйи улупбариз асас вуди, Дагъустандиъ коронавирус тарабгъувалин аьгьвалат пис шулайиваликан пуз шулу.

 

 

Аьхиримжи улупбар гьамцдар ву:

– коронавирусдиан аьзарлу духьнайидарин уьмуми кьадар 11219 кас ву, аьхиримжи йи-шван ва йигъан 74 кас аьзарлу духьна;

– республикайиъ думу уьзур кубчIвну сагъ гъахьидарин кьадар 9786 кас ву;

– коронавирус уьзур кайивал тасдикь дапIну, думу уьзриан вари 505 кас гъийихну;

– гьамусяаьт 2265 кас, аьзарлуйирихъди аьлакьайиъ хьувализ дилигну, хулариъ дусна.

Сентябрин садпи йигъан Дагъустандин Глава Владимир Васильев республикайин агьалйирихьна илтIикIну. Дугъу къайд гъапIганси, улихьна йигъари кIули гъубшу Оперативный штабдин заседаниейиъ, республикайиъ аьзарлуйирин кьадар хъана артухъ шулайивализ дилигди, ижми къайдйир дер-ккуз гьялак гъахьундар. Лап багарихьди чвлин фаслихъди аьлакьалу вуди, ОРВИ-йин ва гриппдин вахтра улубкьиди, хъа коронавирусра ярхла дубшнадар.

Гьаддиз РД-йин Главайи къайд гъапIну: «Марццишнан къайдйир тамам апIувал чарасуз лазим ву. Гизафдар сумчрариъ, салмариъ уч шула. Духтрарин тIалабариз фикир туврадар. Шагьрин айитI машниин маска алидар лап цIиб ву. Полицияйин гъуллугъчйирилан савайи, гьич сар касдира къайда уьбхюрадар. Штабдин заседаниейиъ йикьрар гъапIунча, къайда ижми апIидархьа, хъа Роспотребнадзорин тIалабар тамам апIувализ артухъ фикир тувдихьа: транспортдиъ инсанарин арайиъ лап цIибтIан манзил адар. Маска алабхьувал чарасуз лазим ву».

Гьюрматлу ватанагьлийир! Учву ва ичв багахьлуйир уьрхяй. Роспотребнадзорин тIалабар тамам апIинай. Кми-кмиди хилар жикIай, машниин маска алабхьай.