Вари дюн’яйиъ коронавирус тарабгънайивалихъди аьлакьалу вуди пандемия мялум гъапIнийи. Инсанарикан лазим дарди хулариан удудучIвувал ккун апIури, Роспотребнадзори ва сагъламвал уьбхбан министерствойи тIалабар дивнийи.

 

Гьаддихъди аьлакьалу вуди 21-пи мартдиъ Урусатдиъ «Ухьу сатIиди» кIуру Вариурусатдин акция гьяракатнаъ ипнийи. Акцияйи коронавирусдин тIягъвнин вахтна жара инсанариз кюмек тувуз ккуни инсанар сатIи гъапIнийи. Проектдин тешкилатчйир Вариурусатдин халкьдин фронт, «Волонтерар – медицинайин гъуллугъчйир» Вариурусатдин жямяаьтлугъ гьяракат, волонтерарин центрарин Ассоциация ва DOBRO платформа вуйи. «Ухьу сатIиди» кIуру сайтдиъ гьарсар касдихьан чан кюмек тувуз шулу. Акцияйиъ 97 агъзуртIан артухъ инсанар иштирак шула. Волонтерарин кьялан яш – 25-40 йис ву.

Урусатдин вари 85 регионариъ яшлуйириз ва кюмек лазим вуйи агьалйириз кюмек тувру штабари ляхин апIура. Волонтерари кюмек лазим вуйи ватандашарин гъатариз ипIру-убхъру сурсатар, дармнар, чарасуз лазим вуйи алатар масу гъадагъура ва хулариз хура. ТIягьвнин вахтна волонтерари ватандашарин 260 агъзур тIалаб тамам гъапIну.

Ихь республикайиъра кюмек тувбан ляхин яркьуди гьатIабццна.

Вари Урусатдиъ тешкил дапIнайи «Ухьу сатIиди» акцияйиъ гъубху ляхник лайикьлу пай кивбаз лигну, РД-йин сагъламвал уьбхбан министрин заместитель Раиса Шагьсиновайиз медаль тувну.

Раиса Наримановна, уву агьалйир бадали зигурайи зегьмет гьюкуматдин терефнаан медаль тувбиинди лишанлу апIувал кIваантIан теб-рик апIурача. Гележегдиъра заан хъуркьувалар ишривуз, инсанари баркаллагь кIуруси ляхин апIуз сагъ’вал тувривуз.