Улихьна йигъари РД-йин образованиейинна илимдин министрин заместитель Альбина Аруховайи къайд гъапIганси, Дагъустандиъ 900-дихьна мектебдиз улихьна вуйи образованиейин идарйир а.
Республикайин мектебдиз улихьна вуйи образование тувбан гъурулушди гъабхурайи ляхнин натижйириинди, варитIан гъагъи аьгьвалат Дагъустандин Огни, Мягьячгъала, Хасавюрт шагьрариъ ва Къизилюрт, Акъуша, Къяйтагъ, Къизлар муниципалин районариъ ара-йиз дуфна. Гьаддихъди аьлакьалу вуди республикайин образованиейинна илимдин Министерствойи, сабпи нубатнаъди бицIидарин багъар тикмиш апIбан бадали, гьаму кудухнайи муниципалитетар улупну.
Къайд апIуб лазим вуки, зиихъ улупнайи цифрайик Хив райондин бицIидарин 9 багъра ка. Узу, мектебдиз улихьна вуйи образованиейин идарйирин аьгьвалатнакан ктибтуб ккун апIури, Хив райондин образованиейин отделин мектебдиз улихьна вуйи образованиейин гюзчивал ва жавабдарвал гъабхурайи методист Наима Аьлимягьямедовайихъди сюгьбат гъубхнийза.
«Ухьу гъапиганси, Хив райондиъ бицIидарин 9 багъ а. Дурар Хив (кьюб багъ – 140 ва 100 бицIир айидар), Гъвандикк (20 бицIир, 1 десте), Мажвгул (40 бицIир, кьюб десте), Асккан Яракк (40 бицIир, 2 десте), АрхъитI (45 бицIир, шубуб десте), Ляхла (15 бицIир, саб десте), ЗахитI (55 бицIир, шубуб десте), ЦIийи Фрюгъ (66 бицIир, юкьуб десте) ерлешмиш духьна. Ихь уьлкейиъ коронавирусдин тIягъюн тарабгъхъан мина, яна гъябгъюрайи йисан март вазлихъан мина, райондин вари бицIидарин багъар хъяркьну. Гьелелиг дурар арццуз ихтияр тувнадар. Дагъустандин бязи районариъ яваш-явашди багъар арццра. Учура вари багъар гьязур дапIнача ва ихтияр тувайиз ккилигурача. Гьамусяаьт райондиъ бицIидарин багъариз нубатнахъ 60-рихьна бицIидар дийигъна», – гъапну Наима Аьлимягьямедовайи.
Йиз сюгьбатчийин гафариинди, райондиъ варитIан ужуди ляхин апIурайи бицIидарин багъарикан саб Хив гъулан «Солнышко» кIуру багъ ву. Душваъ заведующийвал апIурайи, чан ляхин дериндиан аьгъю ва гъудуркьу пишекар Нарима Ремихановайи бицIидарин багъдиъ лихурайи вари 12 тербиячйирикан ва жара гъуллугъчйирикан ляхнихьна жавабдарвалиинди янашмиш хьувал ккун апIура. Хив райондин бицIидарин багъариъ хайлин йисари вафалуди зегьмет зигурайи тербиячйир Фаина Зиявудиновайин, Асият Гьюсейхановайин, (шиклиъ), Гюльнара Ремихановайин («Солнышко» багъ, Хив), Саижат Рамазановайин (ЗахитI), Фарида Шихялие-вайин (Гъвандикк), Румина Аьликберовайин (Хив) ва жарадарин ччвурар Наима Аьлимягьямедовайи дамагълуди ктухурайи.
«Хив райондин бицIидарин багъар материалин тяминвалин цирклиан кюмекназ ккилигура. Бязи багъариъ бицIидар деуз кусрийиркьан гьуркIну адар. Дидактикайин материалар ва бицIидари тамшир апIру уюнжагъар бязи заведующйири ва тербиячйири чпин дакьатарихъ масу гъадагъура. Мидланра гъайри, саспи бицIидарин багъар лап бицIи ужагъариъ арццнайидар ву. Мисалназ, Асккан Яракк гъулан бицIидарин багъ улихьдин совхоздин саб бицIи хулаъ ерлешмиш дубхьна. Ляхла гъулан бицIидарин багъра лап гъагъи гьялнаъ а.
Думу багъдиъ саб жюрейинра шартIар адар. Гъийин йигъан тербияч-йириз гьюкуматдин программйириинди ва проектариинди интерактивный доска ишлетмиш апIуз, компютерихъди ва деврин жара алатарихъди ляхин апIуз улупна. Хъа Хив райондиъ интерактивный доска анжагъ саб «Солнышко» бицIидарин багъдиътIан адар. Компьютерарихъдира вари багъар тямин дапIнадар. Гьаддиз гъийин тербиячйириз деврин тIалабариинди лихуз гъагъиди алабхъура. Амма, думу аьгьвалатназ дилигди, райондин бицIидарин багъарин тербиячйир гьар йисан «ВаритIан ужур тербиячи», «ВаритIан ужуб багъ» райондин ва республикайин конкурсариъ иштирак шула», – къайд гъапIну Наима Аьлимягьямедовайи.
БицIидарин багъар арццувализ, тербиячйирси, абйир-бабарра, бицIидарра ккилигура. Амма коронавирусдихъди аьлакьалу аьгьвалат гьелелиг гъагъиди ими. Гьаддиз Хив райондиъ бицIидарин багъар фила арццруш, гьич сар касдихьанра жаваб тувуз шуладар.
