БицIидарин багъдин тербиячи – му пише дар, уьмрин дих, гьевес, ачухъ гьиссар, бицIидар ккунивал ву. Ужур тербиячийи бицIидарихъди гьавайиди вахт адапIудар, дугъу бицIидарихъди дурарин уьмрин саб пай гьапIра. Адашдина дадайи чпин веледар гвачIниан хябяхъдиз саб терефнаанра багахьлу дару дишагьлийихъди гъитру. Дурар, чпин велед гюзчиваликк ккайивалихъди сабси, думу вижнасуз дару мани хилариз тувнайивалиинра умудлу ву.

 

Гъийин деврин тербиячи фицир духьну ккунду? БицIидар аьхю аьшкьниинди багъдиз гъюбан бадали, тербиячийи фициб ляхин дубхну ккунду? Гьаму ва жара суалар узу Хив райондин «2020-пи йисан варитIан ужур тербиячи» конкурсдин гъалибчи, Хив гъулан «Солнышко» бицIидарин багъдин тербиячи Асият Гьюсейхановайиз тувнийза.

«Солнышко» бицIидарин багъдиъ лихури, Асият Гьюсейхановайин 26 йис шула. Дугъаз бицIидарин багъдин жара гъуллугъчйирин, абйир-бабарин терефнаан аьхю гьюрмат а, бицIидаризра думу гизаф ккунду. Гьамусяаьт коронавирусдихъди аьлакьалу вуди райондин бицIидарин багъар хъяркьна. Амма Асият Акимовнайиз бицIидари сикин дарди зенгар апIуру, дугъахьна хулаз хялижвди гъягъюру.

«Тербиячи – бицIидарин аьхю уьмриз раккнар арццрайи сюгьюрчиси гьисаб ву. Тербиячийин аьгъюваларикан ва дугъаз айи тажрубайикан, бажаранваликан чав тербияламиш апIурайи бицIидарин мумкинвалар асиллу шула. Фунуб вахтнара тербиячи, бицIидарихъди дурарин уьмрин рякъюъ учIври, дюн’яйиз бицIирин улариинди лигури, дугъахъди сабси мюгьтал ва гьяйран шули, бицIир саб фициб вушра ляхниин вая тамашийиин машгъул духьнайи вахтна, дугъаз манигъ’вал дарапIри, кюмек лазим вуйиган, барабар кас адрурсир кюмекчи духьну, гьаммишан дугъаз маракьлур ва думу фицир вушра кьабул апIрур духьну ккунду. Тербиячи – аьхю жавабдарвал ккун апIурайи пише ву. БицIидарихъди саб гаф абгуз даршлу кас му пишейиз гъюб дюз дар. Гьарсар бицIир – текрар даршлу гъизил, уьмарат ву. Тербиячийин хилиъ дугъан уьмур ва гьиссарин кьувват а. Учу, тербиячйир, дурар уьрхюз, артмиш апIуз, дурарин байвахтнан уьмур мяналуб ва шадуб апIуз буржлу вуча. Байвахтнан уьмрикан дурарин гележегдин рякъ асиллу шула», – кIура Асият Гьюсейхановайи.

БицIидарин багъдиъ лихурайи йисари Асиятди йислан-йисаз чан пишекарвал за апIури, чан ляхнин тажрубайиъ педагогвалин илмариъ гъадагъурайи аьгъювалар ишлетмиш апIури гъахьну. Асиятди гьадму саб вахтна ДГУ-йин дагъустандин филологияйин факультет ккудубкIнийи.

«Фунур касдира гьаммишан чан пишекарвал за апIури, деврихъди гъягъюри, цIийи технологйириан аьгъювалар гъадагъури ва бицIидариз кюгьне аьдатарра улупури ляхин дапIну ккунду. Деврин бицIидар маракьлу апIбан бадали, тербиячийиз гизаф цирклариан аьгъювалар лазим шула. Яна деврин тербиячи психологра, артистра, дустра, мялимра, ватанперверра, гьюрматлу касра духьну ккунду. Сабурлуди, хайир ккунди, абйир-бабарихьна гьюрматлуди янашмиш шули, дурарин фикрарихъ ва теклифарихъ хъпехъури гъахьиш, фунур тербиячийира чан ад за апIуру», – къайд гъапIну Асият Акимовнайи.

«ВаритIан ужур тербиячи» конкурсдиз дугъу чан бицIидарихъди Эбелцан машквракан милли сягьна дивну ва математикайиан интерактивный доскайихъ дарс кивну. Дугъан дарсариз райондин комиссияйи варитIан заан кьиматар дивнийи.

Асият чан хал-хизандихъди Хив гъулаъ яшамиш шула. Дугъаз 4 риш а. Дугъан шубур шуру мектеб гъизилин медалариз ккудубкIну. Аьхюну шуру, ДГУ-йин экономикайин факультет уьру дипломдиз ккудубкIну, магистратурайиъ урхувал давам апIура. Дугъан кьяляхъ хъайи кьюрпи шуру Мягьячгъала шагьриъ медицинайин училищейиъра урхура. Юкьурпи риш мектебдиъ а.

Асиятди ич сюгьбатнан аьхириъ гъапиганси, гьарсар бицIир хъуркьуваларихъна гъюбан бадали, сабпи нубатнаъ дугъахьди учв ккунивал гьисс апIуз гъитну ккунду.