Гьаму йигъари Гьюкуматдин табасаран драмайин театр Мягьячгъала шагьриъ Поэзияйин театрин дараматдиъ кIули гъубшу Республикайин «Дагъустан адлу гъапIдар» III-пи фестиваль-конкурсдиъ иштирак гъабхьну.
Фестивалин жюрийин вакиларин улихьна театри Ю.Базутаевдин пьессайиан дивнайи «Гъала» спектакль адабгънийи (сценарийдин автор Аь. Аьбдурягьманов ву).
Фестиваль-конкурсдиъ республикайин вари гьюкуматдин театрари чпин ужударсдар сягьнйир улупнийи. Сентябрин аьхиримжи йигъан конкурсдин натижйир гъивну. Фестиваль хъябкьру серенжемариъ РД-йин культурайин министр Зарема Бутаева, театрин критикар, театрин деятеларин Союздин вакилар, театрарин ляхин кIули гъабхурайидар, машгьур актерар, режиссерар иштирак гъахьнийи.
Зарема Бутаевайи, фестивалин тешкилатчйириз нубатнан фестиваль гъабхувализ чухсагъул мялум апIури, республикайин яратмиш апIбан коллективариз дидин мяналуваликан, тажрубайихъди таниш хьувалин натижйирин хайирнакан, театрарин бажаранлу ва гизаф дерин мяна айи сягьнйир ашкар апIуз кюмек туврайиваликан гъапну.
Фестиваль-конкурсдин жюрийин къарариинди, РД-йин лайикьлу артистка Гюлнисе Агъаевайи гъабхурайи Шербандин роль фестивалиъ варитIан дерин устадвалиинди уйнамиш гъапIубси, варитIан ужуб рольси гьисаб гъапIну. РД-йин театрарин деятеларин Союзди ихь бажаранлу артистка Москвайиз «Гъизилин маска» фестивалин спектаклариз лигуз командировкайиз гьаъбан къарар адабгъбиинди лишанлу гъапIну.
КIваин апIуз ккундучуз, табасаран театри му фестивалиъ 2016-пи йисанра пешкешнан йишв гъибиснийи.
Фестивалин кьяляхъ Гьюкуматдин табасаран драмтеатрин директор Аьлимурад Аьлимурадовди учуз туву мялуматариинди, «Дагъустан адлу гъапIдар» фестиваль-конкурс республикайиъ 2016-пи йисхъан мина гьар кьюд йисак гъабхура.
«Республикайин гьюкуматдин 12 театрин арайиъ «Дишагьлийин варитIан ужуб роль» номинацияйиъ заан йишваз лайикьлу хьувал – му аьхю хъуркьувал ву. Спектаклин аьхириъ Гюльнисейи сягьнайиин чан ролин гафар кIуруган, дугъан кIван гьарай ебхьуйи. Актрисайин устадвалиин вари жюри мюгьтал гъахьнийи. Думу гьадмукьан деринди гьадму ролиъ учIвраки, чав роль дубхну ккудубкIбахъан, хайлин вахтназ сягьнайин кьяляхъ ишури гъахьнийи. Артистдин устадвалра гьадди улупура. «Дагъустан адлу гъапIдар» фестивали халкьдин писателар ва шаирар, милли драматургия уьбхюз ва артмиш апIуз кюмек тувра. Мидланра гъайри, фестивали актерариз, режиссерариз сар-сарин бажаранвалихъди, устадвалихъди, тажрубайихъди таниш хьуз мумкинвал тувра. РД-йин культурайин Министерствойиан гьарсаб театриз гьар кьюд йисак гьадму саб вахтна Дагъустан адлу апIури гъахьи кюгьне шаирарин, писателарин яратмишариан сягьна дивувал табшурмиш дапIна. Цийин фестивалихьна дериндиан гьязур хьуз саб театризра мумкинвал гъабхьундайи, фицики гьюкуматди вари уьлкейиъ манзилнаъди лихбан къарар кьабул дапIнайи», — аьлава гъапIну Аьлимурад Аьлимурадовди.
«Табасарандин нурар» газатдин коллективди Гюльнисе Агъаева гъазанмиш гъапIу фаьхю хъуркъувалихъди тебрик апIура. Дугъаз ва табасаран театрин вари коллективдиз гележегдиъ хъана аьхю хъуркьувалар ккун апIура. Учву уйнамиш апIурайи гьарсаб роль гележегдин актервалин пишекар рякъюз кьувват тувру гам, тамашачйирин кIван гьевес ачухъ апIру ялав ибшри.
