Ярса гъулан администрацияйин дахилнаъ кьюб гъул а – Ярса ва Зиль. Агьалйирин кьадар 3200 кас (600 хизан) ву.
Улихьна йигъари Табасаран райондиъ айи ич мухбир Ражаб Нуров Ярсарин гъулан советдин глава Аьбдуллагь Аьбдуллаевдихъди гюрюшмиш гъахьну ва дугъахъди ляхниъ алахьурайи читин месэлйирикан, гележегдиз вуйи планарикан сюгьбат гъубхну. Дурарин арайиъ гъабхьи сюгьбат жикъиди исихъ чап апIурача.
Аьбдуллагь Аьбдулгьюсеевич Аьбдуллаев 1970-пи йисан 12-пи апрелиъ Ярса гъулаъ бабкан гъахьну. 1986-пи йисан Ярсарин кьялан мектеб ккудубкIну, жигьил Ростовдиъ айи Рукьан рякъя-рин институтдин ППС-дин факультетдик урхуз кучIвру ва 1993-пи йисан думу хъуркьувалиинди ккудубкIуру. 1998-2003-пи йисарим Мягьячгъала шагьриъ Дагъустандин гъулан мяишатдин академияйин экономикайин факультетдиъ сабсан пишейин сагьиб шулу.
Аьбдуллагь Аьбдуллаевди 2019-пи йисан 17-пи июндихъан мина Ярса гъулан советдин администрацияйиз регьбервал тувра. Гьаму муддатнаъ дугъу жямяаьтдиз чарасуз лазим вуйи саб хайлин ляхнарра тамам дапIна, советдин агаьлйирин уьмрин дережа за апIуз чарйирра зигура.
– Аьбдуллагь Аьбдулгьюсеевич, Ярса гъулан советдин жилариин швнуб социалин идарйир ерлешмиш духьна?
– «Ярса гъулан совет» СП-йин аьтрафариин кьюб мектеб, кьюб культурайин хал, саб ФАП, кьюб библиотека, саб спортдин майдан, саб бицIидарин багъ ерлешмиш духьна.
– Гъулан советдиз дахил шулайи гъуларин вакилар асас вуди фицдар ляхнариин машгъул ву?
– Ярсарин гъул Табасаран райондин кюгьне гъуларикан саб ву, ва гъуландарин зегьметнан аьдатарин тарихра ярхиб ву.
Гизафси ярсар тIумтIин багълариъ лихури шулу.Гъулан советдиз дахил шулайи гъуларин аьхюну пай инсанари мал-къара уьбхюра, багълар-бахчйириъ зегьмет зигура, ляхин адру касар жара йишвариз лихуз гъягъюра.
– Гъулан поселениейин аьтрафариин ерлешмиш духьнайи идарйирин гьял фициб ву, дурари апIурайи ляхниканра сацIиб ктибтуб ккун апIураза.
– Гъулан поселениейиъ айи идарйирикан улхуруш, мушваъ 2019-пи йисан Ярсарин кьялан мектеб лап бинайиан рас гъапIну, хъа 2020-пи йисан Зил’арин мектебдиъра лап ужуб ерийин расвалин ляхнар кIули духна. Мектебдин айитIишварра, классдин ужагъарра лап утканди ккабалгна. Мектеб цIийи дережайиинди либхура.
Культурайин хуларикан хабар гъадабгъиш, Ярса гъуланра Зил’аринра культурайин хулариъ лихурайи гъуллугъчйири чпин ляхин хъайи-хъайиганси тамам апIура. Культурайин хуларин айитI музеярра тешкил дапIна ва гьаммишан марццишин уьбхюра.
– Гъулаъ дапIну ккуни фицдар чарасуз ляхнар айичв?
– Ярса гъул’ан Зилна гъябгъру рякъ рас гъапIунча. Гьял дапIну ккуни читин месэлйирикан саб гьадму вуки, «Ярса гъулан советдиз» дахил шулайи багълариан тIумтIар уч апIура, амма дурар масу тувру йишв адар. 2019-пи йисан масу туву тIумтIарин пул гьеле гъира тувнадар. Арендаторарихъди йикьрар йитIуз шуладар, фицики «Сардаров» ГУП банкротдиз гъябгъюра.
Табасаран райондин вари гъулариъси, учузра зирзибил адабгъбан месэла гьял апIбаъ аьхю читинвалар алахьурачуз. Лазим вуйи йишварихь зирзибил уч апIру йишварра гьязур дапIнача, амма гьелелиг му месэла гьял апIуз удукьурадар.
– Фицдар цIийи проектариъ иштирак шулачва?
— Гъулан жямяаьтдин яшайиш ужу апIбан бадали, учу жюрбежюр цIийи проектариъ иштирак шулача. Гьадрарикан вуди «Ерли жягьтлувалар» ва «Марцци шид» кIуру проектар улупуз шулу. Гьадму проектариз асас вуди, Зил’арин кьялан мектебдиъ спортдин бицIи майдан тикмиш гъапIну. Гьацира Ярсарин ва Зил’арин гъуларин арайиъ спортдин цIийи майдан тикмиш апIбан проект уьмриз кечирмиш апIузра 2 200 000 манат жара дапIна. Гьамусяаьт гьаму ляхнар тамам апIру тешкилатдихъди йикьрар йитIбан серенжемар кIули гъягъюра. Гьацира «Марцци шид» кIуру проектдиинди Ярса ва Зил гъулариз 12 километр манзилнаъ шид зигуз 49 000 000 манат деебтна.
– Чухсагъул, Аьбдуллагь Аьбдулгьюсеевич. Ужудар ниятар кIулиз удучIврияв!
