Аьхиримжи йисари ихь республикайиъ жигьиларин месэлйириз артухъди фикир тувуз хъюгънашра, гьелелиг дурариз гизаф читинвалар алахьури ими. Шагьрариъра кмиди жигьиларихьан чпиз кьабул вуйи ляхин абгуз шуладар. Жигьилариз алахьурайи читинвалар ахтармиш апIбан бадали, узу Дербент шагьриъ бабкан гъахьи ва гьамусяаьт душваъ яшамиш шулайи Тамила Шамсудиновайихъди гюрюшмиш гъахьунза.
Тамила Сейдуллаевнайи кюгьне шагьрин 16-пи нумрайин мектебдиъ ужудар аьгъювалариинди кьялан образование гъадабгъну. Бухгалтерин пишейихъ юкIв хъайи шуру, шагьриъ айи техникумдин гъулан мяишатдин экономикайин факультетдик урхуз кучIвну, думу уьру дипломдиинди ккудубкIуру.
«Урхуб ккудубкIбалан кьяляхъ, узуз багъри шагьриъ ляхин гъибихъундайзуз. Коррупция айи республикайиъ узуз йиз кеспнан ляхин дибрихърувалин гъавриъ гъахьир Москвайиз гъушнийза ва 4 йисан парча убхру фабрикайиъ бухгалтерди гъилихнийза. Анжагъ, гьар вахтна кIулиъ багъри инсанар яшамиш шулайи шагьриз хътакбакан фикрар ади шуйиз»,
– гъапнийи Тамилайи.
Дербентдиз кьяляхъ хътакиган, Тамилайин улихь хъана ляхнихъди аьлакьалу месэла дийибгънийи. «Узуз йиз пишекарвалихъди аьлакьалу ляхин дибрихъиган, дишагьлийирин салондиъ лихуз хъюгъюнза. Бикарвал айи шагьриъ му цирклиъ гизаф касари ляхин апIурашра, узухьна йиз муштарйир гъюра. Гьар вахтна, кушар жвурхбаъ, маникюр апIбаъ аьгъдруб дубгъури, узуз айи аьгъювалар артухъ апIуз гьялак шулаза. Пишекарвалихъди аьлакьа айи курсариз гъягъюри, Мягьячгъалайиан, Москвайиан гъюру му цирклин пишекрарихъан цIийи аьгъювалар гъадагъуз чалишмиш шулаза», – ктибтура йиз сюгьбатчийи.
Ав, аьхю кюлфетдиъ бабкан гъахьи Тамила зегьмет дизигну ккунивалин, жвуву апIурайи ляхнихьна жавабдарвалиинди янашмиш духьну ккунивалин гъавриъ а. Дугъу гъапиганси, бикарвал айи ихь республикайиъра гьарсар касдихьан, ккун гъабхьиш, гъазанмиш апIуз шулу. «Гъазанжар адарш, ихь юрднаъ яшамиш хьуз читинди ву. Аьгъюб – гъюб гизаф шула. Гьаддиз, инсанаригъян гъюдудучIвбан, майил-мадатдихъди аьлакь-йир уьрхбан бадали, зегьмет дизигну ккунду.
Аьхиримжи вахтна узу, ихь Дагъустан фициб вуш аьгъю апIбан бадали, сиягьятдиз гъягъбакан фикрар апIураза. Январин вазлиъ Дербентдиан вуйи дестейихъди сад йигъаз Чиндирчеройиз гъушнийза. Гизаф кьабул гъабхьнийзуз», – давам гъапIнийи Тамила Шамсудиновайи.
Азад вахтна урус ва табасаран чIалариинди шиърар дикIбиин машгъул вуйи жигьил шуру ич сюгьбатнаъ швнуб-сабан чан дада Гъисханум кIваин гъапIнийи. Тамилайин дада, шуран 2 йис вуйиган, кечмиш гъахьну. Миржир бицIир айи хизандиз гъафи жигьил дишагьлийи вари бицIидар жвувандарси тербияламиш апIуз хъюгъну, ва му хизандиъ Гъисханумдиз 2 ришра гъахьну. Дугъриданра, му дишагьлийикан дарпиди гъузузра шулдар.
Тамилайи дадайиз гьамцдар цIарар бахш апIура:
Аллагьдиз чухсагъул кIурза,
Мицир дада тувбаз узуз.
КIваан дадайиз кIураза:
«Аьхю вуй чухсагъул увуз!»
