2020-пи йисан 5-пи октябриъ Урусатдин Президент Владимир Путинди, Дагъустандин Глава Владимир Васильевдин ляхниан удучIвувалин аьрза кьабул дапIну, думу чан теклифчиди тяйин гъапIну. Вахтназ вуди Дагъустан Республикайин кIулиъ Ставропол крайин терефнаан РФ-дин Федерацияйин Советдин член вуйи Сергей Меликов тяйин гъапIну.
Сергей Аьлимович Меликов 1965-пи йисан 12-пи сентябриъ Москвайин областдин Орехово-Зуево шагьриъ дявдин гъуллугъчийин хизандиъ бабкан гъахьну. Дугъан адаш – Аьлим Нур-Мягьямедович Меликов (1932-2012) – Дагъустандиан, лезги миллетдин вакил ву. Дугъу СССР-ин МВД-йин айтIан кьушмарин жергйириъ (Башкирияйин Уфа шагьриъ) гъуллугъ апIури гъахьну. Уфайиъ полковник Меликовдин ччвур шагьрин саб кючейизра тувна. Дада – Татьяна Николаевна – мялим ву.
1986-пи йисан Сергей Меликовди Ф.Э. Дзержинскийдин ччвурнахъ хъайи Саратовдин дявдин заан командный Уьру пайдгъин айтIан кьушмарин училище, 1994-пи йисан – М.В. Фрунзейин ччвурнахъ хъайи Дявдин академияйин сяргьятарин ва айтIан кьушмарин факультет, хъа 2011-пи йисан – РФ-дин Яракьлу Кьувватарин Генеральный штабдин Дявдин академия ккудукIну.
1986-1991-пи йисари, СССР-ин МВД-йин айтIан кьушмарин Управлениейиъ Львовдиъ ва Одессайиъ конвойин кьушмарин жергйириъ гъуллугъ апIури гъахьну.
1994-пи йисан думу Урусатдин МВД-йин айтIан кьушмарин Кафари-Кавказдин округдиз ляхниз гьаъну. 1994-1996-пи йисари Чечен Республикайиъ кIули гъубшу дявдин сабпи кампанияйин женгарин иштиракчи ву.
2008-пи йисан апрелин вазлихъан мина думу штабдин начальник – РФ-дин МВД-йин айтIан кьушмарин Кьялан региондин командованиейин кьушмарин командующийдин сарпи заместителди тяйин гъапIну.
2011-пи йисан сентябрин вазлиъ РФ-дин Кафари Кавказдин аьтрафариин террориствализ аькси операцйир гъахру кьувватарин СатIи вуйи дестейин командующийди – Урусатдин МВД-йин айтIан кьушмарин Кафари Кавказдин региондин командующийдин сарпи заместителди тяйин гъапIну.
2014-пи йисан майин 8-пи йигъан Сергей Меликов РФ-дин МВД-йин айтIан кьушмарин кIулин штабдин начальникдин сарпи заместителди (кIулин штабдин начальник – Сергей Бунин) тяйин гъапIнийи.
Хъа 2014-пи йисан 12-пи майиъ уьлкейин кIулиъ айирин указдиинди, Сергей Меликов (Александр Хлопониндин ерина) уьлкейин Президентдин Кафари Кавказдин федералин округдиъ вари ихтиярар айи вакилди дерккнийи. Думу гъуллугънаъ Сергей Аьлимович 2016-пи йисан июлин 28-пи йигъазкьан гъилихнийи.
2016-пи йисан июлин 28-пи йигълан мина 2019-пи йисан 30-пи сентябризкьан РФ-дин милли гвардияйин Федералин гъуллугънан кьушмарин директорин сарпи заместителди тяйин гъапIнийи.
2019-пи йисан сентябрин вазлилан мина Сергей Меликов РФ-дин Федерацияйин Советдин член – Ставропол крайин ляхин тамам апIру органдин вакил вуйи.
Сергей Меликовдиз генерал-полковникдин ччвур а. Думу РФ-дин гьюкуматдин 1-пи классдин теклифчи ву.
Сергей Меликов «Дявдиъ лишанлу хьувализ лигну» (1999), Адлувалин (2008), «Ватандин улихь лишанлу хьувализ лигну» 4-пи дережайин (2014), Александр Невскийдин (2015), Кьягьялвалин (2018) орденарин сагьиб ву.
Эвленмиш духьна. Дугъаз сар бай – Михаил а. Хпир – Галина Анатольевна – духтир, медицинайин гъуллугънан лейтенент ву.
Вахтназ вуди республикайин главайин гъуллугъниина тяйин дапIнайи Сергей Меликов сентябрин 7-пи йигъан Дагъустандиз гъафну.
Аэропортдиъ Сергей Меликовди ва РФ-дин Президентдин теклифчи Владимир Васильевди федералин ва региондин журналистарин суалариз жавабар тувну. Дагъустан Республикайин цIийи Главайи къайд гъапIганси, чан ляхниъ дугъу асас фикир коронавирусдин тIягъвнин къайдайин шартIариъ агьалйир уьзрихьан уьрхювализ тувбанди вуйиваликан гъапну.
Гьацира, дугъан фикриинди, асас месэлйирик региондин экономика пандемия мялум апIайиз фициб гьялнаъ айиш, гьадму гьялнаъди уьбхювалра кабхъра. Дагъустандиъ аьдати цирклар, культура ва спорт артмиш апIбазра артухъ фикир тувди. Сергей Меликовди гьарсар гьякимди агьалйирихъди аьлакьа уьбхруганси ляхин апIбанди вуйиваликан гъапнийи. Дугъан гафариинди, агьалйирихъди айи аьлакьайи халкьдин учIру месэлйирин гъавриъ ахъуз ва дурар гьял апIуз мумкинвал тувди.
Октябрин 7-ди Сергей Меликов РД-йин НС-дин сессияйиъ республикайин жямяаьтлугъдин активдихъди таниш гъахьну.
