Улихьна йигъари Буйнагъск райондиъ  Ш. И. Шихсяидовдин ччвурнахъ хъайи колледждин бинайиинди «Изан апIру ужур нежбер» республикайин мяна айи  конкурс кIули гъубшну. Конкурсдин финалин туриъ вари республикайиан чпин районариъ гъалиб гъахьи 15 изан апIру нежбрар уч гъахьну.

 

Гъулан мяишатдин  яркьу серенжемдиз дуфнайи  РД-йин гъулан мяишатдин ва ипIру-убхъру сурсатарин министр Абзагьир Гьюсейновди гъапиганси, му жюрейин серенжемар гъахувалин асас метлеб гьадму вуки, душваъ гъулан мяишатдин цирклин  кьялан пишекарвалин пишйирикан улупура ва дурар инсанарин арайиъ тарагъура.

 

Гьацира, министри мялум гъапIганси, гъулан мяишатдин цирклариан му жюрейин жюрбежюр конкурсар гьамусдихъантинара гьар йисан кIули гъахиди. Фицики гьамцдар серенжемар гъахували гъулан мяишатдин пишекрарик хъанара ужуди ляхин апIуз аьшкь капIра, ва нежбрар сар-сарихъди таниш духьну, чпиз айи тажруба имбударихъди пай апIузра мумкинвал тувра.

 

Серенжемдин асас пай ккебгъайиз, ццийин йисан хутIлариъ иган апIбан  натижйириинди ужуди ляхин гъапIу комбайнарихъ хъайидариз пешкешар тувнийи. Мушваъ Хасавюрт райондин «Дагагро» агрофирмайин комбанйндихъ хъайи Артур Жанхуватов сарпир гъахьну.

 

Хъасин «Изан апIру ужур нежбер» конкурс ккебгъну. Конкурсдиъ иштирак гъахьи 15 изан апIру нежбрарикан ужурсир гъядягъбан бадали, гьарурихьна хутIлин жил тувнийи. Дурари, чпихьна тувнайи жилин изан дапIну, чпик кайиб улупну ккундийи. Конкурсдин жюрийи иштиракчйириз швнуб – саб улупбариан кьимат дивну.

 

 Конкурсдин натижйириинди сабпи йишван сагьиб Буйнагъск шагьрин гъулан мяишатдин колледждин механизатор Сайпуллагь Гьяжибегов гъахьну. Кьюбпи йишв Къизлар райондин «Гайдарбеков» ИП-йин механизатор Мягьмуд Хидировди, хъа шубубпи йишв Казбековский райондин «Казбековский» МУП МТС-дин механизатор Батирсултан Аьлисултановди гъадагъну.

Дурариз варидариз ужудар пешкешар ва пулин дакьатар тувну.