23-25-пи октябриъ Табасаран райондин Хючна гъулан стадиондин айитI айи «БицIи бюджетдин спортдин майдандиъ» Ватандин Аьхю дявдиъ совет халкьди гъадабгъу Гъалибвалин 75-йис хьпаз тялукь вуди мини-футболиан «Табасаран – 2020» ччвур тувнайи турнир кIули гъубшну.
Шадвалин му мярака Табасаран райондин главайин заместитель Рамис Уьсмановди ачмиш гъапIнийи. Дугъу чан улхбаъ жикъиди райондиъ гъягъюрайи тикилишчивалин гьяракатарикан хабар тувнийи. Мини-футболиан му турнир жигьиларин ляхнариз лигру Федералин агентствойин грантдин проектдиинди кIули гъубхуб вуйи. Турнирин тешкилатчи Марат Рягьимов ву. Дугъу Дагъустан Республикайин жигьиларин Министерствойиъ жигьиларин центрин директорин заместителди ляхин апIура. Гьаму турнир кIули гъубшу «БицIи бюджетдин спортдин майданра», 2019-пи йисан 28-пи декабриъ тендерариъ гъалиб духьну, гьаму касдин регьберваликкди тикмиш гъапIуб вуйи.
Турнириз лигуз жара йишварианра хайлин хялар дуфнайи. Дурарин арайиъ Табасаран халкьдин Игит, РФ-дин Кьибла военный округдин кьушмарин командующийдин заместитель, генерал-лейтенант Рустам Мурадов, Дагъустан Рспубликайин Халкьдин Собраниейин депутат Сефер Аьлиев, Табасаран райондин глава Мягьямед Къурбанов ва жара касар айи.
Мини-футболиан турнир Табасаран райондин 22 гъулан советарин мини-футболин командйирин арайиъ кIули гъубшну. Дурарин арайиъ кIули гъушу гъизгъин талитарин аьхириъ сабпи йишв Хючна гъулан советдин мини-футболин командайи гъадабгъну, кьюбпи йишваз Къужник гъулан советдин команда ла-йикь гъабхьну, хъа шубубпи йишван сагьиб Гурихъ гъулан советдин мини-футболин команда гъабхьнийи.
Гъалиб гъахьи мини-футболин командйир Табаса-ран райондин главайин заместитель Заур Мусаевди кубк-йир, гьюрматнан грамотйир, медалар ва пулин конвертар тувбиинди лишанлу гъапIну. Гъалиб гъабхьи командайиз хил’ан-хилиз гъябгъру кубокра тувну.
Турнириъ иштирак гъахьи мини-футболин вари 22-бби командйирра Марат Рягьимовдин терефнаан туву спортдин алахьру палатарихъдира тямин гъапIнийи.
Гьаму улихьна йигъари му «БицIи бюджетдин спортдин майдандиъ» мини-футболиан Дагъустан Республикайин турнирра кIули гъубшнийи. Душваъ Табасаран райондин командайи кьюбпи йишв гъибиснийи.
