Коронавирусдин уьзри ихь уьмрин къайда гизаф дигиш гъапIну. Аьлимарин улупбариинди, думу уьзур сагъ апIру дарман арайиз адабгъайиз, ухьу цIийи къайдайиинди яшамиш духьну ккунду. Урусатдиъ му уьзриз аьксиди шубуб жюрейин вакцинйирра адагъна, амма дурар гьелелиг ихь гьюкуматдин гизаф йишвариз хъуркьнадар.

 

 

Вакцина яратмиш гъапIу пишекрарин гафариинди, диди уьзур ктрубчIвуз кюмек тувру, уьзур кубчIвишра, думу пучIуди улдубчIвруганси апIуру. Хъа инсанди вахт ккимиди вакцинайин руб дивнадарш, коронавирус кубчIвру, ва диди чан чIуру кьувват улупуру. Гьаддиз гъи ухьу, аьли-марин ва духтрарин теклифар кьабул апIури, маскйир алахьури, кми-кмиди хилар жикIури, гизаф инсанар хьайи йишварихь арайиъ манзил уьбхюри, чарасузвал адарди хул’ан удудучIвди гъузну ккунду. Гьаци къайдйир уьрхюри ашра, гизаф касар коронавирусдиан аьзарлу шула. Гъийин макьалайиъ узуз таниш дишагьли фици аьзарлу гъахьнуш, ктибтуз ккундазуз. Дугъан ихтилат хъайи-хъайиси исихъ туврача.

«Яш 50 йистIан артухъ дубхьнашра, гьелелиг сагъламваликан аьрзйир апIурадарза. Узу, ихь гизаф дишагьлийирси, бицIидариз дарсар киври, мектебдиъ лихураза. Баяр-шубарихъди лихурайивализ лигну, гьар йисан сагъламвал ижмишнаан ахтармиш апIурайич. Гриппдиан аьзарлу гъахьишра, шубуд йигъандин арайиъ сагъ шулийза. Жвуми йигъан хябяхъган лихру гьяфта ккудубкIнийиз. Шембе ва элгьет йигъари лихури адайза, хизандин игьтияжар гьуркIри, хулан ляхнарихъ гъахьнийза. Элгьет йигъан хябяхъган дюдеригъ йишв нахушдиси гъабхьнийиз. Духтрари кIуруганси, ушвнихъан сода кайи мани шид хъажабгъну, ахуз дахънийза. Амма йишвну дерин нивкIуз гъягъюз гъабхьундайзухьан. Бедендин кефйир ужуди дарувал гъябкъиган, термометр ккивну, температура гъеебцнийза – 37,8 градус улупурайи. Дугъриди гъапиш, аьхиримжи 5 йисандин арайиъ жандин температура затра за дубхьнадайиз, хъа гьаму ражари кIулра иццру гъабхьнийиз. КIулиз гъафи сабпи фикир коронавирусдикан вуйи. ГвачIнинган духтриз дих апIбанди гъахьнийза. Хябяхъдихъна духтир гъафнийи, температура ис апIру дармнар дидикIну, шубуд йигълан рягьят дархьиш, хъана духтриз дих апIувал ккун дапIну, гъушнийи. Кьюбпи, шубудпи, юкьудпи йигъари рягьят гъабхьундайзуз. Бедендин температура гагь цIибди за, гагь цIибди ис, кми-кмиди кIул иццру шулайи, уьгьйир ачмиш духьнадайи, хъюхъниз ниъра гъюрайи, ипIрубдин тIяаьмра аьгъю шули имийи. ЙикIру гьялнахъна дуфнадайзу, гьаци вушра, узук коронавирусдин уьзур кубчIвнайивал аьгъю дубхьнайзуз. Уьзур аьгь апIуз шубуд йигъанра, хьуд йигъанра шулу, амма му уьзриз йиз беден кьабул дубхьнайиси рябкъюрайзуз. Хъайигъан хъана духтриз хулаз теклиф гъапIнийза. Дугъу узуз анализ тувуз направление ва рецепт гъибикIнийи. Поликлиникайиз душну анализ тувнийза. Рецептдик кайи дармнарра итIуз хъюгънийиза. Гьамци, дармнар итIури, анализдиз ккилигури, хьуд йигъ гъубшнийи. Хьуд йигълан гъафи анализдин жавабну узук коронавирусдин уьзур кайивал тасдикь гъапIнийи. Амма дармнар кьабул гъапIнушра, бедендин агьвалат дигиш дубхьнадайи. Гьар йигъан хябяхъган бедендин 37,4 градус температура айивал улупурайи. Духтри, компьютерин томография апIбан бадали, узкан поликлиникайиз гъювал ккун гъапIнийи. Томографияйин шикли вирусди йиз гъурдлариз цIибди тясир дапIнайивал улупнийи. Духтри узу больницайиъ ккаувалин чарасузвал адруваликан гъапнийи, амма дармнар итIувал давам дапIну ккундийи. Узу гьамциб гьялнаъ ади 15 йигъ гъубшнийи, хъа сад йигъан жандиз рягьят шулайивал аьгъю гъабхьнийзуз. Хъайигъан лигуруш, хъана температура за гъабхьнийи. Гьамус магьа 21 йигъ дубшна. Гъи узу сагъ духьнайиси гьибгъразуз.

Узук коронавирусдин уьзур мектебдиъ айи бицIидарикан кубчIвувалиин инанмиш вуза. Узухъди саб классдиъ лихурайи кьюрсана мялим дишагьлийир аьзарлу гъахьну. Дурарин анализарира коронавирусдин уьзур кайивал улупну. Жямяаьтлугъ транспортдиъ эърур дарза, хулаъ айидарра вари сагъди ими.

Духтрин гафариинди, эгер узу духтрарин вари теклифар тамам гъапIундайиш, лазим вуйи къайда гъюбхюндайиш, коронавирусди узуз хъана гужал тясир апIидийи», – аьлава гъапIнийи чан ихтилатнан аьхириъ йиз таниш дишагьлийи.