Мектебариъ тятIилар урхурайи баяр-шубариз туврайидар ву. Хъа мялимар ва аьлимар, тувнайи тятIилариз дилигди, чпин агъювалар армиш апIбиин ва чIал ккатIабццувалиин лихури, мялимвалин пишекарвалин рякъ давам апIури, жюрбежюр семинарариъ, конкурсариъ, олимпиадйириъ, вебинарариъ, пишекарвалин дережа за апIувалин курсариъ иштирак шула.
Му аьдат-къайдайихьан Хив районра гъирагъдиъ гъубзнадар. ТятIиларин вахтна гьар йигъан саб методобъединениейи семинар кIули гъябгъюра. Магьа нубатнан семинар Хив райондин образованиейин урус ва бабан чIаларин дарсар кивбан методический кабинетдин заведующий Эльмира Ярметовайи гъубхнийи. Семинариъ гъулариан дуфнайи мялимар иштирак гъахьнийи.
Семинар ачмиш апIури, Эльмира Ярметовайи сачдин ЕГЭ-йин ва гьаму йигъари райондин мектебарин 10-пи классдиъ урхурайидарин арайиъ кIули гъубху ляхнин натижйир гъивнийи.
«Гьюрматлу мялимар, дупну ккундуки, кIваин алдру коронавирус кIуру уьзри мектебариъ урхурайи ихь баяр-шубариз аьхю тясир гъапIну. Гьаму йигъари 10-пи классариъ гъубху ахтармиш апIбан ляхнира думу нубатнан ражари тасдикь апIура. Ав, ужуди-харжиди 11-пи класс ккудубкIдарикан саб бязидари райондин кьялан баллилан артухъдира ЕГЭ тувну, заан баллар гъахьидар, саб улхуб-рахубра адарди вузарик, хъа баллар бегьем дархьидар –техникумарик, колледжарик кучIвну, чпин урхуб давам апIура. Гьаци, коронавирус уьзриан ихь уьлкейиъ айи аьгьвалатназ дилигди, 9-пи класс ккудубкIдарра вари аттестатарин эйсийир гъахьну. Ихь мурад-метлебра – дурар вари аттестатарин эйсийир хьуз гъитувал вуйихь. Амма халис чпин аьгъювалариинди, хъа ихь ва абйир-бабарин кюмекниинди ваъ. Гьаму йигъари М. Шамхаловдин ччвурнахъ хъайи Хиварин мектебдик – ГИА гъабхурайи пунктнак – цIийи видеокамерйир кивна. Му фу кIурайи гаф ву? Саризра жиниб дар, 9-пи класс ккудубкIурайидариз муганайиз саб бицIи кюмекра айи, хъа гьамус дурара 11-пи класс ккудубкIурайидарихъди сабси гьисабназ гъадагъура. Гьаддиз, гьюрматлу мялимар, ухьу йигълан-йигъаз учIру шулайи месэлйирикан мялуматар урхурайидарихьна дурукьну ккунду. Дурар гьял апIуз ухьу чарйир дагну ккунду. Мисалназ, райондин 11-пи классариъ урхурайидар ухьу гьар йисан кьюб ражари райондиз хури, гьадму камерйир кайи кабинетариъ дитри, фици дурарихъди таниш`валин, вердиш`валин ляхин гъабхураш, саб гафниинди, ЕГЭ фици гъабхураш, гьациб ляхин ОГЭ-йин гьякьнаан 9-пи классариъ урхурайидарихъдира дубхну ккунду. Мидланра савайи, гьадму кабинетарилан ул илтIибкIуз, яна, саб гафниинди, экскурсия апIуз, йискьубак сабан 9-11-пи классариъ урхурайидарин абйир-бабаризра теклиф дапIну ккунду. Ичвра разивал айихъан тина, узу му теклифнакан образованиейин начальник Назаряли Аслановичдиз хабар тувдиза. Учхьан шлу кюмек, райондин методический кабинетдин терефнаан, йишвариина гъягъюри, учура апIидича», – къайд гъапIнийи Эльмира Ярметовайи.
Асас вуди семинариъ мялимари вари имтигьнар тувуз ихтияр айи 2-пи декабриъ 11-пи классдиъ урхурайидари урус чIалнаан бикIру сочинениейикан ва гьацира 10-пи февралиъ кIули гъябгъру 9-пи классдин натижа йивбан собеседованиейикан суалар хъирчрайи. Сар-сарихьан чпиз мялум даруб аьгъю апIури, семинар аьхирихъна гъафнийи.
