Гьаму йигъари ихь ватанагьли, Табасаран райондин ТинитI гъул’ан вуйи Максим Дадашев Санкт-Петербург шагьриъ кIули гъубшу вари Урусатдин марафондин манзилназ жаргъбан талитариъ иштирак гъахьну.
Санкт Петербургдиъ пучIу атлетикайин «Чвлин марафон «Аьдатар цIийи алауб. Декабристарин Кубок» серияйиан талитар 2017-пи йисхъан мина гьар йисан кIули гъахура.
Марафондин улупнайи 42 километр манзилназ Максим 4 сяаьтна 7 дакьикьана 40 секунддиъ гъажаргъну.
Марафондин кьяляхъ узу Максимдихъди сюгьбат гъубхнийза. ВуйиштIан, дугъаз РД-йин спортдин министерствойи, Дагъустандин тереф уьбхюри, 18-пи октябриъ Крымдиъ ва 1-пи ноябриъ Сочи шагьриъ гъягъру марафонариъ жаргъуз путевкйир тувнади гъахьну. Амма коронавирусдин тIягъвнихъди аьлакьалу вуди думу талитар гъахьундар.
«42 километр манзилназ жаргъбан марафондикан узу ухдихъан мина кIваъ хиялар уьрхюрайза. Магьа умударихъ хъуркьунзу. Гьамус жара марафондикан фикрар апIураза. Думу 61 километр манзилназ дажаргъну ккуни талит ву. Думу серенжем гъюру йисан 23-пи февралиъ ихь республикайиъ Мягьячгъала – Избербаш шагьрарин арайиъ гъабхуз планламиш дапIна. Талитариъ узу пишекар спортсменси иштирак шуладарза, гьаци вушра, йиз яшнан спортсменарин арайиъ узу ужударикан сарси гьисаб гъапIну», – ктибтура Максим Агъагюловичди.
Къайд апIуз ккундузузки, Санкт-Петербургдиъ гъахьи жаргъбан талитариъ вари уьлкейиан 300-дихьна агьал-йир иштирак гъахьну. Амма Кафари Кавказдин республикйириан талитариъ иштирак гъахьир сар МаксимтIан дар.
Максим Дадашев ихь республикайиъ жаргъбаан гъягъру гьарсаб талитнан жанлу иштиракчи ву. Думу сикин дарди ихь ватандашарихьна илтIикIура, спортдиин машгъул хьуз, чахъди жаргъуз гъюз теклифар апIура. Мисалназ, 2-пи августдиъ Мягьячгъала – Каспийск шагьрарин арайиъ жаргъбан талитариъ республикайин 100-дихьна жигьилар иштирак гъахьнийи. Думуган Максимди гьадму серенжемариз чахъди сарсана ихь бай жалб гъапIну.
«Дюзди гъапиш, Санкт-Петербургдин марафон сацIиб гъагъиб гъабхьунзуз. Узуз, республикайин мани гьавайихъди вердиш духьнайириз, душваъ лап мичIалди вуйзуз. Талитнаъ жаргъурайи саб арайиъ лап аьхъю гъабхьнийи. Амма, фу чара дапIнура, жаргъувал дебккударза. Санкт-Петербургдиз узу сабпи ражари гъафунза. Шагьрин успагьивалиин мюгьтал духьназа. Узхъанди юкIв убгури гъахьи, узу гьамушваъ кьабул гъапIу ва шагьрин успагьивал багахьди улупу ихь баяриз чухсагъул кIураза», – гъапну Максимди.
Чан хал-хизандихъди Мягьячгъала шагьриъ яшамиш шули, Максим Дадашевдин 20 йис ву. Дугъу чан веледарра байвахтнахъан мина спортдиин машгъул хьуз гъитну. Яш 13 йис дубхьнайи дугъан бали Расули таиланддин боксдиан ва кикбоксингдиан республикайин талитариъ кьюбпи йишвар гъадагъну, хъа 10 йис дубхьнайи риш гимнастикайиин машгъул духьна. Улихьна йигъари республикайиъ жаргъбаан кIули гъушу талитариъ думу кьюбпи йишван сагьиб гъахьну. Хъа дугъахъди жаргъурайидарин арайиъ думутIан кьюд-шубуд йисан аьхю яш айидарра айи.
«Инсандин бедендин сагъ’вал мюгькамди гъубзбаъ спортди аьхю роль уйнамиш апIура. Жаргъурайи вая лицурайи инсандин кIван гьендемар гьаммишан сагъди гъузру. Узу, мисалназ, сад йигъан 15-20 километрин манзилназ жаргъураза. Инсан фтихьна вушра вердиш шулу. Узуз йиз ватандашар спортдиин, жаргъбиин, лицбиин машгъул духьну ккундузуз. Гьяйифки, дидкан айи мянфяаьтнан вари гъавриъ адар. Спортди инсан сагъ апIуру. Эгер инсанди, гьар йигъан гачIвнинган гъудужвну, жаргъуз гъягъюз жвуваз гуж гъапIиш, 10 йигълан думу гьаци вердиш шулу. Гьадмуган бедендиз фици гьии шулаш рябкъюри, артухъси аьшкь хьуз хъюбгъру. Жаргъувал – жигьилвал ву! Жаргъувал – утканвал ву! Жаргъувал – сагъ’вал ву!»,
– аьлава гъапIну Максим Дадашевди.
