11-пи ноябриъ Дагъустан РИА-йин конференцйир гъахру залиъ Дагъустан Республикайин мал-девлетнан ва жиларихъди аьлакьалу ляхнариз лигру министр Агъарягьим Къарагьяжиев ва РД-йин юстицияйин министр Къязимягьямед Сефикъурбанов журналистарихъди гюрюшмиш гъахьну.
Гюрюш тешкил апIбан асас себеб – вахтназ вуди республикайин Главайин вазифйир тамам апIурайи Сергей Меликовди республикайин жиларин гьякьнаан, янаки ишлетмиш дарапIди, ясана файдасузди ишлетмиш апIрайи жиларин месэла гьял апIбан бадали, жюрбежюр идарйирин гъуллигъчйирикан ибарат вуйи комиссия тешкил апIру буйругъниин къул зигувалихъди аьлакьалу вуйи.
Серенжен ачмиш апIури, Агъарягьим Къарагьяжиевди мялум гъапIганси, улупнайи приказдиин къул гъизигу йигълан мина хъюгъну, республикайин хусусиятнаъ айи жиларихъди аьлакьалу вари ляхнар дерккна.
«Гъийин йигъазкьан читинди дийибгънайи месэла ухди гьял апIбан бадали, Сергей Аьлимовичдин тIалабниинди 16-пи ноябриз комиссия тешкил дапIну ккудубкIиди. Думу комиссияйи жиларин гьякьнаан вуйи вари месэлйир 2021-пи йисан 15-пи феврализкьан ахтармиш апIури гъузди.
Муниципалин образованйирин хусусивалиъ айи жиларин гьякьнаанра гьамцдар уьлчмйир кьабул апIбан бадали, вари районарин кIулиъ айидариз табшуругъар тувна», – гъапну министри.
Улупнайи жиларин гьякьнаан мицдар серенжемар гъахувалин асас себеб – яшайишдин мяна айи объектар уьмриз кечирмиш апIуз ужударсдар жилар ашкар апIбахъди аьлакьалу ву.
Къайд апIуб лазим вуки, республикайин хусусиятнаъ зиихъ улупнайи жиларихъди аьлакьалу месэлйир дерккувалин сяргьятар дивувал федералин мяна айи жилиз кайидар дар.
Гюрюш давам апIури, РД-йин юстицияйин министр Къязимягьямед Сефикъурбановди къайд гъапIганси, гъитIибккнайи месэлайин гьякьнаан комиссия тешкил апIувал республикайиз яшайишдин мяна айи объектар тикмиш апIуз жилар адрувалихъди аьлакьалу ву.
«Гъи ухьуз яшайишдин фицдар-вушра объектар дивуз дакьатар жара апIбан мумкинвал айи вахтна, варитIан асас вуди читинди гъубзрайи месэла жилар адрувалихъди аьлакьалуб ву. Гьаддиз гьамусяаьт республикайин жилар фицдар метлебариз ишлетмиш апIураш, фицдар жилар эйси хътарди дирчнаш ахтармиш апIбан бадали, комиссияйи ляхин гъабхиди. Думу комиссияйи, вари жилар ахтармиш дапIну, 2021-пи йисан 15-пи феврализ ккудукIиди»,
– аьлава гъапIну Къазимягьямед Сефикъурбановичди.
Эгер ичв жилихъди аьлакьалу, гьял дапIну ккудубкIуз даршулайи читин месэла аш, гьацдар касариз кюмек апIувал метлеб вуди, РД-йин МФЦ-йиъ (8722)666-999 нумрайин убцру линия ачмиш дапIна. Думу линияйи, элгьет йигъан ктарди, имбуну вари йигъари гвачIниндин сяаьт 9-диан хябяхъдин сяаьт 6-дизкьан зенгар кьабул апIура.
