Республикайин шагьрариъ 15-пи ноябрихъан мина манишнахъди тямин апIру цирклин гъуллугъари гьюкуматдин ва социалин идарйир – больницйир, мектебар, бицIидарин багъар, агьалйирин хулар – манишнахъди тямин апIбан серенжемар гьяракатниинди кIули гъахура.
Улихьна йигъари ич мухбир Умгьанат Сулеймановайи Дагъ. Огни шагьриъ агьалйирин хулар манишнахъди тямин апIувалин гьякьнаан шагьрин «Тепловые сети» МУП-дин директор Гьяжикерим Мазагаевдихъди сюгьбат гъубхну.
Сюгьбатнаъ Гьяжикерим Мазагаевди къайд гъапIганси, Дагъ. Огни шагьриъ дуланмиш шули ва ляхин апIури, дугъан хайлин йисар ву. Гьаму вахтнан арайиъ шагьрин кIулиъ жюрбежюр касари ляхин гъапIну, амма мушваъ ужувлан терефназди саб жюрейин дигиш’валра гъабхьундар. Манишнахъди тямин апIру вари гъурулуш йирси дубхьна, гьеле совет гьюкуматдин вахтарин тикилишар гьамусра ишлетмиш апIури ими, гьаддиз шагьур манишнахъди тямин апIбан цирклиъ гизаф читинвалар алахьура.
«Совет уьлке ккадабхъну, дидин бинайиин Урусатдин Федерация тешкил гъапIу 1990-пи йисазкьан поселок вуди гъабхьи Дагъ. Огнийикан республикайиъ ва уьлкейиъ варитIан жигьил шагьур гъабхьнийи. ЦIийи дережайиз дуфнайи шагьриъ ляхин тешкил апIбаъ садпи йисари гизаф читинвалар алахьнийчуз.
Гъийин девриъра алахьурайи читинвалар цIиб дар. Ццийин йис варидариз гъагъиб гъабхьну, асас вуди коронавирусдин тIягъвнихъди аьлакьалуди. Гьамцдар шартIариъ фунуб ляхин тамам апIурушра, пулин дакьатар лазим ву, хъа дурар агбан бадали, жямяаьтдин улихь бажаранлу кас хьади ккунду. Хъа жвуван халкь бадали зегьмет зигру касди вари читинвалариан удучIвуз мумкинвалар агиди. Дагъ. Огни шагьрин гъийин глава Жалалудин Аьлирзаев гьацдар руководителарикан гьисаб апIуз шулу. Дугъан жягьтлувалиинди Дагъ. Огнийиъ гизаф ляхнар кIули духна.
Ккудушу йисари фукьан вушра месэлйир гьял апIуз мажбур шули гъахьунча. Йирси котельнйир ва турб-йир гъубшу аьсрин 60-пи йисарихъан мина ишлетмиш апIурайидар ву. Хъа дурарихъди ляхин апIуз фукьан вушра читинди алабхъура. Кьюрдуз му гъурулуш гьязур апIбан ляхнар хьадхъан мина ккергънача. Йирси духьнайи котельнйирихъди ляхин апIуз ужудар пишекрарра жалб дапIнача. Турбйир гьар жюрейин зирзибилихьди ацIну шулу, дурар марцц дапIну, дутIуркIнайи йишварин сваркйир дапIну, шагьур манишнахъди тямин апIру гъурулуш лазим вуйи къайдайиз дубхну, кьюрдухьна гьязур гъапIунча.
Дагъ. Огни шагьрин кIу-лиъ айи Жалалудин Аьлирзаевдихъди сатIиди му ляхниз гьяракатниинди лигури, мектебар, бицIидарин багъар ва шагьрин гьисабнаъ айи социалин имбу гъурулушар манишнахъди тямин гъапIунча. Му ляхин кIулиз адабгъбан бадали, шагьрин глава, пулин дакьатарин ва пишекрарин кюмек ккун апIури, республикайин правительствойиз итIикIнийи, гьаддиз гъубшу гьяфтайиъ Дагъ. Огни шагьрин котельнйирин гьял фициб вуш лигуз Ростехнадзорин РД-йиъ айи управлениейиан комиссия гъафну. Шагьур манишнахъди тямин апIбан гъурулушдин дикъатлу ахтармишар духну, дурари кюмек апIуз гаф тувну.
Вушра, дурарихьан кюмек рубкьайиз ккилилигди, учу ич тешкилатдин гьисабнаъ айи мектебар, бицIидарин багъар, администрацияйин ва гизаф мертебйирин хулар, гьацира жара идарйирра учхьан шлуганси манишнахъди тямин гъапIунча»,
– гъапнийи Гьяжикерим Мазанаевди.
Ростехнадзориан гъафи комиссияйин вакилари туву гаф тамам дапIну, ццийин кьюрд Дагъ.Огни шагьрин агьалйири мани хулариъ адапIур кIури, умуд кивдихьа.
