2020-пи йисан 1-пи декабриъ Табасаран райондин администрацияйин конференцйир гъахру залиъ «Муниципалин образованйирин яшайишдинна экономикайин артмиш’валин месэлйир ва дурар гьял апIбан рякъяр» ччвур тувнайи илимдинна тажрубайин конференция кIули гъябгъиди. Конференция экономикайин илмарин доктор, профессор Зейдуллагь Юзбегов бабкан духьну 75 йис хьпаз бахш дапIна. Думу серенжем сяаьт 10-диъ ккебгъди.
Конференция кIули гъабхру ДГУ-йин экономикайин факультетдин политэкономияйин кафедрайин заведующий Низами Аскеровди ич газатдиз туву мялуматариинди, илимдиз бахш дапIнайи серенжемдиъ РД-йин Главайин ва Правительствойин вакилар, республикайин парламентдин депутатар, Табасаран, Хив районарин, Дагъустандин Огни шагьрин главйир, МГУ-йин, ДГУ-йин, ДГПУ-йин, ДГУНХ-дин, ДагГАУ-йин, РАН-дин ДФИЦ-дин аьлимар, жямяаьтлугъдин ва бизнесдин вакилар иштирак хьиди. Гьацира конференция-йиз гьюрматлу хялижвди РФ-дин Государствойин Думайин депутат, РФ-дин спортдин лайикьлу устад Вячеслав Фетисовдизра теклиф дапIна.
Конференцияйиъ докладар урхувал ва гьацира Интернетдин Zoom платформайиъ онлайн къайдайиъди удучIвну улхувалар планламиш дапIна.
Ихь машгьур ватанагьлийин уьмрин рякъкан, илимдин ва жямяаьтлугъ цирк-лариъ гъазанмиш дапIнайи хъуркьуваларикан макьалйир газатдин 6-пи машнаъ урхуз шулучвхьан.
