Улихьна йигъари ихь гьюкуматдин образованиейин ва илимдин цирклиъ гюзчивал гъабхру Федералин гъуллугъну образованиейин ерийиз кьимат тувбан гьякьнаан семинар-совещание кIули гъубхнийи. Думу совещание 2020-пи йисан мектебдиъ урхурайидариз кьиматар дивбан къайдйириз ва 2021-пи йисан ЕГЭ-йихъди алакьалу вуди кьиматар дивбан месэлйириз бахш дапIнайиб вуйи.
«Аьхиримжи вахтна ухьуз жюрбежюр ахтармишарин натижйирин аьхю бина ахьуз, гьадму гьисабнаан ЕГЭ-йиан, ОГЭ-йиан, вари Урусатдин ахтармиш апIбан ляхнариан, образованиейин дережа ахтармиш апIбан милли ва халкьарин арайиъ вуйи серенжемариан ва гьацдар жарадар. Думу бинайиз асас вуди, ухьуз сабсана гам улихьинди алдабгъуз ва думу улупбариан уьмуми кьимат арайиз хуз мумкинвал ахьуз. Йисандин аьхириз Урусатдин Федерацияйин регионарин «Рякъюн карта» арайиз хибдихьа. Гележегдиъ муниципалитетариъра гьадму кьиматар хьиди. Думу улупбар образованиейин управлениейин региондин органарин кIулиъ айидарихьан, образованиейин ери за апIбан бадали, ишлетмиш апIуз шулу» – къайд гъапIну Рособрнадзорин кIулиъ айи Анзор Музаевди.
Совещаниейиъ Анзор Музаевди ва образованиейин ерийиз кьимат тувру Федералин институтдин директор Сергей Станченкойи вари Урусатдиъ кIули гъуху ахтармиш апIбан ляхнарин натижйирикан ктибтну. Думу ахтармиш’валин ляхнариъ уьлкейин 37 агъзур мектебдиъ урхурайи 7 миллионтIан артухъ ученикар иштирак гъахьну. Вари Урусатдин мектебариъ урхурайидарин аьгъюваларин ахтармишар гъахбан серенжемариъ иштирак гъахьидарин кьадарра улихьна йисантIан артухъди вуйи. Амма, улихь ккимиди ашкар духьнайи натижйириинди, ккудубшу йисантIан цци тамам дапIнайи ляхнар зяифдар ву. Мидланра гъайри, хайлин мектебариъ ахтармиш апIбан ляхнар гъахурайи вахтна къайда чIур апIбан дюшюшарра гъахьну. Думу мектебар Рособрнадзорин хусуси сайтдиъ йисандин аьхириз улупиди.
«Вари Урусатдин ахтармиш’валин ляхнарин натижйир асккандар гъахьи мектебариз учу кюмек апIидича. Гьаму йисан аьгъювалариан кьяляхъ гъузрайи мектебариз кюмек вуди «500+» проект гьяракатнаъ ипуз хъюгъюнча. Гъюру йисан думу проект яркьу апIуз планарик кайич. Дидиъ гьарсаб региондиан асккан натижйир улупу шубубдихьна мектебар иштирак хьиди», – гъапну Сергей Станченкойи.
