Гьамусяаьт ихь гъулариъ Ватандин Аьхю дявдин иштиракчйир сар-кьюрра имдаршул, дурарихъди сабси ихь арайиан дявдин вахтнан гъагъи аьзиятар, гашар, аьхълушнар гъяркъю, гьадмуган яшар бегьем духьну адру бицIидарин кьадарра цIиб шула. Гьаци гъапну кIури, дяви ккудубкIну 75 йистIан артухъ ву. Хъа му девриъ мициб яш ярхи уьмурси гьисаб апIуз шулу.
Гъалибвал гьадабгъну гьамкьан гизаф йисар гъушнушра, думуган гъагъи аьзиятар, гъамар, аьхълушнар гъяркъю инсанариз му вахтар кIваълан душнадар, дявдикан кинйириз лигруган, гьамусра дурарин уларилан нивгъар гъягъюри шулу.
Гьадму аьзилтар гъяркъю, Асккан Ярккарин гъулаъ вартIан яшлу кас вуйи Сейдат бабкан чан уьмриъ алахьу читинваларикан ктибтуб ккун гъапIнийза.
Сейдат Ибрагьимова 1932-пи йисан Асккан Яракк гъулаъ нежбрин хизандиъ бабкан гъахьну. БицIидимиди дада дукIну, алахьу аьзиятар цIиб ву кIури, дугъан урчIвуд йис тамам хьайиз, Ватандин Аьхю дяви ккебгъру. Дада дукIну дерд-хажалат гъизигу бицIи шураз ишуб-гьарай ади гъул’ан дадйири баяр, хпари – жилар, чйири – гъардшар дявдиз гьаърайи вахтар, хъа цIиб вахтналан, гъакIну кIури, кIару кагъзар гъафиган, апIурайи ишлар, яс уьбхюрайи дишагьлийир гъяркъну. Гъулаъ гьуркIну зегьмет зигру жилар имдруган, гизафси укIан чIиргъин, йимишар, ригъдин кюкю кчIюбкьиган гъубзуб дипIну, мягьсулар дурурзди дирчнайи хутIлариъ лихру йигъарра бицIи шуран кIул’ина гъюру, мидихъди сабси, дугъ’ин хьайир марцц, дурарикан чухрайихь мурслар дапIну, дявдиъ айи эскрариз бегьлийир, атIнар ургъру зегьметра алабхъну.
«Дявдин кьяляхъ, узу, яшар бегьем духьну адру жигьил риш, ич гъул’ан Мар’ят кIуру хпир кIулиъ айи 17-сан узусдар жигьил шубарра хъади, гъилиху йигъарихъди маважиб вуди колхоздиан дяхинна мух туври, АрхътIарин гъулан кIанакк Хив райондиз гъюз Чирагъ-чай нирлан тина апIурайи гъядухъ гъванар хъахьуз, ичIариъ кьял’инди ругар ахьуз гьаънийчу. АрхъитI жвуван чвугаъ лембейиин дахьри, мушваъ лихури 19 йигъ гъабхьнийич, хъасин, НитIарихъан кюгьне ЧIучIгъарин гъулан кIанаккнакьан Яракк гъулаз гъюру, цIийиди хилихьди апIурайи рякъюкк цалар ккауз, душвахъ гъванар хъахьри, батIрихъди тямин апIури, гунтI али йишвлан руг алдабгъури, ичI айи йишваъ абхьри, дюз апIури, сад йистIан артухъ вахтна зегьмет гъизигнийча. КIару ярквраккансина яягъди 35 километр гализ укI ккадабгъну таййир дивуз, гадар ва игнар апIуз яшайишдин саб шартIра адру ятгъариз гьаъри гъахьнийчу. Ляхин ккудубкIиган, кьял’ин гъагъарра алди гъулаз ликри гъюри шуйча. Швуваз хпан кьяляхъра, колхозар совхозариз илтIикIиган, цIийи ляхнар, зегьметар арайиз гъюз хъюгънийи. УкIар уршвру вахтна, техника, машинар адарди хьпаз лигну, гвачIнинган малар сикин гъапIубси, гъючIаккнар дапIну, кьял’ин бицIир алди, гъвалак уьл айи чанта кибхну, 4-5 километр ягъли сивиз укI убшвуз, хъасин думу ккадабгъуз гъягъюри гъахьнийча. Эгер юкьуб гунтI укI уч гъапIиш, дидкан кьюб явдар шуйи, хъа кьюб – уртагъди совхоздин таййирихъна йицарин мярхяриъди зигури гъахьну. Миржир веледра дюрхну, дурарин гвачIин-хьябяхъра дапIну, 1978-1979-пи йисари фермайиъ дояркади, 1980-1982-пи йисари гъулаъ халачйир урхру артелиъра ляхин гъапIунза. 1982-пи йисан пенсияйиз удучIвхъан тина худлариз, хъасин гудлариз тербия туври, Яракк гъулаъ яшамиш шулаза»,
– ктибтура Сейдат Мягьямедагъаевнайи.
Сейдат бабаз гъулан совхоздин, Хив райондин, республикайин кIулиъ айидарин, Урусатдин Президентдин терефнаан тувнайи гьюрматнан гармотйирин кьадарра цIиб дар, мурариланра гъайри, думу Игит-дада, Социалист зегьметнан Игит, Зегьметнан Игит, Гъулан мяишатдин кIакIначи, Гъа-либвалин 60-пи, 70-пи, 75-пи йисариз вуйи медаларин сагьиб ву.
Сейдат бабахъ хъпехъиган, дугъан кIул’ин улуркьу читинваларикан, аьзиятарикан, дугъу гъизигу зегьметарикан фикир гъапIган, дявдихьан ярхла айи йишвариъ гьамцдар дарвалар гъахьиган, яраб, дяви гъябгъюри гъабхьи гъулариъ, шагьрариъ фициб аьгьвалат арайиз гъафнийкIан, аьхълушнаан, гаш’валиан душвариъ фукьан инсанар гъийихнийкIан кIури, суалар арайиз гъюру. Ихь абйири гьамциб багьа кьиматниинди гъадабгъу Гъалибвал сар касдира кIваълан гьапIну ккундар. Гьамцдар кьабидар имбу гъулариъ мялимари, гьацI йисан саб ражарикьан дих дапIну, дурарихьди мектебдиъ урхурайи бицIидариз Ватандин Аьхю дявдин вахтарикан ктибтуз гъитри гъахьнийиш, фукьан вушра ужуб ляхин шуйи.
Ич сюгьбатнан аьхириъ Сейдат бабаз, ихь газат урхурайи ватанагьлийириз фу пуз ккундийвуз, кIури гьерхган, дугъу: «Я Аллагь, дюн’яйиъ гьаммишан ислягьвал ибшри, дявдин дердар, гаш’валин аьзият сар касдизра дярякъри. Гьарсар касдиз ярхи уьмур тувну, дурар чпин худларин ва гудларин сумчрариъ иштирак ишри», – гъапнийи.
