7-пи декабриъ Дербент шагьриъ, табасаран жямяаьтлугъдин вакилар уч духьну, ихь милли культурайин автономия тешкил апIбан гьякьнаан собрание кIули гъубшну.
Собраниейиъ Дербентдин администрацияйин главайин заместитель Амиль Саркаровра иштирак гъахьну. Дугъу чан удучIвну улхбаъ му серенжемдин важиблуваликан, гьам табасаранариз, гьам вари шагьриз милли культурайин автономия хьувалин мянфяаьтлуваликан гъапну.
Дербент шагьрин депутатарин Собраниейин председателин заместитель Айваз Аьлихановди Дербентдиъ ляхин апIурайи милли автономйирикан ктибтну. Дугъан гафариинди, шагьриъ шубуб миллетдин культурайин автономйир а: лезгйирин, жугьдарин ва азербайжнарин.
Кечирмиш шулайи вазлин эвелиъ даргйирин милли культурайин автономия тешкил апIбан собраниера кIули гъубшну. Автономйири чпин миллетарин улихь дийигънайи читин месэлйир гьял апIуз кюмек тувра, ва ихь милли культурайин автономияйира гьадму жюрейин ляхин кIули гъабхиди.
Шаир ва филологияйин илмарин кандидат Эльмира Аьшурбеговайи уч духьнайидар Табасаран милли культурайин автономияйин уставдин проектдихъди таниш гъапIну. Дугъу, уставдин проектдиъ улупнайи асас метлебар ктухбахъди сабси, табасаран милли культурайин автономияйин вазифйирикан саб – ватанагьлийириз якьин кюмек шлу ляхин апIувал дубхьну ккуниваликан гъапну.
Собраниейиъ гьял гъапIу месэлйирин натижайиъ «Дербент шагьрин табасаран милли культурайин автономия» ччвур али жямяаьтлугъ тешкилат арайиз хпан къарар адабгъну.
Уч духьнайидари вариди сесер тувбиинди, чпин разивал улупну, «Дербент шагьрин табасаран милли культурайин автономия» тешкилатдин Советдин председателди Дербент шагьрин депутатарин Собраниейин председателин заместитель, “Каспий-КТВ” ООО-йин гендиректор Айваз Аьлиханов, председателин заместителди табасаран шаир ва жямяаьтлугъ кас Эльмира Аьшурбегова ктагъну, ва гьацира автономияйин Советдиз 15 кас, тешкилатдин гюзчивалинна ревизияйин комиссияйиз – 3 кас табасаран жямяаьтлугъдин вакилар тяйин гъапIну – Дербент шагьрин депутатарин Собраниейин депутатар Ширинбег Гюльмягьямедов ва Аьлим Гьялимов ва «Табасарандин нурар» газатдин мухбир Умгьанат Сулейманова.
