Гьарсар гьямила дишагьлийирин асас мурад – саб читинвалра адарди дюн’яйиз сагъу велед хувал ву. Му метлеб тамам хьпаъ аьхю эгьемият, тялукь вахтна гъвалахъ ужур акушер-гинеколог хьувалиъ а. Табасаран райондин дишагьлийириз му жигьатнаан рягьятди алабхъну – жигьил дадйирин сагъламвал уьбхбан гъаразнаъ заан пишекар Зубайдат Аьлигъалбицова ади, магьа саки 40 йискьан шула.
Табасаран райондин ЦРБ-йин кIулин духтир Абсередин Мирзабеговдин гафариинди, Зубайдат Ибрагьимовнайи ляхин апIуз хъюгъю сабпи йигъхъан мина учв, неинки заан пишекарси, хъа гьацира ужур тешкилатчисира улупну. БицIидар бабкан хру гинекологияйин отделениейин заведующийди ва гьацира гьадму отделениейиъ акушер-гинекологди ляхин апIури, дугъу коллективдин ляхин лазим къайдайиинди албагна. Чаз табшурмиш гъапIу гьарсаб ляхин аьхю жавабдарвалиинди тамам апIуру, дугъу дадйир ва бицIидар уьрхбаз, райондиъ айи дишагьлийирин диспансеризация гъабхбаз, акушервалинна гинекологияйин уьзрарин профилактика дапIну, дурариан кетIерццнайидар сагъ апIбаз, гьацира марцциди ляхин апIбаз гизаф фикир тувра.
«Му касди апIурайи ляхин ЦРБ-йин подразделениейин гьаму деврин тIалабариз тялукь ву. Дугъу зигурайи жафайиин натижаси аьзарлуйирихъди гъабхурайи профилактикайин ляхин, диспансеризацияйин, жигьил шубарихъди, дурар ктIетIерццбан бадали, тешкил дапнайи ляхинра саб хайлин улихь дубшнайивал улупуз шулу. Документарихъди вуйи ляхинра дугъу лап мар-цциди апIуру. Стационариъ дишагьлийириз консультация тувру ва сабпи звенойин идар-йириъ, лазим вуйи плакатар ва жара кагъзар керхну, вари ляхин лазим вуйи къайдайиинди албагна» – къайд гъапIну Абсередин Мирзабеговди.
ЦРБ-йиъ гинекологди лихурайи Дагъустандин лайикьлу духтир Тамила Гьямзатовайи гъапиганси, Зубайдат Аьлигъалбицовайи медицинайин цIийи къайдайи-инди, гьамусдин тIалабариз жаваб тувруси ляхин апIура, кетIерццнайи дишагьлийири бицIидар хру вахтна лап читин операцйир кIули гъахура.
«Ккудушу йисари райондиъ акушервалин гъуллугънан, фельдшервалинна акушервалин пунктарин ва духтрарин участокарин ляхин саб хайлин улихь гъушну. Гъулариз душну, хпарихъди консультацйир гъахру ляхинра мюгькамди албагна. Медицинайин идарйириз кюмек апIбан, дурарин ляхин цIийи тIалабариз асас вуди тешкил апIбан бадали, му кас гьар вахтна гъулариз гъягъюри шулу», – мялум гъапIнийи дугъу.
Зубайдат Аьлигъалбицо-вайи чан ляхниъ улупурайи аьхю хъуркьувалариз лигну, 2001-пи йисан дугъаз «РД-йин сагъламвал уьбхбан отличник», хъа 2003-пи йисан «Дагъустандин лайикьлу духтир» ччвурарра тувна. Думу гьацира саб хайлин дипломариинди ва грамотйирииндира лишанлу дапIна.
Чан улихь дивнайи месэл-йир вахтниинди тамам апIбаз лигну, дугъаз коллективдин, ва гьацира райондин агьалйирин арайиъра ужуб гьюрмат а.
– Гинекологияйин отделение кьюрдухьна гьязур ву. Манишин тувру гъурулуш лазим вуйи къайдайиинди либхура. Штун месэлара гьял дапIнача, больницайин гьяятдиъ штун буругъ дийибтIна. Гинекологияйин отделениейиъ гьамусяаьт 45 кровать а. Гьадрарикан 35 кровать бицIидар бабкан хру отделениейиъ ва 10 гинекологияйин отделениейиъ. 2019-пи йисан му отделениейиъ 354 бицIир бабкан гъахьнийи, хъа 2020-пи йисан 328 бицIир, дурарикан сар аьзарлу вуйи. Гьамусяаьт гинекологияйин отделениейиъ 39 кас дахъна, хъа 570 кас бицIидар кайи дишагьлийир, чпик кайи уьзрар сагъ дапIну, хулариз гъушну. Коллективдин пишекарвалин гьякьнаан улхуруш, отделение-йиъ 2 Дагъустандин лайикьлу духтрар лихура, 4 духтир заан категория айидар, 1 кас – сабпи категория айир, 10 кас – гинекологарин сертификат хьайидар ву.
Отделение лазим вуйи авадлугъарихъдира тямин дапIнайич – лап читинди бабкан гъахьи бицIидариз 4 кювезар а, гьацдар бицIидариз лигуз кислороддин 6 концентраторар, гъурдларин табии дару вентиляция апIру 1 аьхюдарин, 1 бицIидарин аппаратар, гьацира жара лазим вуйи аппаратурара а, – жикъиди ктибтнийи чан ляхникан Зубайдат Ибрагьимовнайи.
ТинитI гъул’ан вуйи дишагьли ФатIимат Асланова гинекологияйин отделениейиъ ургубпи ражари дахънайир ву. Му касдира, Зубайдат Ибрагьимовнайин регьберваликкди гинекологияйин отделениейиъ апIу-райи ляхин заан дережайинуб ву кIури, тасдикь апIура. ГвачIнинганра, хябяхъганра дуфну, Зубайдат Ибрагьимовна вари кетIерццнайидарилан илтIикIуру, фу лазим вуш гьерхру, духтрар лигураш, лазим вуйи дармнар-рубарихъди ва жара лазим вуйи шей’арихъди тямин дапIнаш, ахтармиш апIуру. Му отделениейин ляхниз аьхю чухсагъул пуз ккундузуз», – аьлава гъапIнийи ФатIимат Мягьямедовнайи.
