Ихь уьлкейиъ мектебдин яшнакк ккудруркьу баяр-шубариз гьуркIну бицIидарин багъар адруваликан аьхиримжи вахтна прессайиъ кми-кмиди бикIура. ЦIийи багъар диврашра, бицIидарин кьадарназ гъилигиган, дурариъ варидариз йишвар гьуркIрадар.
Гъи Дербент шагьриъ яшамиш шулайи инсанарин кьадар 125 агъзуртIан зина ву, бицIидарин кьадарра артухъ шула. Гьаддиз шагьрин мектебариъ ва бицIидарин багъариъ бицIидариз гьуркIну йишвар адрувалин месэла, ярхлаз илдидипри, гьял дапIну ккунду, фицики абйир-бабарин терефнаан чпин веледар бицIидарин багъариз гъададагърайивалин гьякьнаан гизаф аьрзйир гъюра.
Улихьна йигъари узу Дербент шагьрин Пушкиндин ччвурнахъ хъайи кючейиъ ерлешмиш дубхьнайи «Даттуч» кIуру бицIидарин багъдин заведующийди лихурайи ихь табасаран дишагьли Сабина Савзихановайихъди гьаму месэлйирин гьякьнаан гаф-чIал гъапIунза.
– Сабина Мирзабеговна, гъи Дербент шагьриъ айи варитIан читин месэлйирикан саб бицIидар бицIидарин багъариз гъададагърайивалихъди аьлакьалу ву. Абйир-бабарин аьрзйирра гизаф шула, хъа ичв терефнаан фукIара апIуз даршулайивалра рябкъюра. Гьаму месэлайин гьякьнаан уву газат урхурайидар гъаврикк ккаънийиш, ужу шуйи.
– «Даттуч» бицIидарин багъдин заведующийди ляхин апIури, 18 йис вуйиз. Улихьна вахтари Дербент шагьриъ му кьадар инсанар адайи. БицIидарин багъар ва мектебар, шагьриъ айи бицIидарин кьадар гьисабназ гъадабгъну, дивнайидар вуйи. Йислан-йисаз Дербент шагьриз, ляхин абгури, гъулариан удучIвну гъюрайи хизанарин кьадар артухъ шула, гьаддиз мектебариъ ва бицIидарин багъариъ йишварихъди вуйи месэлйирра читин духьна.
Гъи мектебарин саб классдиъ 35-38 баяр-шубари урхура. БицIидарин багъариъ айи аьгьвалатра ухшаруб ву. Хъа учхьан лазим вуйи кьадар бицIидартIан кьабул апIуз шулдарчухьан, фицики ич бицIидарин багъ 1947-пи йисан дивнайиб ву. Гьюкуматдин терефнаан пулин кюмекра гьеле адарчуз. Цци Дербент шагьрин администрацияйин гъуллугъчйир дуфну, ич багъ 2021-пи йисаз рас апIбан сиягьдик кипну. Узу ва ич коллективди, ич бицIидарин багъдиз мициб фикир тувбаз Хизри Абакаровдиз аьхю чухсагъул кIурача.
– Йисандин арайиъ швнур бицIидар кьабул апIурачва? Увухъди лихурайи коллективдиканра кьюб гаф пIуб ккун апIураза.
– Ич бицIидарин багъдиз кьабул апIурайи бицIидарин кьадар 255 бай-риш вуйич. Дурариз хъайивал апIури, агъювалар ва тербия туври, хураг гьязур апIрударра кади, 57 кас лихура, дурарикан 30 кас тербия туврайидар ву.
– Багарихьди ЦIийи йис улубкьура. ЦIийи йисан яв фуну метелебар чарасуз тамам духьну ккундувуз?
– Йиз саб метлеб вуйиз – вари дюн’яйиъ ислягьвал хьуб. Вари инсанариз жандин сагъ’вал ккун апIурза. Ццийин йис читинуб гъабхьну. Коро-навирусдин инфекцияйи вари дюн’я ккапIну, хайлин инсанар уьмриан гъушну. Мал-мутму уьмрин бахт дар, инсандин бахт – жандин сагъ’вал ву. Гирами ватанагьлийир, ичв гъюрайи ЦIийи йис мубарак ибшри. Диди учвуз жандин сагъ’вал, хулаз берекет-гьюрмат хури. Гъит, ихь бицIидарин гележегра ужуб ибшри.
