Аьхиримжи йисари агьалйириз гьюкуматдин терефнаан яшайишдин жюрбежюр кюмекар тувбан гьякьнаан Урусатдин гьюкмин кIулиъ айидари гъабхурайи ляхин хайлин жанлу дапIна.
Гьаци, ктабхъу 2020-пи йисан 1-пи дестейин сакьат ватандашар, сакьат бицIидар айи хизанар яшайишдин хуларихъди тямин апIбан гьякьнаан вуйи программа гьяракатнаъ айи. 29-пи декабриъ Хив райондин МФЦ-йиъ ЗахитI гъул’ан вуйи Тагьирбег Тагьирбеговдин хизандиз яшайишдин хулар гъадагъуз ихтияр туврайи сертификат жара гъапIну. Улихьнаси тялукь сертификат Асккан Яракк гъул’ан вуйи Эльхан Сеидягьмедовдин хизандизра тувнийи.
Дагъустандин Хив райондиъ айи МФЦ-йин филиалин кIулиъ айи Камила Жалавхановайи субут апIурайиганси, 2020-пи йисан дурарихьна улупнайи месэла гьял апIбан рякъ’ан 9 хизандин вакилар тялукь аьрзйир хьади илтIикIну.
– Сакьат ватандашар яша-йишдин хуларихъди тямин апIбан бадали, Урусатдиъ кьабул дапIнайи му программа республикайиъ 2019-пи йисан гьяракатнаъ ипну. Хив райондиъ му ляхин сифте вуди 2020-пи йисан жанлу гъапIну. Учу тялукь 9 хизандин аьрзйир кьабул гъапIунча. Дурарикан 2 хизандиз му кюмекар дуфна, 3 аьрзайин кьисмат РД-йин тикилишчивалин министерствойиъ улупнайи вахтназ гьял дапIну ккудубкIнадар. Хъа тмуну 5 касдин аьрзйир, хизандин вакилар яшайишдин хуларихъди тямин вуйивал субут дапIну, кьяляхъ гъапIну.
Дупну ккундуки, аьрза хьади илтIикIу сакьат касдин хизандин вакиларин хулариз игьтияж айивал программайин асас тIалаб ву, – аьлава гъапIну дугъу.
