1-пи июндиъ Вари халкьарин бицIидар уьрхбан Йигъ къайд апIури, 70 йистIан артухъ ву.
Ихь ватанагьли, жямяаьтлугъ кас Айваз Рамазановди, гьаму йигъахъди аьлакьалу вуди, Табасаран райондин Хючна гъулан нирихъ хъайи дагриин али «Табасарандин юкIв» ресторандиъ, Дербент шагьриъ Мамедбеговадин ччвурнахъ хъайи кючейиъ айи интернат-мектебдиъ урхурайи баяр-шубариз ва Чинар гъулан бицIидариз жа-жаради аьхю машкврар тешкил гъапIну. Гьамцдар рягьимлу ляхнар му касди гьар йисан кIули гъахура. Ихь арайиъ гьамцдар инсанар айивал – аьхю хъуркьувал ва дамагъ ву.
Дербент шагьрин интернат-мектебдиъ урхурайи, бицIидарин хулариъ айи, сакьатвал кайи бицIидарихьан гьерхиш, Айваз Рамазановдин ччвур аьгъдру бицIир адар. Гьаз гъапиш гьаммишан сабпи нубатнаъди бицIидар машкврарихъди гьаму касди мубарак апIури шулу. БицIидариз тербия туврайи мялимари кIурайиганси, дурар Айваз Рамазановдиз чпин абйиризси ккилигури шулу.
Узу, му касди апIурайи ужувлан ляхнар фикриз гъадагъну, дугъахъди гюрюшмиш гъахьнийза.
– Айваз Гьюсейнович, бицIидарихьна вуйи яв гьамциб янашмиш’вал наънан гъафиб ву?
– Узу аьхю хизандиъ тербияламиш гъахьир вуза. Абайиз ва бабаз йицIуртIан артухъ бицIидар ади гъахьунчу. Ич аьхю хизандиъ гьаммишан машквар айиганси шуйи. Гъира учу вари сатIи гъахьиган, саб мяракайиз инсанар уч духьнайиганси гьибгъру. Хъа фикир гъапIиш, инсандиз варитIан аьхю девлет – аьхю хизан айивал ву.
Ич хизандиъ, баяр-шубарин арайиъ варитIан жавабдарвал гьисс апIурайир узу вуйза.
Узу аспирантурайиъ урхурайи вахтна, ич адаш кечмиш гъахьнийи, ва дадайи узкан тIалаб гъапIну: «Яв чвйир-чйириз дилигну ва дурар эвленмиш дапIну ккунду». Ва гьаддиз, йиз урхурайибра дипну, узу дадайин тIалаб тамам апIуз гьяракат гъапIза.
Гъира йиз вари чвйир-чйири узуз жвуван адашдизси гьюрмат апIура.
– Хъа бицIидариз ихь гъийин улихь-кIулихь хьайидарин терефнаан кюмек апIувал ва фикир тувувал айин?
– Узу вуйиганси пидиза сабпи вахтариъ адайи. Сар-кьюр дустар ва дилаварчи касарин десте уч духьну, учу му мярака тешкил апIури гъахьунча. Ва гьар йисан му машкврин иштаракчйир артухъ шули, магьа гъи думу серенжем яркьуди кIули гъабхурача. Гъийин мяракайин иштиракчйир Табасаран райондин жямяаьтлугъ касар ву: райондин глава Мягьямед Къурбановдин заместитель Заур Мусаев, ихь гьюрматлу духтир Мирзамягьямед Мягьямедов, улихьдин Табасаран райондин суддин председатель Аьлимирза Гьясанов, дилаварчи кас Анзор Къазиаьгьмедов, Дербент шагьрин «Бабуль-Абваб» мистан терефнаан Ариф Сяидов ва Дагъустан Республикайин муфтийдин заместитель Шагьабудин-гьяжи Керимов, Къалухъ Мирзайин ччвурнахъ хъайи спортдин мектебдин директор Мартин Сефербегов, Табасаран театрин гъуллугъчйир, Дербент шагьрин 6-пи нумрайин интернат-мектебдин мялим Эльмира Гьюсейнова, табасаран райондин культурайин управлениейин кIулиъ айи Аьбдулвагьаб Аьбдулов ва хайлин жарадар.
– Му серенжемдиъ швнур бицIир иштирак гъахьну?
– Серенжемдиъ миржцIуртIан артухъ бицIидар иштирак гъахьну. Сакьатвал кайи баяр-шубар чпин абйир-бабарихъди дуфнайи. Хъа цци му серенжем, вари уьлкйириъ коронавирусдин тIягъюн абхънайивализ лигну, Табасаран райондин «Табасарандин юкIв» ресторандиъ, Дербент шагьриъ – Мамедбегова кючейиъ яшамиш шулайи живанар ва Чинар гъулаъ айи бицIидариз жа-жаради му серенжемар тешкил гъапIунча ва рази шлуганси дурар кIули гъухунча.
– Чухсагъул. Гъит, увусдар инсанар ихь арайиъ артухъ ишри.
