Яшайишдиъ алахьурайи аьдати ляхнар тамам апIуз ялгъузвали, аьхю яш дубхьнайивали, гъагъи уьзрари, уьмрин жара читин себебари хайлин манигъ’вал апIуру. Мицисдар дюшюшариъ инсандиз кюмек гьюкуматдин терефнаан бихъуру. Бязи жюрейин агьалйирин яшайишдин игьтияжар пулсузди гьюкуматди гьуркIувал къанундиинди тасдикь дапIна.

 

Яшайишдин игьтияжар гьуркIувалин ляхин Табасаран райондиъ фици кIули гъябгъюраш ахтармиш апIувал метлеб вуди, му жюрейин месэлйир гьял апIувалиин машгъул вуйи идарайин ужударсдар вакиларин ччвурар ктухуб, дурарин ляхникан ва вазифйирикан ктибтуб, алахьурайи читинвалар ачухъ апIуб ккун апIури, узу Табасаран райондин агьалйирин гизаф игьтияжар сатIиди гьуркIру центрин кIулиъ айи Нариман Аьлиевдиз телефондиан зенг гъапIнийза.

Къайд апIуз ккундузузки, 2017 пи йисан, Табасаран райондин реабилитацияйин центр, уьмрин гъагъи аьгьвалатнаъ ахъдариз кюмек тувру «Хизан ва бицIидар» кIуру тешкилат ва райондин яшайишдин игьтияжар гьуркIру центр сатIи дапIну, саб гъурулуш яратмиш гъапIнийи. Гьамусяат думу дидин дахилнаъди 9 отдели ляхин апIура. Дурарикан 6 отдел, хулариз гъягъюри, игьтияж айидариз кюмек туврудар ву.

Директори йиз суалариз жавабар учв ляхниз гъушу вахтна тувруваликан гъапнийи, амма саб сяаьт улдубчIвбалан кьяляхъ, йиз телефондиз гьадму центрин майиф бицIидар ва дурарин хизанар йигъандин вахтна кьабул апIру отделин кIулиъ айи Насир Аьбдулкеримовди дих гъапIнийи. ИкибаштIан, ич арайиъ сюгьбатра анжагъ гьадму отдели гъабхурайи ляхникантIан гъабхьундайи. Хъа, гьяйифки, хулариз гъягъюри, социалинна яшайишдин цирклиан агьалйириз фициб кюмек тувраш, асас вуди фицдар ляхнариз игьтияж аш, игьтияжариз ккилигурайидарин кьадар фукьан вуш, хулариъ гъузну, пулсузди социалин игьтияжар гьуркIувализ ихтияр фицдар инсанарихьан гъадабгъуз шулуш, КЦСОН-дин вакиларикан рази дарудар аьрзйир хьади наана илтIикIуруш ва жара суалариз гьеле жаваб адар. Хъа сюгьбат хьибди, ва ичв суалар аш, учухьна хъадаай, жаваб адарди саб суалра гъубзидар кIури, миж кивурхьа.

 

Тамамди макьала газатдиъ урхай.