Вари Урусатдиъси, Табасаран райондиъра 31-пи майдиан 18-пи июндиз ЕГЭ тувбан серенжемар кIули гъушну. Думу имтигьнар тувбан бадали, Табасаран райондиъ саб пункт гьязур дапIнайи.

 

 

Хянягъ гъулаъ айи 334-пи нумрайин ППЭ ишлетмиш гъапIундайи, гьаз гъапиш ЕГЭ тувру урхурайидар саб пунктдизтIан адайи.
ЕГЭ тувру пункт Роспотребнадзорин тIалабариз асас вуди гьязур дапIнайи. ППЭ гьязур апIбан бадали, райондин администрацияйи серенжем тешкил апIбан техника, генератор ва герк шлу жара авадлугъар масу гъадагъуз лазим вуйи кьадар дакьатар жара гъапIнийи. 2020-пи йисанси, 2021-пи йисанра Роспотребнадзори ЕГЭ-йин имтигьнар чан тIалабариинди гъахуз гъитну.

Экзаменар ккергъайиз, дурар гъахру пункт ГЭК-дин членарин ва Роспотребнадзорин гъуллугъчйирин къулар али актариинди кьабул гъапIнийи. Гъябгъюрайи йисан ЕГЭ тувбан бадали, сабпи ражари 398 выпускник улупнайи. Дурарикан 168 выпускникди ГВЭ-си ГИА тувбанди гъахьну. Гьаддиз экзамен туврударин кьадар 230 кас гъахьну. ЕГЭ зат тутрувди, Бургьанкентдин, Цухтигъарин ва Дарвгъарин кьялан мектебариъ ГВЭ-йин къайдайиинди ГИА тувбан къарарар адабгъну.

Вари экзаменар кIули гъягъюрайи вахтна, сар выпускниккьан экзамендиан адаундар. Экзаменариз гъягъру вахтна телефонар ва кагъзар хьайидарра сар каскьан гъахьундар. Тевбан бадали: 2019-пи йисан, телефонар ва жюрбежюр кагъзар хьади, 2 кас гъидиснийи. Экзаменарин тешкилатчйир, кьан дарапIди, чпиз улупнайи вахтназ гъюри гъахьну. ЦРБ-йин ва полицияйин гъуллугъчйирира чпин вазифйир лазим вуйи къайдайиинди тамам гъапIну.
2021-пи йисан Табасаран райондиъ выпускной экзаменар тувбан натижйир гьамцдар гъахьну.

Урус чIал:
Урус чIалнаан экзамен кьюд йигъандин арайиъ кIули гъубшну – 3-пи ва 4-пи июлиъ. 4-пи июлиъ Жвул’арин, ТIиварин, Къужникарин, Кьюрккарин, Пилгъарин, ТIаттларин, Турфарин, ФуркIларин, ГьепIларин ва ЦIурутIларин гъулариан вуйи, 11-пи классдиъ урхурайи 58 касди экзаменар тувну. 2021-пи йисан урус чIалнаан экзамен тувбан натижайи 99,2% тяйин гъапIну, 2020-пи йисан думу улупуб 98,5% вуйи. Лазим вуйи 24 балл кьюр касдихьан гъадагъуз гъабхьундар, 2020-пи йисан – 4 касдихьан.
Цци сар выпускникди урус чIалнаан 100 балл гъадагъну. Думу Хянгъярин кьялан мектебдин выпускник Насир Аьбдулгьялимов ву. Хъа 13 выпускникди 90 ва артухъ баллар гъадагъну: Хючнаъ айи гимназияйин выпускник вуйи Э.Дадашевайи 96 балл, Хючнаарин сабпи нумрайин лицейиъ урхурайи Л. Балаевайи, гимназияйиан вакил К. Набиевайи, Гелинбатандиан А. Аьбдуллаевайи ва ЧвулатI гъул’ан вуйи А. Мустафаевайи – 94 балл, гимназияйиан вуйи З. Гьяжиевайи, А. Гьясановайи ва Г. Мазалаевди – 92 балл, Акъа гъулан агьали А. Исаевайи, Хилипежик гъулан вакил Ф.Уружевайи, ГьепIил гъул’ан А. Жавадовайи ва ЧвулатI гъул’ан Д.Гьяжиуьсмановайи – 90 балл гъадагъну.

Математика:
Математикайин экзамен 75 выпускникди тувну. Улупнайи кьадар 27 баллтIан цIибди 19 выпускникди гъадагъну. Урхбаъ хъуркьувалар улупбан натижа, 2020-пи йисанси, 75% гъабхьну. ВаритIан заан 76 балл Гелинбатандиан вуйи выпускникди гъадагъну, 2020-пи йисан думу улупуб 74 балл вуйи, гьацира Табасаран райондин гимназияйин выпускникдира 76 балл гъадагъну.

Тарих:
Тарихдиан ЕГЭ 34 выпускникди тувну. Улупнайи кьадар баллар 3 касдихьан гъадагъуз гъабхьундар, 2020-пи йисан дицдар касарин кьадар 9 вуйи. Урхбан хъуркьуваларин натижа 92% гьисаб шула, 2020-пи йисан му улупуб 82% вуйи. ВаритIан заан 71 балл ГьепIларин мектебди гъадагъну.

Физика:
Физикайиан ЕГЭ 40 выпускникди тувну. Дурарикан 8 касдихьан лазим вуйи кьадар баллар гъадагъуз гъабхьундар. Урхувалин улупбарин дережа 80% гьисаб шула, 2020-пи йисан – 68% вуйи. ВаритIан заан баллар гимназияйиан вуйи Гьясанпаша Мазалаевди гъадагъну.

Химия:
Химияйиан экзамен 70 выпускникди тувну. 26 касдихьан лазим вуйи кьадар баллар гъадагъуз гъабхьундар. Урхувалин улупбарин дережа, 2020-пи йисанси, 63% гьисаб шула. ВаритIан заан вуйи 80 балл ЦIурутIларин мектебдиъ урхурайи С. Мутелимовайи гъадагъну.
Обществознание:
Обществознаниейиан экзамен 106 выпускникди тувну. Дурарикан 30 выпускникди лазим вуйи кьадар баллар гъазанмиш гъапIундар. Урхувалин улупбарин дережа 72% гьисаб шула, 2020-пи йисан думу улупуб 54% вуйи. ВаритIан заан вуйи 92 балл Табасаран райондин гимназияйи гъадагъну, хъа Гелинбатандин кьялан мектебди – 90 балл гъадагъну. 2020-пи йисан думу улупуб 83 балл вуйи.

География:
Географияйиан экзамен 6 выпускникди тувну. Урхбан улупбарин дережа, 2020-пи йисанси, 100% ву. ВаритIан заан 60 балл Турфарин кьялан мектебдиан вуйи Ш. Гюлмягьямедовайи гъадагъну, 2020-пи йисан заан балл 40 вуйи.

Литература:
Литературайиан 6 выпускникди экзамен тувну. Урхбан улупбарин дережа 84% гьисаб шула, 2020-пи йисан – 80% вуйи. ВаритIан заан 97 балл Хючнаарин лицейиъ урхурайи Къарахановайи гъадагъну.

Биология:

Биологияйиан экзамен 79 выпускникди тувну. Дурарикан 22 касди лазим вуйи кьадар баллар гъадагъундар. Урхбан улупбарин дережа 72% гьисаб шула, 2020-пи йисан – 67% вуйи. ВаритIан заан вуйи 84 балл ЦIурутIларин мектебдин выпускникди гъадагъну.
Лап заан хъуркьувалар улупу выпускникариз медалар тувди.

2020-2021-пи урхбан йисан вари дарсариан хьубар гъадагъу ва ЕГЭ-си туврайи вари дарсариан исккан баллтIан исди дарди баллар гъадагъу выпускникарихьан уьру аттестатарин сагьибар хьуз шулу.

Табасаран райондиан РД-йин образованиейин ва илимдин министерствойиз 35 уьру аттестатар гъадагъуз заявкйир тувна. 2021-пи йисан улупнайи натижйириз лигну, Табасаран райондин 31 выпускникди уьру аттетсатар ва медалар гъадагъиди.

Гьюкуматдин варитIан асас экзаменар (ОГЭ) шубуб ППЭ-йиъ кIули гъушну: Хючнаарин сабп инумрайин лицейиъ, Хянгъярин ва ТIаттларин кьялан мектебариъ. Душвариъ 9-пи класс ккудубкIнайи 713 касди экзаменар тувнийи. Урус чIалнаан 24-пи ва 25-пи майдиъ, хъа математикайиан – 27-пи ва 28-пи майдиъ ОГЭ кIули гъубшнийи. Урус чIалнан ОГЭ-йиан 74 выпускникди кьюбар гъадагъну. 8-пи июндиъ дурариз цIийикIултIан экзамен тувуз мумкинвал тувну. Дурарикан хъана 7 касдихьан ОГЭ тувуз гъабхьундар. Математикайин ОГЭ-йиан 167 касди кьюбар гъадагъну. Дураризра 16-пи июндиъ цIийикIултIан думу экзамен тувуз мумкинвал тувну.

Гьаци вушра, хъана 97 касдихьан ОГЭ тувуз гъабхьундар. 27 выпускникдихьан кьюбби предметарианра ужудар кьиматар гъадагъуз гъабхьундар, дурар зат экзаменариз деетну адру касар ву: СиртIчан – 7 кас, СертIлан – 3 кас, Ярс’ан – 2 кас, ТинтIан – 2 кас, ЦIурутIлан – 2 кас, Акъа гъул’ан – 1 кас, Бургьанкентдиан – 1 кас, Дарвагъ гъулан 2-пи нумрайин мектебдиан – 1 кас, ТIивкан – 1 кас, Къужникан – 1 кас, Кюракк гъул’ан – 1 кас, Кюргъян – 1 кас, НичIрас гъул’ан – 1 кас, Хюрккан – 1 кас, Хючнаарин 1-пи нумрайин лицейдиан – 1 кас. Дурариз экзаменар тувуз 3-пи ва 6-пи сентябриъ хъанара мумкинвал тувди. Гьадму вахтназ дурар ужуди гьязур дапIну ккунду.