Гъябгъюрайи йисан Дагъустандиъ «Культура» милли проектдин дахилнаъди швнуб-саб культурайин идарйир рас апIуз ва бинайиан тикмиш апIуз улупнайи. Му ляхин республикайиъ коронавирусдин тIягъвнин гъагъи аьгьвалат арайиз дуфнашра, дебккнадар. Региондин культурайин министр Зарема Бутаевайи проектдин ляхин фици кIули гъябгъюраш ахтармиш апIури, швнуб-саб совещаниера тешкил гъапIну.

 

Республикайин «Культура» милли проектдин дахилнаъди Дагъустандиъ 4 культурайин Хал (Гъяякент райондин Сагаси-Дейбук гъулаъ, Къарабудагъкент райондин Губден гъулаъ, Нугъай райондин Къумбатар гъулаъ ва Дербент райондин Зидьян-Казмаляр гъулаъ) тикмиш апIура.

Гумбетовский райондин Асккан Инхо, Гуниб райондин Мегеб ва СалтIа, Мягьярамкент райондин Советское, Хив райондин Заан Яракк, Дахадаев райондин Урари, Агъул райондин Тпигъ гъуларин культурайин хулар бинайиан рас апIбан ляхнар гъахура.

Республикайин Мягьячгъала, Дагъустандин Огни шагьрариъ ва Хив райондин Хив гъулаъ ерлешмиш духьнайи бицIидарин искусствйирин мектебариъра расвалин ляхнар гъахура.

Мидланра гъайри, проектдин дахилнаъди Мягьячгъала ва Каспийск шагьрариъ 2 йившлан йишв’ина гъахру библиотека ляхник кипди. Къизляр шагьриъ культурайин артмиш’валин Центр ва Мягьячгъала шагьриъ «Лезгинка» ансамблин ялхъвнарин Хал тикмиш апIбан ляхнарра ккергъна.

Проектдин дахилнаъди Хив райондин культурайин ужагъарин расвалин ляхнар фици гъягъюраш ва культурайин цирклиъ фицдар дигиш’валар, читинвалар аш гьерхри, райондин культурайин отделин кIулиъ айи Казбек Къазиевдихъди сюгьбат гъубхнийза.

«Ав, «Культура» проектдиан кьюбиб тикилишар рас апIбаз республикайин бюджетдиан дакьатар гъафну. Гьамусяаьт думу дараматарик цIийи гъваъ кивра. Дурар кьюбибра гъябгъюрайи йисан август вазлин аьхирариъ вая сентябрин эвелариъ арццуз планламиш дапIнача», – гъапнийи Казбек Къазиевди.
Йиз сюгьбатчийин гафариинди, Хив райондиъ культурайин циркил артмиш апIбаан аьхиримжи вахтна хайлин ляхин дубхна.

«Улихьна вазари райондин варитIан чIатху 10 гъулаз концертарин программа хьади гъушнийча. Мидланра гъайри, райондин культурайин хулан вакилари «Ичкичи ва туканчи» кIуру спектакль сягьнайиин дивнийи. Думура хьади хайлин гъулариз гъушунча. Ихь агьалйири учу лап разиди кьабул апIуру кIури, фикир дайич. Учу гъушу вари гъуларин клубар йишвар адарди тамашичйири ацIну гъахьну. Му проект гьар йисан хьадукра ва чвну гьяракатнаъ апIбан йикьрар адабгъунча. Фицики инсанар шадлугънан серенжемарихъ тамарзу духьна. Дурари артистарикан концерт хъана давам апIувал ккун апIури гъахьнийи. Учу гъягъру гьарсаб гъулаз ихь табасаран эстрадайин мяълийирин устадариз теклиф диври гъахьнийча. Дурариз ихь культура за ва артмиш апIбак учуз кюмекчйир шулайивализ, ич теклифнан тереф бисувализ чухсагъул пуз ккундузуз.

Улихьнаси райондиъ лап яркьуди жигьиларин Йигъ, выпускникарин бал тешкил гъапIнийча. Мидланра гъайри, райондин культурайин цирклин вакилар республикайин дережайин «Эбелцан», «Дагълуйир», Аьхю Гъалибвализ, Дагъустандин 100 йис хьпаз бахш вуйи ва жара аьхю фестивалариъра иштирак гъахьну», – къайд апIура Казбек Къазиевди.

Казбек Къазиев Хив райондин культурайин цирклин кIулиъ дийигъну, гьеле кьюд йисра дубхьнадар. Думу садпи йигълан хилар хъиржвну ляхнихъ хъюгъну. Гьаддиз му бицIи вахтнан арайиъ дигиш’валарра рякъюра. Гъубшу йисан ерли бюджетдин дакьатарин кюмекниинди райондин Лика ва Фурдагъ гъуларин клубар рас гъапIну. Гъябгъюрайи йисан кьюб клуб республикайин бюджетдин ва кьюб ерли бюджетдин дакьатарихъ рас апIура. Культурайин идарйириин материалинна техникайин тяминвалин программайиан 6 культурайин идарайиз мукьмар йивру алатар масу гъадагъну. Гъюру йисанра 10 клубдиз аппаратура масу гъадабгъуз планламиш дапIна. Мидланра гъайри, гъюру йисан кьюб клуб рас апIуз республикайин ва кьюб – ерли бюджетдин программайик кирчди. Казбек Къазиевдин гафариинди, шубуд йисандин арайиъ райондин саки вари клубар къайдайиз хуз мумкинвал хьибди. ИкибаштIан, чан ляхин ккуни ва культурайихъан жавабдарвал гьисс апIурайи му касдин гъвалахъ учвсдар дири гъуллугъчйирра хъади гъабхьиш, ляхин хъана мянфяаьтлуди кIули гъябгъидийи.

«Багарихьди вари гъуллугъчйирин аттестация кIули гъабхуз планламиш дапIнача. Аттестацияйикан хабар гъабхьиган, швнур-сар гъуллугъчи, аьрза дибикIну, ляхниан удучIвну. Узуз культурайин идарйириъ диривал ва бажаранвал кайи, культурайихъан юкIв убгру вакилар лихури ккундузуз. Учу улихьнаси бажаранлу бицIидар, живанар ва жигьилар агбан бадали, швнуб-саб проект гьяракатнаъ ирчнийча. Думу проектариъ гъалиб гъахьидар ляхнариъ дерккурча. Жин апIударза, гъи райондин культурайин бязи идарйириъ культурайихьан лап ярхла вуйи, сабдиканра хабар адру вакилар лихура. Мици дубхьну ккундар. Райондиъ бажаранлу жигьилар а. Дураризра рякъ тувну ккунду», – аьлава гъапIну Казбек Къазиевди.

Гьамусяаьт Хив райондин культурайин цирклин вакилар Дагъустандиъ гъябгъюрайи «Булагъар» фестивалиъ иштирак хьуз гьязур шула. Мидланра гъайри, багарихьди «Аьхюдарин сес» мяълийирин конкурс гъабхуз ва гьацира чвлин вазари райондин вари гъулариз концертар хьади гъягъюз цIийи программа ва «Сижар» кIуру спектакль дивбиин лихура. Гъит, культура артмиш апIбахъди сабси, инсанарин юкIвар шад апIуз зегьмет зигурайи дурариз кьуват ибшри.