«Узу коронавирусдиз аькси руб йивбанди дарза. Гъийин йигъаз аьзарлу гъахьундарш, гъийин йигъхъан тинара аьзарлу даршул. Хъа руб гъивиган фу шулуш, шлиз аьгъя? Ляхниз дурушди, хулаъ дусну гъузузра ккундарзуз. Гьаддиз узу вакцинайин руб йивувалин гьякьнаан вуйи сертификат духтрихьан пулихъ масу гъадабгъуз кказа», – кIура йиз таниш дишагьлийи.
Гизаф регионариъ гьюкуматдин ляхниъ айи ва агьалйирин гъуллугъар гьуркIру йишвариъ ляхниъ айидар вакцинайин руб йивуз мажбур апIура. Руб йивну адрудар, маважиб тувувалра дебккну, ляхнихьан ярхла апIура. Жара регионариъ руб йивну адру агьалйир ресторанариз, театрариз, музеяриз, азад вахт адапIру, спортдин серенжемар гъахру йишвариз деетурадар.
Муштарйир айиган, кучIлан сертификатар, справкйир масу туврударра ачмиш шулу. Гьамци, коронавирусдиз аькси прививка адабгъубси, кучIлин сертификатар тувру «жини рынокра» арайиз гъафну. Интернетдиъ айи улупбариинди, аьхиримжи вазлин арайиъ Урусатдиъ кучIлин сертификатар тувру 300-тIан зиина тахсиркрар ашкар гъапIну.
Гьелбетда, Дагъустандиъра гизафдар гьадму жюре сертификатарин эйсйир духьна. Дурарихьан чпин ляхниъ айи гъарашугъариз, руб йивувал ккун апIурайи духтрариз кучIал апIуз шулу. Хъа коронавирусдиз кучIал апIуз хьибдар. КучIлан сертификатди учву уьзрихьан уьрхидар.
Гьаддихъди сабси, кучIлан сертификатар масу туврайидариина ва гъадагъурайидариина уголовный делойир гъитIиккузра мумкин ву.
Дагъустандиъра кучIлин сертификатар масу туврудар а. Духтрарихъди йикьрар дапIнайи арачйири, 3-5 агъзур манатдихъ прививка дапIну адаршра, думу дапIна кIуру саягънан сертификатар масу тувра. Улихьна йигъари махлукьатлу мялуматарин дакьатари туву хабрариинди, Мягьячгъалайиъ гьацдар кучIлин сертификатар масу тувру духтир дишагьли ва медсестра къанун уьбхру органарин «бацаригъ» гъяхъну. Силис гъабхруган, дурари туву мялуматариинди, духтрина медсестрайи 6 касдиз кучIлин сертификатар масу тувну, хъа вакцина удубзури гъахьну.
Гьамцдар къалп сертификатари дурарин эйсийиз саб жюрейин хайир хибдар. Къанун уьбхру органарин хиларигъ гъяхъю духтрари, чпин жаза пучIу апIбан бадали, силисар гъахру вахтнаъ чпи шлиз сертификат тувнуш, дарпиди гъибтидар. Натижайиъ, руб йивбан гьякьнаан вуйи мялумат «Госуслуги» порталиан дубгди. Пулихъ сертификат гъадабгъу кас ичIи кIаж хьади гъузди.
Хъа варитIан чIуруб гьадму вуки, эгер вакцинайин руб йивбан гьякьнаан сертификат хьайи касдик коронавирусдин уьзур кубчIвиш ва дугъу чалантина жарадарикна уьзур кубчIвуз гъибтиш, къанундиинди жаза аьхюб тувра – 500 агъзурилан 700 агъзуриинакьан манат журум апIуру ясана кьюд йисазкьан дустагъдиъ итру.
Гужниинди учвуз руб йивуз саризра ихтияр адар, руб гъивундар дупну, жавабдарвалихъна хурадар. Хъа къанунди кучIлан сертификатар масу тувбахъан ва гъадагъбахъан жавабдарвал гъабхувал улупна.
Гьаму коронавирусдин тIягъюн удубчIвхъан мина, думу уьзриан гизаф яш дубхьну адру йиз багахьлуйир, багахьди таниш инсанар швнурна сар уьмриан гъушну. Уьзур кубчIвхъан мина я багьалу дармнари, ясана аьхю духтрари дурар аьжаликкан ккадагъундар. Гьяйиф, гъийихдарин гунгьарин аьфи апIри, имбудариз сагъ’вал туври Аллагьди.
Узу, коронавирус уьзур кубчIвну, январин вазли аьзарлу гъахьунза. Уьзур гъагъиди улдубчIвундаршра, саб вазлин арайиъ жандин кефйир адарди, хул’ан удучIвуз даршули хьувал ужуб ляхин дар. Гьаддиз узу уьзрин кьяляхъ 6 ваз улдубчIвиган, вакцинайин руб гъивунза. Бедендин температура за гъабхьундар, руб гъиву хил цIибдиси иццури, шубуд йигъ гъабхьнийи. Узуз багахьна вуйи вари инсанариканра вакцинайин руб йивувал ккун гъапIунза.
Хъана думу уьзриан аьзарлу хьуз ва жвуван багахьлуйирихьан ярхлади гъузуз ккундарзуз. Руб гъивунза кIури, кучIлин сертификат гъадабгъувализра аькси вуза. Гьаддиз узу фагьумлу инсанарикан ккун апIураза: вакцинайин руб йивай, ичв ва багахьлуйирин сагъламвалин гъаразнаъ йихьай.
