Улихьна йигъари Дагъустандин культурайин министр Зарема Бутаевайи Хив райондиъ культурайин маканарин аьгьвалат ва саб жерге карханйириъ гъахурайи расвалин ляхнарин гьякьикьат ахтармиш гъапIну.
Сифте нубатнаъди дугъу, райондин искусствйирин мектеб (РШИ) рас апIурайи тикилишчйирихъди гюрюшмиш духьну, дурарихьан ляхниъ алахьурайи читинваларикан гьерхну.
РКДЦ-йин ва уьмуми библиотекайин аьгьвалат ахтармиш апIбан кьяляхъ, Хив райондин глава Ярмет Ярметовдин гюзчиваликкди Зарема Бутаева райондин ЦТКНР-йиъ табасаран халкьдин милли аьдатарихъди таниш апIбазра фикир тувну (шиклиъ). Му йигъан дурар гьацира Заан Ярак дибдиан рас апIурайи культурайин Хулаз кьимат тувузра гъушну.
«Хив райондиъ культурайин цирклин артмиш’вализ тялукь эгьемият туврайивалиин узу кьадарсуз шад вуза. Ужувлан дигиш’валар хайлин а. Гьелбетда, камиваларра гизаф ими: дурар гьял апIбиин гележегдиъра уьмуми зегьмет зигидича.
Гьамусяаьт республикайин культура артмиш апIбан гьякьнаан вуйи милли проектдин дахилнаъди Хив райондин Заан Ярккарин СДК ва Хив РШИ рас апIбан ляхнар гъизгъинди гъахура. Гъи узу райондиз хялижв хьпан асас метлебра улупнайи объектарин аьгьвалат ахтармиш дапIну, лазим уьлчмйир кьабул апIувал вуйи. Къайд апIурза: тикилишчйири ляхнар ужуб ерийиинди гъахура. Улупнайи вахтназ кьюбиб объектарра ачмиш апIрувалиинра умудлу вуза.
Улупнайи серенжемарилан савайи, аьхиримжи вахтна «Саб вуйи Урусат» партияйин «БицIи Ватандин меденият» проектдин бинайиинди Хив РКДЦ-йин материалинна техникайин бина мюгькам апIуз мумкинвалра гъабхьну.
Дарпиди гъитуз шулдарзухьан: республикайин саб жерге жара районарихь тевиш, Хив райондиъ культурайин циркил артмиш апIбаз ерли гьюкмин кIулиъ айидарира аьхю фикир тувра. Гьаци, аьхиримжи йисари швнуб-саб СДК ерли кьувватариинди рас дапIна. Тялукь аьгьвалатну райондин гьюкмин кIулиъ айидар рюгьлувал, ватанпервервал тасдикь апIура.
Хив райондин культурайин гъуллугъчйири республикайин дережайиъди учу гъахурайи гьарсаб серенжемдиъ заан иштирак’вал улупура. Гъи узу нубатнан ражари Хив райондиъ милли меденият уьбхбаз, думу артмиш апIбаз лазим шараитар айивалиин инанмиш гъахьунза. Чухсагъул гьарсариз!» ‒ гъапну Зарема Бутаевайи.
Райондин глава Ярмет Ярметовди республикайин Минкультурайин терефнаан райондин артмиш’вализ тялукь фикир туврайивализ райондин вари жямяаьтлугъдин терефнаан Зарема Бутаевайиз чухсагъул мялум гъапIну.
