Улихьна йигъари Дагъустан Республикайин правительствойин председателин заместитель Аьбдулмуслим Аьбдулмуслимовдин регьберваликкди жинснан чарвйир артмиш апIбан гьякьнаан совещание гъабхьну.
Серенжем ачмиш апIури, Аьбдулмуслим Аьбдулмуслимовди мялум гъапIганси, гьамусяаьт малдарвалин циркил артмиш апIбаан гъахурайи ляхнар гъизгъин апIура, гьадму гьисабнаъди цIийи жинсар артмиш апIувалра.
Серенжемдин иштиракчи, чарвйир уьрхюрайи марччлихънарин Милли союздин президент Харун Амирхановди мялум гъапIганси, Дагъустандин малдарвалин циркил Урусатдин регионарин арайиъ варитIан кIакIнаъ айиб вушра, гьелелиг ужуб ерийин сурсат тувру ужудар мал-къарайин жинсар республикайин малдарвалин цирклиъ бегьем адар.
Мидланра гъайри, республикайин чарвйирин мяишат ужуди артмиш хьбан бадали, гьамусдиз айи жинснан мал-къарайин кьадар фукьан вуш, «Селекс» кIуру мялуматарин гъурулушдиъ тIапIну ккунду. Эгер чарвйирин гъийин кьадар му гъурулушдиъ гьисабназ гъададабгъиш, гьамусдихъантина циркил артмиш апIбаз кюмек тувуз гъагъиди хьибди. Харун Амирхановдин гафариинди, гьарсаб региондиъ мялуматарин центрар, иммуногенетикайин лабораторйир ва табии дару жюрейиинди цIийи жинсар адагъбан центрар ади ккунду.
Серенжемдиъ иштирак шулайи РД-йин гъулан мяишатдин ва ипIру-убхъру сурсатарин министр Баттал Батталовдин гафариинди, гьамусяаьт федералин реестриъ Дагъустан Республикайин 77 жинснан чарвйир уьрхюрайи мяишатар гьисабназ гъадагъна.
«Къайд дапIнайи мяишатариъ гъийин йигъаз 9 агъзур жинснан кIару малар ва 206 агъзур жинснан чарвйир уьрхюра. Жинсар цIийи алаъру «Дагестанский» центриъ мал-къайин жинсарин ери за апIбан ва илимдин табии дару жюрейиинди цIийи жинсар адагъбан ляхинра гъябгъюра. Республикайин аьлимари апIурайи ляхнари ужудар натижйир тувра. Гьадму натижйирикан саб – ужуб хьа туврайи ва йиккун тIяаьм лап ицциб вуйи «Артлухский меринос» чарвйирин жинс ву.
Натижйир ужудар вушра, му цирклиъ читинваларра гъузра. Мисалназ, «Селекс» мялуматарин гъурулушдиъ швнуб кIул мал-къара аш аьгъю апIувал гъагъиди алабхъура. Гьацира циклиъ чарвйирин жинсар цIийи алауз гьуркIну селекционерар, зоотехникар адар, табии дару жюрейиинди цIийи жинсар адагъбан ляхинра явашди ву», – аьлава гъапIну министри.
Шиклиъ: «Артлухский меринос» жинснан чарвйир
