Гьаму йигъари Мягьячгъала шагьриъ кIули гъубшу республикайин мялимарин августдин совещаниейиъ тярифназ лайикь вуйи мялимарин зегьмет заан пешкешар тувбиинди лишанлу гъапIну.
Совещаниейиз республикайин мектебариъ баркаллуди зегьмет зигурайи 11 мялим дуфнайи. Дурарин арайиъ айи, Табасаран райондин ЧвулатI гъулан мектебдиъ урус чIалнаан ва литературайиан дарсар киврайи мялим Алим Гюлевдиз, ляхниъ гъадагъурайи хъуркьувалариз ва баркаллу зегьмет зигбаз лигну, вахтназ вуди РД-йин Главайин вазифйир тамам апIурайи Сергей Меликовди чухсагъул мялум гъапIну (шиклиъ).
Алим Гюлев Табасаран райондин ЧвулатI гъул’ан ву. Дугъу 2006-пи йисан ДГТУ, хъа 2013-пи йисан уьру дипломдиинди ДГПУ ккудукIну. Багъри гъулаъ мектебдиъ лихури, гьамус Алим Гюлевдин 11 йис ву.
РД-йин Главайин ччвурнахъан вуйи гьюкуматдин пешкеш гъадабгъбан кьяляхъ, учу Алим Гюлевдихъди сюгьбат гъубхнийча. Мялимди чан кIваъ айи фикрар гьамци ачухъ гъапIнийи:
«Йиз ученикари гьар йисан райондин ва республикайин дережайин олимпиадйириъ пешкешнан йишвар гъадагъура. Шубуд йис мидиз улихьна мектебдин 4 выпускникдикан 3-ри ЕГЭ заан баллариз, яна хьубариз тувну. Читинваларикан улхуруш, дурар, эгер образование манзилнаъди гъадабгъру къайдайиина улдучIвиш, гьадди арайиз хиди. Аммаки урхуз ккуни баяр-шубариз онлайн платформйириъ аьгъювалар гъадагъуз манзилнаъди вуйи къайдайи хайлин мумкинвалар тувра. Хъа дарш, вацапдиан мялуматар, табшуругъар хътаувал – му ляхин дар, аьхир. Гьаддиз мялимарин августдин совещаниейиъра мялуматаринна технологйирин месэлйириз асас фикир тувнийи. Думу терефар республикайиъ, дугъриданра, артмиш дапIну ккунду.
Гъубшу йисан вари республикайин ученикар манзилнаъди аьгъювалар гъадагъбан къайдайиина улдучIвган, узу баяр-шубариз «ЯКласс», «Учи.ру» платформйириан аьгъювалар ва табшуругъар туври гъахьнийза. Думуган «ЯКласс» интернет-ресурсдиан табшуругъариан аьгъювалар гъадагъури, 6-пи класс хайлин улихь гъубшнийиз. Табшуругъар дурариз узу гьязур апIури гъахьнийза. Онлайн дарснаъ фуж аш, фуж дарснаъ лихураш вая лихурадарш, ачухъди рябкъюйи. Дарснаъ адруриз, дидихъ хъпебехърайириз телефондиан зенг дапIну, дугъкан йиз наразивал улупуйза.
Совещаниейиъ Дагъустандин Глава ва РД-йин образованиейинна илимдин министр багахь гележегдиъ республикайиъ цIийи мектебар, бицIидарин багъар тикмиш апIуваликан, мялимарин маважибар за апIбакан, материалинна техникайин бина цIийи алапIбакан удучIвну гъулхнийи. Эгер му ляхнар вари тамам гъахьиш, ихь образованиейин циркил мюгькамди артмиш хьибди. Хъа образование улихь гъябгъруган, гележегра мюгькамуб шулу. Мюгьлет ккабхъну имиди, узу вари мялимар, йиз гъарашугъар улубкьурайи урхбан цIийи йисахъди тебрик апIураза. Гъит дурарин гьаму ва гъюру йисар ягъурлудар, лихуз пучIудар, берекетлудар ишри»,
– гъапну Алим Гюлевди.
