Аьхиримжи вахтна махлукьатлу хабрарин дакьатари «Социальный контракт» проектдиинди гьюкуматди пулин кюмек апIурайиваликан гизаф мялуматар тувра.
Социальный контракт – му ватандашарин яшайишдин тереф уьбхру органарин ва ялгъузди яшамиш шулайи, Дагъустан Республикайиъ нуфусдин кIулихъ гъюрайи гъазанждин кьадар 10628 манаттIан цIибди вуйи хизанариз, сакьат, жандин сагъ’вал адру инсанариз ляхниъ учIвуз, хусуси ляхин ачмиш апIуз, хусуси мяишатдиъ ляхин ккабалгуз туврайи кюмекнан гьякьнаан йикьрар ву. Думу йикьрариз асас вуди, агьалйирин яшайишдин тереф уьбхру органди гьюкуматдин терефнаан пулин кюмек тувуз жавабдарвал, хъа пулин кюмек гъадабгъу касди чан кIул’ина мажбурнамйир гъадагъуру: лазим вуш, цIийи пише дубгъувал, ляхниъ учIвувал, хусуси дилаварчивалихъ хъюгъну, налогарин органдиъ гьисабнаъ дийигъувал ва хусуси ляхин артмиш апIувал. Йикьрариъ касибвал кайи хизан читин аьгьвалатнаан адапIбан прог-раммара а.
Касибвал кайи хизанди, ялгъуз касди гъадабгъу пул йикьрариъ улупнайи ляхнаризтIан харж дапIну ккундар. Чав пулин дакьатар метлеблуди ишлетмиш апIурайивал тасдикь апIбан бадали, ватандашди гьар вазлиъ агьалйирин яшайишдин тереф уьбхюрайи органдиз ляхниъ учIвбан, урхурайивалин гьякьнаан документар, кассайин чекар, масу тувбан ва масу гъадабгъбан гьякьнаан документар туври ккунду.
Пулин фуну жюре кюмекнуси, гьаму кюмекнура кьюбиб терефариинра жавабдарвал илипура. Гьаддиз йикьрар йитIайиз, вари жигьатариан фикир апIинай.
Социальный контрактдин программа гьаму йисхъан тина уьлкейин вари регионариъ жанлуди кьувватнаъ убчIвна. 2021-пи йисан 1-пи июлиз Урусатдиъ ватандашарихъди 120 агъзур социальный йикьрар йитIна. Дагъустан Республикайин зегьметнан ва яшайишдин артмиш’валин министерствойира «Социальный контракт» проект уьмриз кечирмиш апIура.
«Республикайин агьалйирин яшайишдин тереф уьбхру идарйириъ «Социальный контракт» проектдиъ иштирак хьуз планламиш апIурайи ватандашариз консультацйир тувру рабочий дестйир тешкил дапIна. Дагъустан Республикайиъ идарайиз илтIикIу, хизандиъ яшайишдин касибвал кади ясана касибвал кади ялгъузди яшамиш шулайи инсанариз хусуси ляхин ачмиш апIувализ 250 агъзур манат гъадабгъуз мумкинвал а. Гьюкуматди кюмек вуди пулин дакьатар жара апIура, хъа агьалйири чпин яшайишдин аьгьвалат къайдайиз дубхну ккунду», – кIура министерствойин мялуматарин гъуллугънан вакили.
Ич сюгьбатчийин гафариинди, гьаму йисан аьхириз Дагъустандин зегьметнан ва яшайишдин артмиш’валин министерствойи 7807 хизан кьабул дапIну ккунду. Гъийин йигъаз министерствойиз 7 агъзуриинакьан инсанар илтIикIну. Думу кьадарнакан 211 миллион манатдин кьадарнаъди 2565 касдихъди йикьрар гъийитIну. Гьюкуматди туврайи пулин кюмек гъадабгъуз 3163 касди документар уч апIура.
Гьюрматлу ватанагьлийир, учвуз гьюкуматдин терефнаан гьаму жюрейин кюмек гъадабгъуз ккундуш, учву яшамиш шулайи йишваъ соцзащитайин органариз ясана МФЦ-йиз илтIикIну ккунду.
