Табасаран райондин ЦРБ-йин медицинайин тяди кюмекнан отделение 1980-пи йисан либхуз хъюбгънийи. Гъи диди райондин 76 гъулан агьалйирин – 50313 касдин игьтияжар гьуркIра, гьадму гьисабнаан 18453 бицIидарин, 31860 аьхюдарин.
Улихьна йигъари Табасаран райондиъ айи ич хусуси мухбир Ражаб Нуровдиз чпин ляхникан, отделениейин гъайгъушнарикан Табасаран райондин медицинайин тяди кюмек тувру отделениейин заведующий Руслан Гьяжиаьлиевди ктибтну.
– Руслан Низамудинович, тяди кюмекнан отделениейиъ швнуб бригадайи ляхин апIура ва фицдар пишекрар лихура?
– Медицинайин тяди кюмекнан отделениейиъ кьюб бригада лихура. Коллектив чпин ляхин ужуди аьгъю, инжик даршлу пишекрарикан – 3 духтрикан ва 10 фельдшерикан ибарат вуйич. Духтрар Мирзабег Мислимовди ва Къурбан Къурбановди Дагъустандин гьюкуматдин медицинайин институтдиъ, хъа Эльнара Аьлисултановайи Астрахандин медицинайин академияйиъ сагъламвалин факультетар ккудукIну. Фельдшерарди Вадим Гьямзаев, Камил Сеидов, Байрамяли Рамазанов, Неж-мулла Амирасланов, Маркиз Аьлиев, Сефер Ражабов, Артём Мягьмирзаев, Расим Ибрагьимбегов, Аьгьмед Ибрагьимов лихура.
– Кьялан гьисабариинди, швнуб дакьикьайин арайиъ хъуркьри шулчва дих гъапIу йишваз?
– Къаб дакьикьайин арайиъ. Саб суткайин арайиъ, кьялан гьисабариинди, 23 аьзар-луйихьна дих апIурачуз. Райцентрихьан ярхла ерлешмиш духьнайи гъулар хайлин а. Душваризра учу вахтниинди хъуркьну, кетIерццнайириз тяди кюмек дапIну ккунду. Гьаддиз гьаммишан гьязурди 2 машин дерккну шулич.
– Отделениейин автопаркдин гьял, ляхниъ герек шлу авадлугъарихъди тяминвал фициб вуйичв?
– Вари 9 машин ачуз: 2 «УАЗ» машинар, 6 «Газель», 1 реаномобиль. Машинарин гьялнакан улхуруш, «УАЗ» машинар саб 2007-пи йисандин, тмунуб 2016-пи йисандин ву; «Газель» машинарин арайиъра гьам хайлин вахтна ишлетмишнаъ айидар (2006-пи йисхъанмина), гьамсан цIийидар (2018-пи, 2019-пи йисариндар) а. Вари машинар ужуб гьялнаъ а. Машинарихъди СиртIич ва Ярса айи участковый больницйирра, Кюрягъ, ТIюрягъ, Дарвагъ ва Дюбек гъулариъ айи ФАП-арра тямин дапIна/ Ургру-ктатру материаларинра саб читинвал адарчуз. Лазим вуйи авадлугъарин ва шей’арин гьякьнаан улхуруш, отделение дурарихъди гьарган тяминди вуйич: 2 ЭКГ-аппарат, дефибриллятор, кислороддин балон, «Амбу» кIуру аппарат, ИВЛ, шубуб мониторар ва гь. ж. ачуз.
– Гизафси учвуз фицдар уьзрариан иццурайидарихьна дих апIури шулу?
– Гьамусяаьт варитIан гизафси пневмония уьзриан кетIерццнайидарихьна дих апIури шулу; гьацира ахъну, алдакну, ликар-хилар гъюргъдарихьна, итIру сурсатариан, ичкийиан зегьерламиш гъахьидарихьна, гипертония, невралгия, кIван уьзрариан иццру духьнайидарихьна.
– Учву дих гъапIу йишв’ина гъафи вахтна больницайиз гъягъюз рази даршлу пациентар алахьури шулин? Дурар фици мутIи апIури шулчва?
– Ав, дицдар, мутIи апIуз даршлударра гизаф алахьуру. Дурариз хулаъ лазим вуйи кюмек апIуз даршлуваликан ктибтури шулча, учву больницайиз чарасуз дуфну ккунду кIури, алдатмиш дапIну, мютIюгъ апIури шулча.
– Цци миржиб вазлин арайиъ швнуб ражари аьзарлуйирихьна учвуз дих гъапIну?
– Цци ич отделениейин пишекрариз 5948 ражари гъулариз кетIерццнайидарихьна дих гъапIну. ФОМС-дин тIалабариинди, гьацI йисандин план 6248 вуди, 6 вазлин арайиъ 4633 дих апIбар гъахьну. 2020-пи йисан гьацI йисандин арайиъ 4388 дих апIбар гъахьнийи. Бязиган, лап читин гьялнаъ айи кетIерццнайидар больницайин кьувватариинди сагъ апIуз даршлуган, учу Мягьячгъалайиан санитарвалин авиацияйиз дих апIури шулча. Гьаци, цци кьюб ражари Мягьячгъалайиан райондиз кетIерццнайидар гъахуз вертолет гъафну.
– Фицдар дигиш’валар тIаъну ичв ляхниъ коронавирусди? Ковид кайидарихъди лихуз отделениейин пишекрариз шартIар яратмиш дапIну ачва?
– Коронавирус удубчIвхъанмина ляхин жараси албагнача. Больницайин кIулиъ айидари ковид уьзур кайидарихъди ляхин апIбан бадали лазим вуйи палат, дармнар ва авадлугъарихъди тямин дапIнача.
– Чухсагъул, Руслан Низамудинович, интервью тувбаз.
