Цци августдин вазлиъ Табасаран райондиъ «Рубасдин мукьмар» кIуру нубатнан фестиваль кIули дубшну ккундийи. Учу фестиваль гъабхувалин гьякьнаан газатдиъ туву мялуматдин шилнаъди ихь машгьур тарихчи Мягьямед Гьясановди думу фестиваликан чан фикрар кайи кагъаз хътапIнийи. Амма думу вахтназ Табасаран райондин администрацияйи, коронавирусдиан арайиз дуфнайи аьгьвалатнахъди аьлакьалу вуди, фестиваль кIули дурубхбан къарар адабгънийи, гьаддиз Мягьямед Гьясановдин фикрар чап гъапIундайча. Гьаму гьяфтайин аьхириъ Табасаран райондиъ Кьалухъ Мирзайин ччвурнахъ вуйи Табасаран халкьдин культурайин фестиваль гъабхбанди ву. Ич фикриинди, му важиблу гьядисайин гъаншариъ тарихчийин теклифар чап апIуз лап ужуб вахт ву.
«2021-пи йисан 18-пи июндиъ «Табасарандин нурар» газатдиъ чап дапIнайи «Рубасдин мукьмар» кIуру макьала гъурхунза. Ва, исихъ улупнайи фикрар кIулиз адагъувал метлеб вуди, фестивалин гьязурлугвалин комитетдихьна илтIикIураза.
«Рубасдин мукьмар» фестиваль гъабхбан гьякьнаан йиз хусуси теклифарин сиягь чап апIураза.
1. Фестивалин асас метлеб – ихь халкьдин меденият за апIувал дубхьну ккунду.
2. Республикайин дережайин фестиваль гъабхувал гъагъиди алабхъиди, гьаддиз, йиз фикриинди, региондин дережайин фестиваль гъабхувал ужу ву, яна гъунши районарин коллективариз теклиф апIувал.
3. Фестивализ Кьалухъ Мирзайин ччвур тувувал.
4. Фестивализ мухрик кибтIру Кьалухъ Мирзайин значок гьязур апIувал. Табасаран райондин администрацияйии, му теклифар фикриз гъадагьну, дурарикан мянфяаьт ктабгьур кIури, умуд киврача.
5. Фестиваль тешкил апIувал ва гъабхувал гъагъи ляхин вуйиб фикриз гъадабгъну, думу кьюд йисак ваъ, хъа шубуд йисак сабан гъабхувал.
6. Фестивалиъ табасаран халкьдин медениятдин хъуркьуваларикан ва камиваларикан улхувал.
7. Табасаран халкьдин меденият артмиш апIбак аьхю пай кивдариз фестивалиъ грамотйир ва жара пешкешар тувувал.
8. Гъюру ражнан фестивалариз дериндиан ва вахт ккимиди гьязур хьувал.
Зиихъ къайд дапIнайи месэлйирин сиягь тамам гъапIиш, «Рубасдин мукьмар» фестивалин маракьлувалра артухъ ва думу заан дережайиъди гъабхузра хьибди», – кIура машгьур аьлимди.
