Мялимдин пишейихьна вари деврариъ аьхю гьюрматниинди янашмиш шули гъахьну, фицики думу гизаф жавабдар ва гъагъи пишйирикан саб ву. Мялимди аьхю шулайи наслин уьмриъ варитIан асас йишв бисура гъапишра, кучIал даршул, гьаз гъапиш фунур бицIиринра гележегдикан вуйи хиялар-ниятар сарпи мялимдихъди аьлакьалудар шулу. Гьаддиз му пишейихьна дивнайи тIалабарра лап заандар ву. Баяр-шубариз аьгъювалар тувувалси, дурар тербияламиш апIувал ва дурариз насигьят тувувал, багъри ватандихьна ккунивалин рюгь капувал, гьарсар бицIирин кIвахьна жа-жаради рякъ дабгну, дурарин удукьувалар ачмиш апувал ва гьацдар жара ляхнар мялимдин гьар йигъандин вазифйир ву.
5-пи октябриъ ихь уьлкейиъ мялимарин пишекарвалин Йигъ къайд гъапIну. Му йигъ вари дюн’яйин мялимарин Йигъра ву. Чпин уьмур варитIан баркаллу пишейиз бахш гъапIу касарин – вари дюн’яйин мялимарин Йигъ 1994-пи йисан ЮНЕСКО-йи тасдикь гъапIуб ву. Думу важиблу гьядисайихъди аьлакьалу гъапIну, фицики 1966-пи йисан 5-пи октябриъ вари халкьарин конференцияйиъ мялимарин зегьмет къайдалу апIру «Мялимарин вазиятнан гьякьнаан» асас документ кьабул гъапIну.
Гьаму йигъан Мягьяч-гъалайиъ, «Урусат – йиз тарих» кIуру тарихнан паркдиъ, «Урусатдин тарихнаъ мялимди уйнамиш гъапIу роль» ччвур тувнайи выставка ачмиш гъапIну. Урусатдин Федерацияйин мярифатнан министерствойин жягьтлувалиинди гуманитарный проектарин Фондну тешкил дапIнайи му экспозицияйи тамашичйир уьлкейин педагогвалин илмин аьсрариинди уьрхюрайи аьдатарихъди ва тIау дигиш’валарихъди таниш апIура.
«Мялим – варитIан асас пише ву. Ичв ученикарихьна вуйи ккунивалин ялав зат ктIутIубшвуб ккун апIураза. Гъит дурарира чпин терефнаан учвуз уьмурлуг чухсагъул мялум апIури гъузри. Ухьу, мялимар, гьадму ккунивалихъди ва гьюрматнахъди ацIрахьу. Чухсагъул учвуз! Гележегдиъ аьхю хъуркьувалар гъазанмиш апIуз кьувват туври», – гъапну, выставка ачмиш апIбан серенжемдиъ удучIвну улхури, вахт-наз вуди РД-йин илмин ва образованиейин министрин вазифйир тамам апIурайи Ягь’я Бучаевди.
Тарихнан паркдин кIулиъ айи Тимур Велихановдин гафариинди, тялукь выставкйир Урусатдин 13 региондиъ ачмиш гъапIну. Дурарин асас вазифа – агьалйириз образованиейин гъуллугъчйири урусатдин тарихнаъ уйнамиш гъапIу важиблу роль улупувал ву.
